JOSHUA 13 - Kemethajüh (N) (Re-editing) Bible (BSI)

Ayyi Hewila Yaya keten

¹ Joshua na khilitsü qhai ntsa sadha. Apvüwa na ma wi khi, “No qhai ntsa sadha, isala hewila ayyi kejon yakeyau na ben:

² Filistia nu Geshur yyi tsüdi,

³ nu Avvim yyi na wa acülawa tsüdi. (Ayyi Shieor ghaku wina Ejipt nyi kemeggü wi wa Ekron kemeggü kecu tsü Kanaan nyi ji sagho; Filistin Kadimithu na Gaza, Ashdod, Ashkelon, Gath, nu Ekron wi hang.)

⁴ Ciwi khili la Kanaan diyyi tsüdi, nu Meara (tsüna Sidon nyithu ji), Amor nyi kemeggü wi Afek kecu;

⁵ Gebal nyithu yyi Lebanon tsüdi wa nishuwa, Hermon Yikha na acülawa Baalgad wina wa Hamath Pass kecu.

⁶ Ha na Lebanon Yikhathu nu Misrefoth Maim jüwi hang keten Sidon nyithu yyi tsüdila saghuben. Israel nyithu na atujügüwathu hi anyi hathu tsüdi jügüshi cüden. Hi no kekiza ti no ayyi tsüpi Israel nyithu jawi gishü cü nsathu yishü.

⁷ Tsalina khili ayyi ha pi amizza tugu nu Manasseh mizza kegishü pahan jawi gishü cü nu pi mathu ji saya thsülo.”

Jordan na Nishuwa Ayyi pi Kegishü

⁸ Reuben, Gad, nu Manasseh mizza kegishü pahan mizzathu na Jordan Ghaku na nishuwa Apvüwa maghawa Mosa na pi mathu kecü ayyi tsü muyadha.

⁹ Mathu yyi na wa Aroer (Arnon Yyiketijü katen) nu yyiketijü non wi anyunutiwa tsü nu yikhami ketijü Medeba na wa Dibon kecu tsüdi kesaghu tsü kecu.

¹⁰ Tsüna wa Ammon kemeggü nu Heshbon wi kadisa kebenwa Amor nyi kadimi Sihon nyunutithu tsüdila saghu.

¹¹ Tsüna Gilead, Geshur, nu Maaka yegu, Hermon yikha tsüdi, nu Bashan tsüdi wala Saleka kecu saghu.

¹² Tsüna Astaroth nu Edrei wi kekhang kesenwa Refaim sakhenwa Og kadiyyi saghu. Mosa na anyi hathu chaya nu mathu jügüshia.

¹³ Isala Israel nyithu na Geshur nu Maaka nyithu njügüshi nu mathu na khili la Israel jawi hangben.

¹⁴ Mosa na ayyi keula pi Levi mizza ncü, Apvüwa na Mosa kekiza ti mathu na ahhansha sapi kekinyipen miwi mecang pi Apvüwa Israel Nyizawa kecü wi mathu shei mukeya tsü pi mathu keben-keyeng saden.

Ayyi pi Reuben mizza kecü

¹⁵ Mosa na ayyi pahan pi Reuben mizza theghithu cü nu pi mathu ji saya thsüdha.

¹⁶ Mathu yyi na wa Aroer (Arnon Yyiketijü katen) nu yyiketijü non wi anyunutiwa nu Medeba kevü wi yikhami ketijü tsüdi saghuben.

¹⁷ Tsüna Heshbon nu yikhami ketijü wi anyunutithu: Dibon, Bamoth Baal, Beth Baalmeon,

¹⁸ Jahaz, Kedemoth, Mefaath,

¹⁹ Kiriathaim, Sibma, Zereth Shahar Yyiketijü wi yyishiphon miwi kebenwa,

²⁰ Bethpeor, Pisga Yikha yyi kesüphi, nu Beth Jeshimoth tsüdi saghuben.

²¹ Tsüna yikhami ketijü wi anyunutithu nu Heshbon wi kekhang kesenwa Amor nyi kadimi Sihon kadiyyi mabenla saghu. Mosa na Sihon nu Midia nyi kekhang kesenthu chaya: Evi, Rekem, Zur, Hur, nu Reba. Mathu tsüdila kadimi Sihon yyi wi kekhang sengho.

²² Israel nyithu na pathi kesathu jawi tsüna tusen cüki kekhi nyi Beor tsawa Balaham la ben.

²³ Jordan na Reuben mizza kemeggü niduwa. Anyunutithu nu anyutithu ha pi Reuben mizza theghithu cü nu pi mathu ji saya thsüa.

Ayyi pi Gad Mizza Kecü

²⁴ Mosa na ayyi pahan pi Gad mizza theghithu la cü nu pi mathu ji saya thsüa.

²⁵ Mathu yyi na Jazer nu Gilead wi anyunuti tsüdi, Ammon kegishü pahan wala Rabbah na nishuwa Aroer kecu;

²⁶ mathu yyi na Heshbon wina wa Ramahth Mizpah nu Betonim, Mahanaim wina wa Lodebar kemeggü kecu.

²⁷ Jordan Yyiketijü wi tsüna Beth Haram, Betnnimra, Sukkoth, nu Zafon, Heshbon wi kadimi Sihon kadiyyi pahan saghuben. Mathu kemeggü niduwa na Jordan Ghaku na wa aghawa Galilee Ghajü kecu.

²⁸ Anyunutithu nu anyutithu ha pi Gad mizza theghithu cü nu pi mathu ji saya thsüa.

Ayyi Pi Manasseh Mizza Nishuwa Kecü

²⁹ Mosa na ayyi pahan pi Manasseh mizza kegishü pahan theghithu cü nu pi mathu ji saya thsüa.

³⁰ Mathu yyi na wa Mahanaim nu Bashan tsüdi saghu — Bashan wi kadimiwa Og kadiyyi maben, nu Bashan wi Jair nyu achentugho tsüdila.

³¹ Tsüna Gilead kegishü pahan nu Bashan wi Og kadiyyi wi ghazen nyunutithu Ashtaroth nu Edrei saghuben. Ha tsüdi pi Manasseh tsawa Makhir shicü gishü pahan theghithu cüa.

³² Hatinu Mosa ma Moab deshentijü wi keben wi Jerikho nu Jordan na nishuwa ayyi tsü pi gishü cüa.

³³ Isala Mosa na ayyi keula pi Levi mizza ncü. Ma mathu shei na ahhansha sapi Apvüwa Israel Nyizawa kecü wi mukeya tsüpi mathu keben-keyeng sabenle kiza.