JOSHUA 11 - Kemethajüh (N) (Re-editing) Bible (BSI)

Joshua na Jabin nu Ma kekiqathu Chakeya

¹ Israel khangkeya jühtheü na wa Hazor wi Jabin kadimiwa cukeya wi ma ajüh kesun pi Madon wi kadimi Jobab, Shimron nu Akhshaf wi kadimi keni,

² aghawa yyishiphon diyyi, Galilee Ghajü na acülawa Jordan yyiketijü, yyishiphon ccü, nu Dor kete tssükaten wi kadimithu wi chi.

³ Ma ajüh kesun pi Jordan ghapeli wi kebenthu Kanaan, Amor, Hitti, Periz, nu yyishiphon diyyiwa wi Jebus, Mizpah yyi wi Hermon Yikha ccü wi hang keten Hivi nyithu wi la chi.

⁴ Mathu na mathu süpahi tsüdi nu anyi kejon saghu ssigho aghüsa wi ahachan keji ti saben. Mathu na goru nu gorugari kejonla ben.

⁵ Kadimi hathu tsüdila mathu süpahithu saghuya nu ghola Israel ssikaghashen le Merom kuza wi kemnanpen saben.

⁶ Apvüwa na Joshua wi khi, “Mathu nmessila. Dhitsü wi hathansha wi hi Israel ghena mathu tsüdi pathi cüben. Nthu na mathu goruthu ccü pashü nu anni pi mathu gorugarithu tsü mecang cülo.”

⁷ Tsalina Joshua nu ma nyithu tsüdi wa Merom kuza wi zulila mathu ssikaghashen.

⁸ Apvüwa na mathu miwi khangkeya pi Israel nyithu cüa, Israel nyithu na mathu ssikaghashen nu mathu jügü wa aghawa Misrefoth Maim nu Sidon, nu nishuwa Mizpah yyiketijü kecu wi chia. Aghinyithu kesüla hangkeben chu ssikesali.

⁹ Apvüwa na kekhi ti Joshua na mathu miwi sachia. Ma mathu goruthu ccü pashü nu anni pi mathu gorugarithu mecang.

¹⁰ Tsaseng wi Joshua na kheneng wa Hazor nkaya nu ma kadimiwa pathia. (Tsü tsüwi Hazor na kadiyyi hathu tsüdi miwi kekhang ntsawa saben.)

¹¹ Mathu ciwi anyi tsüdi pi shü thsüa; anyi kesüla pi nhang thsüla nu anyunutiwa tsü la mecang.

¹² Joshua na anyunuti hathu nu kadimithu yaya, nu Apvüwa maghawa Mosa na kekhi ti anyi tsüdi pi shü thsüa.

¹³ Isala Joshua na Hazor mecang kesa tsü ketan khe Israel nyithu na ayyishiphon miwi anyunuti sa kethengthu kesütanla nmecang.

¹⁴ Israel nyithu na anyunuti hathu wi atsanqai menkedhu nu asahangthu khuya nu pi mathu ghena thengya. Isala mathu na anyi tsüdi pi shü thsüa; anyi kesüla pi nhang thsüla.

¹⁵ Apvüwa na ma yenkhukechithu pi ma maghawa Mosa cü, Mosa na tsüthu pi Joshua cü, nu Joshua na tsüthu nieya. Ma Apvüwa na Mosa kekiza tsüdila sa.

¹⁶ Joshua na ayyi aghawa nu acülawa wi lela yyishiphon diyyi, nu Jordan yyiketijü tsüdila yaya.

^17-18 Ayyi tsüna acülawa Edom kete Halak Yikha wina wala aghawa Hermon Yikha na acülawa Lebanon yyiketijü wi Baalgad kecu. Joshua na matsü kesiela hewi kadimithu ssinu aghisa, isala ma mathu tsüdi ghanya nu pi shü thsüa.

¹⁹ Israel nyithu ssinu kemehaiwa saya kesa Hivi nyithu pahan na hang keben nyunutiwa Gibeon ketan. Kepa wi tsüdila aghikesa wina nkaya shan.

²⁰ Mathu tsüdila nanketizen nmila pathi thsükhi nu yasatha sa thsüale kesalina Apvüwa na mathu ya Israel nyithu ssisa thsü. Hawa ha Apvüwa na Mosa wi kiza theng.

²¹ Ha tsü wi ha Joshua na wa kücanyithu Anakim le khi keten gei na yyishiphon diyyiwa wi hang kebenthu tsü yasa — Hebron, Debir, Anab, Judah nu Israel yyishiphon diyyi tsüdi wila. Joshua na mathu nu mathu nyunutithu yasatha sa.

²² Israel yyi wi Anakim nyi kesüla nmila; isala kezeng-u ketan Gaza, Gath, nu Ashdod wi ben.

²³ Apvüwa na Mosa kekiza ti Joshua na ayyi mabenla nkaya. Joshua na tsü pi Israel nyithu ji sala pi amizza kesüsü gishü cüa. Tsalina anyithu na aghi nsala mnanya.