JOSHUA 10 - Kemethajüh (N) (Re-editing) Bible (BSI)

Amor Nyithu Nyu Nchalakesa

¹ Jerusalem wi kadimiwa Adonizedek na Joshua na Jerikho nu ma kadimiwa miwi sa kechi ti Ai nkaya nu tsü yasatha sa nu ma kadimiwa la pathile kesa tsü zaya. Ma Gibeon nyithu na Israel nyithu ssinu keponghu sa nu mathu jawi hangbenle kesa la zaya.

² Jerusalem wi anyithu na ha ghena messi ntsa sa, kepaghenanye Gibeon na anyunuti kepathu miwi diki nu anyithu na aghi kemehaithu.

³ Tsalina Adonizedek na ketsijüh ha kesun pi Hebron wi Hoham kadimiwa, Jarmuth wi Piram kadimiwa, Lakhish wi Jafia kadimiwa, nu Eglon wi Debir kadimiwa wi chi:

⁴ “Shhughola hi kiqa nu Gibeon ssikaghashen lo, kepaghenanye ma nyithu na Joshua nu Israel nyithu ssinu keponghu sadha.”

⁵ Amor nyi kadimi manga, Jerusalem, Hebron, Jarmuth, Lakhish, nu Eglon kadimithu na mathu süpahithu saghuya nu wala Gibeon vüla ssikaghashen.

⁶ Gibeon nyithu na ajüh kesun pi Gilgal wi kemnanpen wi Joshua wi kiza, “Kediwa, no ithu nteshi lalo! Wan ghola ithu kiqa, nu ithu hangshayalo! yyishiphon diyyiwa wi Amor kadimithu tsüdila mathu süpahithu saghuya nu ithu ssikaghashen bendha le.”

⁷ Tsalina Joshua nu ma süpahizi kemehai ntsathu maben saghula Gilgal wina wa.

⁸ Apvüwa na Joshua wi khi, “Mathu nmessila. Hi khangkeya pi no cüdha. Mathu kesüla no shunya nben.”

⁹ Ghaja thangthang Joshua nu ma süpahizi na Gilgal wina alentsen sen nu Gibeon wi wa nu mathu na zulila Amor nyithu ssikaghashen.

¹⁰ Apvüwa na Amor nyithu sapi Israel süpahizi tuwi aghigheya wa thsüa. Israel nyithu na Gibeon wi mathu süthi nu Beth Horon yyikaghagu len wina mathu jügü sen wa acülawa Azekah nu Makkeda kecu mathu ssikaghashen.

¹¹ Amor nyithu na yyikaghagu wi Israel süpahizi tubvü keten wi Apvüwa na Azekah wi kewa len tsüdi wi aghayi kedi ca pi mathu miwi chi thsü. Israel nyithu na kepathi miwi aghayi ca pi kecenthi kesawa jia.

¹² Tsü ghanan Apvüwa na Israel nyithu yala Amor nyithu miwi khangya thsü, Joshua na Apvüwa ccüneng. Israel nyithu tuwi na ma khi, “Aghani, Gibeon kejentan wi ngan walo; Asha, Aijalon yyiketijü kejentan wi ngan walo.”

¹³ Mizzatentiwa na ma ghinyithu npi chakeya chu aghani na ngan wa, nu asha na apen nketsenla. Hawa ha Jashar Lesüshen wi zhütheng. Aghani na akulu mnon wi ngan wa nu ghanan thangthang ndula.

¹⁴ Apvüwa na anyi hhai kina kecü, tsü tuwi nu tsü seng wi lela ghanan kesüla hati npi sa. Apvüwa na Israel ghena aghisa le!

¹⁵ Tsaseng wi Joshua nu ma süpahizi na kheneng sen Gilgal wi kemnanpen wi wha.

Joshua na Amor nyi Kadimithu manga ghankeya

¹⁶ Isala Amor nyi kadimi manga na bvüsen wa Makkeda wi alonshiku wi kuthiben.

¹⁷ Anyi pahan na mathu muya nu mathu ciwi kuthiben le kesa pi Joshua kiza.

¹⁸ Ma khi, “Alon keti pahan kullu pi alonshiku kedulen witsü chilo. Anyi pahan pi ciwi hie thsü,

¹⁹ isala nthu ciwi n-nganla. Aghinyithu jügü wa asengwa na mathu ssikaghashen; mathu ya mathu nyunuti wi ndu thsüla. Apvüwa nthu Nyiza na mathu miwi khangkeya pi nthu cüdha. ”

²⁰ Joshua nu Israel nyithu na mathu süthi, isala pahan na bvü sen wa mathu nyunuti khweti ndukuwa du nu mathu pathi meyala.

²¹ Tsaseng wi Joshua nyi tsüdila mehaitsü kheneng sen kemnanpen Makkeda wi ma wi ghoa. Ayyi ciwi anyi kesüla ajühkhi pi Israel nyithu shun messia.

