JOSHUA 21 - Kemethajüh (N) (Re-editing) Bible (BSI)

Levi nyi Nyunutithu

¹ Levi nyi theghithu ccülikesathu na keqhaikediwa Eleazar, Nun tsawa Joshua, nu Israel mizza tsüdi wi theghithu miwi ccülikesathu wi wa.

² Kanaan yyi Shilo wi mathu na tsüthu wi khi, “Apvüwa na Mosa wi anyunutithu nu tsüthu kevü wi ithu sahangthu ghena amou pi ithu cüle khitheng.”

³ Tsalina Apvüwa jühkhukechi kenie wina Israel nyithu na mathu yyi wi anyunutithu pahan nu amou pi Levi nyithu cüa.

⁴ Anyunutithu pi Levi nyi kecü atuwa na Kohath gei theghithu ghena sa. Keqhaikediwa Aaron wina keshhugho shicü theghithu ghena Judah, Simeon, nu Benjamin yyi wi anyunuti tagha nu kecheng pi cüa.

⁵ Kohath gei kepathu ghena Efraim, Dan, nu niduwa Manasseh yyi wi anyunuti tagha pi cüa.

⁶ Gershon gei ghena Issakhar, Asher, Naftali, nu nishuwa Manasseh yyi wi anyunuti tagha- kecheng pi cüa.

⁷ Merari gei theghithu ghena Reuben, Gad, nu Zebulun yyi wi anyunuti taghakeni pi cüa.

⁸ Apvüwa na Mosa wina khiketheng ti Israel nyithu na akezen wwi nu anyunuti hathu nu tsüthu kevü wi amou pi Levi nyithu cüa.

⁹ Anyunuti hathu nyan ha na Judah nu Simeon yyi wi pi

¹⁰ Aaron shicüthu wi Kohath gei Levi wina keshhughothu cü kesathu. Pila mathu kecü ha atuwa sa.

¹¹ Arba nyunutiwa tsüpi mathu cü (Arba na Anak ba), khili pi Hebron le ci keten Judah yyishiphon diyyiwa tsü nu ma kevü wi amou saghu.

¹² Isala anyunuti tsüwa llithu, nu anyutithu tsü pi Jefunne tsawa Kaleb na pi ma ji sayalo cüdha.

¹³ Hebron (kuthikeya nyunuti jawi kesü) miwi anyunuti hathu pi keqhaikediwa Aaron shicübvüghathu cü: Libnah,

¹⁴ Jattir, Estemoa,

¹⁵ Holon, Debir,

¹⁶ Ain, Jattah, nu Beth Shemesh, pi tsüthu amou kesaghu; Judah nu Simeon mizzathu wi anyunuti tugu.

¹⁷ Benjamin yyi wi anyunuti mejü pi mathu cüa: Gibeon, Geba,

¹⁸ Anathoth, nu Almon, pi tsüthu amou saghu.

¹⁹ Tsüdi saghu anyunuti taghakecheng nu amouthu pi Aaron shicübvügha keqhaikedithu cüa.

²⁰ Levi nyi Kohath gei theghi kepathu ghena Efraim yyi wi anyunutithu pahan pi cüa.

²¹ Anyunuti mejü pi mathu cüa: Efraim yyishiphon diyyiwa wi Shekhem (kuthikeya nyunuti jawi kesü) pi amou saghu, Gezer,

²² Kibzaim, nu Beth Horon, pi amouthu saghu.

²³ Dan yyi wi anyunuti mejü pi mathu cüa: Elteke, Gibbethon,

²⁴ Aijalon, nu Gathrimmon, pi tsüthu amou saghu.

²⁵ Niduwa Manasseh yyi wi anyunuti keni pi mathu cüa: Taanak nu Gathrimmon, pi tsü keni amou saghu.

²⁶ Kohath gei theghi hathu ha na anyunuti tagha pi tsüthu amou saghu muya.

²⁷ Levi nyi kepathu Gershon gei na nishuwa Manasseh yyi wi anyunuti keni muya: Bashan wi Golan (kuthikeya nyunuti jawi kesü), nu Beeshterah, pi tsü keni amouthu saghu.

²⁸ Issakhar yyi wi mathu anyunuti mejü muya: Kishion, Daberath,

²⁹ Jarmoth, nu Engannim, pi tsüthu amou saghu.

³⁰ Asher yyi wi mathu anyunuti mejü muya: Mishal, Abdon,

³¹ Helkath, nu Rehob, pi tsüthu amou saghu.

³² Naftali yyi wi mathu anyunuti kecheng muya: Galilee wi Kedesh (kuthikeya nyunuti jawi kesü), pi amou saghu, Hammoth Dor, nu Kartan, pi tsüthu amou saghu.

³³ Gershon gei theghi kepapa kesathu na anyunutithu taghakecheng pi tsüthu amouthu saghu muya.

³⁴ Levi nyi kepathu Merari gei na Zebulun yyi wi anyunuti mejü muya: Jokneam, Kartab,

³⁵ Dimmah, nu Nahalal, pi tsüthu amou saghu.

³⁶ Reuben yyi wi mathu anyunuti mejü muya: Bezer, Jahaz,

³⁷ Kedemoth, nu Mefaath, pi tsüthu amou saghu.

³⁸ Gad mizza yyi wi mathu anyunuti mejü muya: Gilead yyi wi Ramoth (kuthikeya nyunuti jawi kesü) pi amou saghu. Mahanaim,

³⁹ Heshbon, nu Jazer, pi tsüthu amou saghu.

⁴⁰ Tsalina anyunutithu saghu taghakeni pi Merari gei cüa.

^41-42 Israel nyithu yyi wi saghula anyunutithu jügha nu tazen pi tsüthu kevü wi amouthu saghu pi Levi nyithu cüa.

Israel Nyithu Na Ayyi Yapi Mathu Ji Sakeya

⁴³ Tsalina Apvüwa na ma Israel bamyithu wi ayyi pi mathu cüle kishenketheng ti ayyi tsüdi pi mathu cüa. Mathu na tsü yakeya seng wi ciwi hang wa.

⁴⁴ Apvüwa na mathu bamyithu wi kishenketheng ti ayyi maben wi kecca pi mathu cüa. Mathu ghinyithu kesütanla mathu shun meya, kepaghenanye Apvüwa na mathu ghinyi tsüdi miwi khangkeya pi Israel nyithu cüdha.

⁴⁵ Apvüwa na Israel nyithu tuwi khishiketheng tsüdila sacenya.