JOSHUA 1 - Kemethajüh (N) (Re-editing) Bible (BSI)

Anyiza na Joshua wala Kanaan Nkayalo Kekiza

¹ Apvüwa maghawa Mosa na keshü seng wi Apvüwa na Mosa kekiqawa Nun tsa Joshua wi kiza.

² Ma khi, “Imaghawa Mosa na shüdha. Khili, no nu Israel nyi tsüdila kidenya nu Jordan Ghaku pvüdhi sen nu hi ayyi pi mathu cü keben witsü walo.

³ Hi Mosa wi kekiza ti, nthu na wa keten yyi tsü maben pi no nu inyithu tsüdi cüdha.

⁴ Nthu ggü na acülawa yyikeshü na wala aghawa Lebanon Yikhathu kecu; nishuwa Eufrat Ghaku keti tsüna wala niduwa Hitti diyyiwa pvüdhi sen wa Mediterranean Tssükedone kecu saben.

⁵ Joshua, no hang keben chu anyi thola no chaya nben. Hi Mosa ssi kegho ti no la ssi benden. Hi keshüthangla no ssi benden; khiewila hi no teshia nben.

⁶ Lebenzü nu kempvüza sayalo, kepaghenanye no anyi hathu ccüli sa nu mathu na wala hi mathu bamyithu wi khishiketheng yyiwa tsü yaya ben.

⁷ Lebenzü nu kempvüza sayalo; nu imaghawa Mosa na Ayen pi no kecü tsü mabenla nie metsilo. Tsü kesüla n-niela nsala isathu no khiewa wa khe mehai yaben.

⁸ No kekinyi kesa wi keshüthangla Ayenwa lesüshen ha si metsilo. Ghanan le ghaja lela no tsü si nu ciwi zhüketheng tsüdila nie metsilo. Isalethu no mehai kayi nu mehai cenyaben.

⁹ Hi no lebenzü nu kempvüza sayalo kekiza tsü meshenyalo! Messi nu accükwenshü nsala, kepaghenanye hi Apvüwa n-Nyiza, no khiewa wa khe hi no ssiden.”

Joshua Na Ahza Pi Anyithu Kecü

¹⁰ Tsaseng wi Joshua na ahza pi accülikesathu cü,

¹¹ nu kemnanpen wi wala anyithu wi khi thsü, “Kedsakejjü pahan kiden-kesha yalo, kepaghenanye ghanan kecheng jüwi nthu na Jordan Ghaku pvüdhi wala Apvüwa nthu Nyiza na ayyi pi nthu cü keben tsü yayaden.”

¹² Joshua na Reuben, Gad mizzathu, nu Manasseh mizza kegishü pahan wi khi,

¹³ “Apvüwa maghawa Mosa na khati nthu wi Apvüwa nthu Nyiza na Jordan na nishuwa ayyi pi nthu keben pen sa thsü benle kiza khe tsü meshenchilo.

¹⁴ Nthu wubvüthu, tsangathu, nu nthu sahangthu pi hewi benla thsülo, isala nthu npvüzathu aghi kemehaithu tsüdila no Israel nyithu tuwi wa

¹⁵ nu mathu Jordan na niduwa Apvüwa nthu Nyiza na ayyi pi mathu cü ketheng tsü npi yakeya chu mathu kiqale kesalina. Khathansha wi Israel mizzathu tsüdi yazishu benya thsü khe, nthu na kheneng gho Jordan na nishuwa Apvüwa maghawa Mosa na pi nthu cü kethengwa nthu yyi wi ha hang waya mehai.”

¹⁶ Mathu na Joshua wi khineng, “Ithu na no kekhi tsüti saben, nu no ithu kesun pi khiewa chi khe waben.

¹⁷ Ithu na keshüthangla Mosa jüh kekina tsüti njüh kinaben, nu Apvüwa n-Nyiza Mosa ssi keghowa na no ssiben ketenwa salo!

¹⁸ Anyi thowa na no kekhangjüh kekhi nyelela no ahza khukechi tsü n-niela khe pi shü thsüaben. Lebenzü nu kempvüza sayalo!”