²² Tsaseng wi Joshua na khi, “Alonshiku wi kedulen tsü shah nu kadimithu manga tsü ssinu hi wi gholo.”

²³ Tsalina alonshiku wi kedulen tsü shah nu Jerusalem, Hebron, Jarmuth, Lakhish, nu Eglon kadimithu tsü ssigho,

²⁴ nu mathu ssisen Joshua wi gho. Joshua na Israel nyithu tsüdi cipi ma wi chi, nu kedithu ma gweghe kewathu ya gho mathu ccü pi kadimithu sun nnetenyalo kesa ahza khuchia. Mathu na gho tsüti saya.

²⁵ Joshua na ma kedithu wi khi, “Messi nyelela accükwenshü nsala. Lebenzü nu kempvüza sayalo, kepaghenanye Apvüwa na nthu ghinyithu tsüdi miwi hati saden.”

²⁶ Tsaseng wi Joshua na kadimithu pathi nu pi achanton manga miwi tügü nu mathu kamang na minulen kecu ciwi ben.

²⁷ Aghani kedulen wi Joshua na ahza khuchi nu mathu kamang tsü pie shaya nu pi hatuwi mathu kekuthi ben alonshiku witsü khalachia. Alon ketiti pi alonshiku kedulen witsü chia, nu tsüthu tsüna nansü kecu ciwi ben.

Joshua na Amor nyithu yyi Nka nengkeya

²⁸ Joshua na tsü ghanan Makkeda nu ma kadimiwa ssikaghashen nu ma ghanya. Ma anyunuti wi anyi tsüdi pi shü thsüa; anyi kesüla pi nhang thsüla.

²⁹ Ha seng wi Joshua nu ma süpahizi na Makkeda wina Libnahh wi wa tsü ssikaghashen.

³⁰ Apvüwa na Israel nyithu ya anyunuti ha nu ma kadimi miwi la khangya thsüa. Mathu na ciwi anyi kesüla nheila tsüdi pathia. Mathu na Jerikho wi kadimiwa miwi sakechi ti kadimiwa ha miwi la sachi.

³¹ Ha seng wi Joshua nu ma süpahizi na Libnah wina Lakhish wi wa nu tsü vüya nu ssikaghashen.

³² Apvüwa na aghikesa keni ghanan wi Israel nyithu yala Lakhish miwi khangya thsüa. Mathu na Libnah wi kekuli ti anyunuti wi anyi kesüla nheila tsüdi pathia.

³³ Gezer wi Horam kadimiwa na Lakhish kiqale gho, isala Joshua nu ma süpahizi na ma chaya nu mathu kesüla nhang thsüla pathia.

³⁴ Tsashi, Joshua nu ma süpahizi na Lakhish wina Eglon wi wa tsü vüya nu ssikaghashen.

³⁵ Mathu na tsü ghanan tsü nkaya nu mathu na Lakhish wi kesa ti anyi tsüdi pi shü thsüa.

³⁶ Ha seng wi, Joshua nu ma süpahizi na Eglon wina yyishiphon thu wi shu Hebron wi wa tsü ssikaghashen,

³⁷ nu tsü nkaya. Mathu na kadimiwa nu anyunuti nu tsü kevü anyunutithu wi anyi tsüdila pathia. Joshua na ma Eglon wi kesa ti anyunutiwa tsü yasatha sa. Ciwi anyi kesüla pi nhang thsüla.

³⁸ Tsaseng wi Joshua nu ma süpahizi na kheneng wa Debir ssikaghashen.

³⁹ Ma anyunuti tsüpi ma kadimi nu tsü kevü wi anyunutithu tsüdi wwala yaya. Mathu na anyi tsüdi pi shü thsüa. Joshua na ma Hebron nu Libnah nu ma kadimi miwi sa kechi ti Debir nu ma kadimiwa miwi la sachia.

⁴⁰ Joshua na ayyi mabenla nkaya. Ma yyishiphon diyyiwa, nishuwa yyi-kesüphi, niduwa yyishiphon ccü, nu acülawa diyyithu wi kadimithu tsüdila chaya. Ma thola nheila anyi tsüdi pathia. Hawa ha Apvüwa Israel Nyizawa na khichi ketheng.

⁴¹ Joshua na acülawa Kadesh Barnea wina wa Gaza, nu Goshen diyyi tsüdi, nu wa aghawa Gibeon kecu tsüdi chaya.

⁴² Joshua na kutitan na kadimi hathu nu mathu yyi tsüdi miwi khangya, kepaghenanye Apvüwa Israel Nyizawa na Israel ghena aghisa.

⁴³ Ha seng wi, Joshua nu ma süpahizi na kemnanpen Gilgal wi wha neng.