JOSHUA 17 - Kemethajüh (N) (Re-editing) Bible (BSI)

Niduwa Manasseh Mizza

¹ Jordan na niduwa ayyi pahan pi Josef tsa keqhaiwa Manasseh shicübvügha theghithu cü. Gilead ba Makhir na Manasseh tsa keqhaiwa nu ma aghi kekhang nyi kesü, tsalina Jordan na nishuwa Gilead nu Bashan tsü pi ma cüa.

² Jordan na niduwa ayyi tsü pi Manasseh theghi kepathu Abiezer, Helek, Asriel, Shekhem, Hefer, nu Shemida cüa. Hathu ha na Josef tsawa Manasseh shicü npvüzathu, nu mathu theghi jawi accülikesathu.

³ Manasseh tsa na Makhir, Makhir tsa na Gilead, Gilead tsa na Hefer, Hefer tsa na Zelofehad, ma atsa npvüza nmi nu angathu ketan ben. Mathu nyan na Mahla, Noah, Hogla, Milka, nu Tirzah.

⁴ Mathu na wa keqhaikediwa Eleazar, Nun tsawa Joshua, nu accülikesathu wi khi, “Apvüwa na Mosa wi ayyi pahan pi ithu baghathu nu ithu la cü nu pi ithu ji saya thsülo khitheng.” Tsalina Apvüwa na kekhi ti ayyi pahan pi mathu nu mathu baghathu cüa.

⁵ Ha ghena Manasseh na Jordan na nishuwa ayyi Gilead nu Bashan tsü miwi ashei tagha muya,

⁶ kepaghenanye ma shicü nzathu le npvüzathu lela ayyi pi cü. Gilead wi ayyi pi Manasseh shicübvügha kepathu cüa.

⁷ Manasseh ggü na Asher wina wa Shekhem nishuwa Mikhmethath cuben. Aggü acülawa na wa Entappuah nyithu yyi saghuben.

⁸ Ayyi Tappuah kevü tsüna Manasseh ji, isala aggü wi Tappuah nyuti tsüna Efraim shicübvüghathu ji.

⁹ Aggü na sasen Kanah ghaku wi cüben. Aghaku na acülawa anyunutithu na Manasseh yyi wi lela tsüthu na Efraim ji. Manasseh ggü tsüna aghaku na aghawa sasen wa Mediterranean Tssükedone wi kenten saben.

¹⁰ Efraim na acülawa nu Manasseh na aghawa sala Mediterranean Tssükedone pi niduwa manyi ggü saben. Asher na agha niduwa, nu Issakhar na agha nishuwa wi saben.

¹¹ Issakhar nu Asher manyi yyi non wi Manasseh na Beth Shen nu Ibleam manyi, tsü kevü wi anyutithu, nu Dor (atssü katen wi kebenwa Endor, Taanak, Megiddo, nu tsüthu kevü wi anyutithu na ben.

¹² Isala Manasseh nyithu na anyi anyuti tsüthu wi hang kebenthu jügüshi meyala, tsalina Kanaan nyithu na ciwi hang wa.

¹³ Israel nyithu na zü kayi keya seng wi lela mathu na Kanaan nyithu tsüdi njügüshila, isala mathu meten pi mathu kekuli sa thsü.

Efraim nu Niduwa Manasseh na Ayyi Kekhieneng

¹⁴ Josef shicübvüghathu na Joshua wi khi, “No mangkesa na ayyi kegishü kesütan pi ithu ji saya thsü nu? Apvüwa na sawegü pi ithu kecü ghena ithu na anyi ji ntsa saben.”

¹⁵ Joshua na luneng, “Keujüla nthu na anyi kejon ben nu Efraim yyishiphon diyyiwa tsüna nthu ghena zza mtsü lethu, Periz nu Refaim nyithu yyi agheja witsü wala nthu ghena ayyi samethayalo.”

¹⁶ Mathu na khineng, “Yyishiphon diyyiwa ha ithu ghena zza mtsüdha, isala deshentijü wi Kanaan nyithu Beth Shen nu tsü kevü anyutithu nu Jezreel yyiketijü wi hang kebenthu na amighe gorugarithu ben.”

¹⁷ Joshua na Efraim nu niduwa Manasseh mizzathu wi khi, “Ntsakhiwa nthu na anyi kejon, nu nthu na khang ntsawa. Nthu na kegishü kesü miwi muyaben.

¹⁸ Yyishiphon diyyiwa tsüna nthu ji saben. Tsüna ayinong kesü saben lela nthu na ma katen pahanwa na wa kepawa kecu tsü sametha nu pi nthu ji sayalo. Kanaan nyithu na amighe gorugarithu ben nu mathu na anyi kezüthu lela nthu na mathu jügüshiaben.”