JOSHUA 14 - Kemethajüh (N) (Re-editing) Bible (BSI)

Jordan na Niduwa Ayyi pi Kegishü

¹ Hawa ha Kanaan yyi Jordan na niduwa pi Israel nyithu jawi kegishü cüki. Keqhaikediwa Eleazar, Nun tsawa Joshua, nu Israel mizzathu jawi atheghi ccülikesathu na tsüpi anyithu jawi gishü.

² Apvüwa na Mosa kekiza ti Jordan na niduwa amizza tugu nu kegishü pahan mathu yyi ggü na akezen wwi nu sheng.

^3-4 Mosa na ayyi Jordan na nishuwa pi amizza keni nu kegishü pahan cüdha. (Josef shicübvüghathu na gishü pi amizza keni Manasseh nu Efraim satheng.) Isala Mosa na ayyi keula pi Levi nyithu shei nsa. Isala mathu na kahang pen anyunutithu pila mathu mesüsi nu asahangthu ghena allithu muya.

⁵ Apvüwa na Mosa kekiza ti Israel nyithu na ayyi pi gishüya.

Hebron pi Kaleb Kecü

⁶ Ghanan kesü Judah mizza wi anyi pahan na Gilgal wi Joshua wi gho. Mathu meshu kesü Keniz nyi Jefunne tsawa Kaleb na ma wi khi, “Apvüwa na Kadesh Barnea wi ishinyi ghena Anyiza nyiwa Mosa wi mangwale khi khe no chüben.

⁷ Hi kahang mapi jügha witsü Apvüwa maghawa Mosa na Kadesh Barnea wina hi kesun pi ayyi ha hhainan gha thsü. Hi ajüh tsentsa sengho ma cü neng.

⁸ Isala anyi hi gweghe kewathu na ithu nyi sapi messi thsü lela hi tsü Apvüwa iNyiza jüh nie tsentsa sale.

⁹ Hi tsüti kesalina Mosa na hi wi hi nu ishicübvüghathu na iccü pi qhonan kesa yyi ha pi ithu ji sabenle kishen theng.

¹⁰ Isala ghangchilo, Apvüwa na Mosa wi tsüti kekhi khili amapi ha jügha nu manga sadha. Tsü tsüwi Israel nyithu na ayyikeshü wi keqoedejaden nu Apvüwa na khishiketheng ti hi nansü kecu hangben. Hi ghangchilo, hi amapi achentazen nu manga sadha,

¹¹ nu hi khili la Mosa na hi kesunshi kechi tsüwi kezü ti züben. Hi kezü na khili la aghi le katsüha lela saya mehai.

¹² Tsalina khili, Apvüwa na hi nu inyithu na khi kiza ghanan wi khishiketheng ti yyishiphon diyyiwa tsüpi hi cülo. Anakim gei kücanyithu na ciwi anyunutithu khweti keti sa nu benle kesa ithu na no kizadha. Apvüwa na hi ssitenla metsi, Apvüwa na kekhi ti hi mathu jügüshiaben.”

¹³ Joshua na sawegü pi Jefunne tsawa Kaleb cü nu Hebron nyunutiwa tsü pi ma cü nu pi ma ji saya thsüa.

¹⁴ Hebron na khili la Keniz nyiwa Jefunne tsawa Kaleb shicübvüghathu ji saben, kepaghenanye ma Apvüwa Israel Nyizawa jüh tsü nie tsentsa saya.

¹⁵ Hatuwi Hebron tsüpi Araba nyunuti le ci keten. (Araba na Anakim jawi anyi kedi ntsa sa.) Khilitsü ayyi ciwi aghi nmidha.