JONA 4 - Kemethajüh (N) (Re-editing) Bible (BSI)

Jonah Lebenketsu nu Anyiza Nanketizen

¹ Jonah na ha cüki ghena anonghe meya nu aghepvü wa.

² Tsalina ma kekhie sa, “Apvüwa, hi ajjen npi keteshi wina no hati saaben le kesa nkhi kwe? Tsalina hi apiketsü sa nu Spain wi bvü wale sa! No kaghali nu nanketizen Nyiza, keshüthangla lebensie, ccatssü, nu keshüthangla no kemeshen kemili nu nyu meten ncü laten kesa hi chüben.

³ Tsalina Apvüwa, hi ya khili shü thsülo. Hi hang keben miwi shü kesawa mehaidha.”

⁴ Apvüwa na luneng, “No aghepvüya kemehai kemeshon mangwa ben nu?”

⁵ Jonah na anyunuti nishuwa shhula donki wa. Ma ketanla ma ghena akekhwen kesü sa nu tsü kekhwen wi donki nu Nineve miwi mangwa saaten khe ghang le hieben.

⁶ Tsaseng wi Apvüwa Anyiza na aghang kesü sapi Jonah miwi shigü gho thsü nu ma kekhwen pahan sa cü, isanu ma nonkwen pfüya thsüle kesalina. Jonah na aghang tsüwa ghena ma nen ntsa sa.

⁷ Isala dhitsüwa tsantheghi wi Anyiza jühkhukechi wina pala ghei kesü na aghang tsü dsa nu tsüna shü.

⁸ Aghani keshhugho seng wi Anyiza na nishuwa ameghü kisa kesun chi, nu Jonah na aghani kisa na ma li thsü kechi wi ma shüca le wa. Tsalina ma shü kesawa nen wa nu ma khi, “Hi hang keben miwi shü kesawa mehaidha.”

⁹ Isala Anyiza na ma wi khi, “No aghang tsüwa ghena lebentsuya kemehai kemeshon mangwa ben nu?” Jonah na luneng, “Hi ilebentsuya kemehai jjügi na ben, lebentsu pi shüya kemehai na ben le!”

¹⁰ Apvüwa na ma wi khi, “Aghang hawa ha ghaja kesü jü shigü shagha nu dhitsüwa wi nmiladha; no tsü ghena mangla sa nchi nu no tsü sapi shigü nthsü, isala no tsü ghena ahathana ben le!

¹¹ Isalethu hi anyunuti ketiwa Nineve ghena khacu nantizen chi nu! Tsüdi miwila, ciwi ghanyithu mangla nkechü anyi 120,000 nu asahangthu kejon la keben na!”