JOSHUA 16 - Kemethajüh (N) (Re-editing) Bible (BSI)

Ayyi pi Efraim nu Niduwa Manasseh Mizza Kecü

¹ Ayyi pi Josef shicübvüghathu kecü ggü acülawa na Jordan wi Jerikho kete Jerikho tssükebvüpen wi tsüna ayyikeshü non wi du. Tsüna Jerikho wina yyishiphon diyyi non wa Bethel kecu.

² Bethel wina Luz wi wa Arkhi nyithu na hang keben Ataroth Addar pvüdhi wa.

³ Tsüna niduwa Jaflet nyithu na hang keben wi wa Beth Horon ssanwa kecu. Ciwi na sasen Gezer wi wa nu Mediterranean Tssükedone wi kenten saben.

⁴ Josef shicübvüghathu wi Efraim nu niduwa Manasseh mizzathu na ayyi ha muya nu pi mathu ji saya.

Efraim Mizza

⁵ Ha na Efraim theghithu yyi: mathu ggü na nishuwa Ataroth Addar wina shu Beth Horon mmiwa,

⁶ nu ciwi na Mediterranean Tssükedone wi wa. Mikhmethath na mathu na aghawa. Nishuwa ggü na Taanath Shilo wi wa nu tsü wina Janoa nishuwa pvüdhi waben.

⁷ Isanu tsüna Janoah wina cüla Ataroth, Naarah, nu Jerikho cuben, nu Jordan wi kenten saben.

⁸ Niduwa ggü na Tappuah wina sasen Kanah ghaku wi wa nu Mediterranean Tssükedone wi kenten saben. Ayyi ha pi Efraim mizza theghithu cü nu pi mathu ji saya thsüa.

⁹ Manasseh ggü non wi anyuti nu anyu pahan lela pi Efraim nyithu cüa.

¹⁰ Isala mathu na Gezer wi Kanaan nyithu tsü njügüshila, tsalina Kanaan nyithu nansü kecu Efraim nyithu jawi hangben, isala mathu meten pi nssümagha kekuli sa thsüden.