JOSHUA 20 - Kemethajüh (N) (Re-editing) Bible (BSI)

Kuthikeya Nyunutithu

¹ Apvüwa na Joshua kiza

² nu Israel nyithu wi khi thsü, “Hi Mosa wina nthu kekiza ti kuthikeya nyunutithu kessiyalo.

³ Anyi kesü na chanmiwa nyu pathi lethu ma ciwi bvü wa ma miwi ajukhiyale kebenwa tuwi apvü-nsala benya mehai.

⁴ Ma bvü sen nu anyunuti hathu kesü wi wala anyunutiwa kedulen wi ajüh kaghatenpen wi ma khati sa khe khimetha pi accülikesathu kizaya mehai. Tsaseng wi mathu na ma ssidu anyunutiwa wi kahang pen kesü pi ma cü nu ma ciwi hangya thsüben.

⁵ Keujüla anyi ajukhiyale kesawa na ma nie sen nu ciwi gho lethu, anyunutiwa wi anyithu na ma pi anyi tsüwa kwen wi chi yishü. Mathu na ma khweya nsathu yishü, kepaghenanye ma aghandu nu aghekepvü wi nyela anyiwa tsü pathimi kesalina.

⁶ Ma atentiwa jühkekaghaten tuwi npi kangan chu nu tsü tsüwi anyi keqhaikedi sa kebenwa tsü npi keshü chu ma anyunuti tsüwi hangbenya mehai. Tsaseng wi ccüna anyi tsüwa na ma bvüshhu kesa nyuti wi ma jjen wi whanengya mehai.”

⁷ Tsalina mathu Jordan na niduwa Naftali Yyishiphon diyyiwa wi Galilee wi Kedesh; Efraim Yyishiphon diyyiwa wi Shekhem; nu Judah Yyishiphon diyyiwa wi Hebron khuthiya.

⁸ Mathu na Jordan na nishuwa yikhami ketijü Jerikho na nishuwa Reuben yyi wi Bezer; Gad yyi wi Gilead wi Ramoth; nu Manasseh yyi wi Bashan wi Golan kessiya.

⁹ Kuthikeya nyunuti hathu ha Israel nyithu tsüdi nu asang mathu jawi hang ketenthu ghena. Anyi kesü le kesü lela chanmiwa nyu pathi kesawa na bvü wa ciwi anyi ma miwi ajukhiyale kebenwa tuwi ma khweya; ma atuwa atenti jühkekaghaten tuwi npi kangan chu pi shü thsü keya nmi.