JONA 3 - Kemethajüh (N) (Re-editing) Bible (BSI)

Jonah na Apvüwa Jühkekina

¹ Apvüwa na kheneng kuti Jonah ccüneng.

² Ma khi, “Anyunuti ketiwa Nineve witsü walo, nu hi pi no kecü ketsijüh tsüpi anyithu wi kizalo.”

³ Tsalina Jonah na Apvüwa jühkina nu Nineve witsü wa, anyunuti tsüna di ntsa kesa ghena ghanan kecheng alentsen nu tsü pvüdhi.

⁴ Jonah na anyunuti non wi pvüdhi wa, nu ghanan thangthang alenketsen seng wi ma thangchi, “Ghanan jügha jüwi Nineve ha yasa tendha!”

⁵ Nineve nyithu na Anyiza ketsijühwa tsü nondiya. Tsalina mathu tsüdila kezi sa, nu anyi tsüdi kedi ntsawa na wa kizza ntsawa kecu tsüdila leben khapeghe yadha le kesa aleshithsü mphi pi ccüca le kesa südheya.

⁶ Khathansha wi Nineve wi kadimiwa na tsü cüki zaya khe, ma kadipen wina shagha ma gwomejuwa kaghazu tsü khushi nu aleshithsü pvüya nu ayyinikhu miwi donki.

⁷ Ma thangkechijüh kesü kesun pi Nineve nyithu wi chi, “Hawa ha kadimiwa nu ma kekhu wi kedithu wina ahza kesü: Thola mangla dsajjü nben; anyi, amesüsi, nu khaghaneni tsüdila dsajjü thsü nben.

⁸ Anyithu nu asahangthu tsüdila aleshithsü npvüthu yishü. Anyi tsüdila ma gheshighena yencüki nu kekuli nkemehaithu tsü teshi nu leben tsentsa sala Anyiza wi kekhie nsathu yishü.

⁹ Anyiza na ma kemeshen kemili nu ma leben ntsula; nu ithu pi nshü thsülala mechü le!”

¹⁰ Anyiza na mathu kekuli tsü muya; mathu na mathu gheshighena yencüki teshi kesa ma muya. Tsalina ma ma kemeshen kemili nu ma mathu meten cüten le khi ketheng tsü nsala.