JONA 1 - Kemethajüh (N) (Re-editing) Bible (BSI)

Jonah na Apvüwa Jüh-nkekina

¹ Ghanan kesü wi Apvüwa na Amittai tsawa Jonah ccüneng.

² Ma khi, “Anyunuti ketiwa Nineve wi katsü walo, nu ajühkhi pi tsü matanglo; ma nyithu na khatila gheshighena khe hi chüben.”

³ Isala Jonah na Apvüwa tuwi na bvüale kesalina ma alen hatheneng wiwa wa. Ma Joppa wi wa, ma ciwi ahunjjen kesü na Spain wi wale keben muya. Ma ma kepvü men pi cü nu Apvüwa wina bvüsen Spain wi wale kesa ghena ahunjjen wi kebenthu gweghe duya.

⁴ Isala Apvüwa na ameghü kekhang kesun pi atssükedone miwi chi, nu caghamo na khang ntsa kesalina ahunjjenwa tsüna pasaya kemehai kemessi wi ben.

⁵ Ciwi wa ketenthu tsüdila qhethiketen nu kesüsü tsüdila maghala ma cenpvü wi kekiqa khie wa. Tsaseng wi kemessi sapi zengle kesalina mathu na atsanqaithu pi ameiwi thenshi. Tsüti sa keben wi Jonah na ahunjjen nduku wi cüla accügwen wi jenchi ntsa saben.

⁶ Ahunjjen wi kediwa na ma ciwi keben muya nu ma wi khi, “No mangkesa na jen ben nu? Shagha nu ncenpvü wi kekiqa khielo. Ma ithu nantizen nu ithu kahang heisha cüla mechü na.”

⁷ Ahunjjen wi wa ketenthu na khokho wi khi, “Ithu na akezenwe nu ithu na kemessi wi ben kesa ha pi thowa kemeshensa-u khe chüya na.” Mathu na tsüti sa nu Jonah nyan zanya.

⁸ Tsalina mathu na ma wi keü, “Isathu khili pi ithu kizalo! Ha pi thowa kemeshensa-u nu? No hewi mangwa saben nu? No mang diyyi wina gho nu? No mang nyi nu?”

⁹ Jonah na luneng, “Hi Ibri nyi kesü. Hi Apvüwa, tangwi kebenwa Anyiza, ayyi nu atssükedone sakechiwa tsü kinyiden.”

¹⁰ Jonah na tsü miwi ma Apvüwa tuwi na bvü wa keten cüki khipi mathu kiza. Ahunjjen wi wa ketenthu na qhethiketen nu ma wi khi, “Tsüna kuli kemessi ntsa kesüle!

¹¹ Caghamo na nmehai pfüpfü shagha, tsalina mathu na ma wi keü, “Caghamo ha khenle kesalina ithu na nmiwi mangwa nsathu yishü nu?”

¹² Jonah na luneng, “Hi pi atssükedone wi khala chilo, isalethu tsüna ceen sa shaben. Nthu na caghamo kemessi wi ben kesa hana hi kesazzi le kesa hi chüben.”

¹³ Tsüti kesawa nyela ahunjjen wi wa ketenthu na ahunjjenwa tsü zung pi aghüsa wi chiale kesa mathu na aghechen ntsa sa. Isala caghamo na khang pfüpfü saya nu mathu na khiela wakeya nmila.

¹⁴ Tsalina mathu na Apvüwa wi khie, “O Apvüwa, anyi hawa kahangli khukeya ghena keshü pi ithu nmeten lalo! O Apvüwa, ha tsüdila nmiwi, ha no kekuli”

¹⁵ Tsaseng wi mathu na Jonah ghangya nu pi atssükedone non wi khala chia, nu tsü meyi ceen sa.

¹⁶ Hawa ha ahunjjen wi wa ketenthu sapi Apvüwa messi ntsa sa thsü nu mathu na ahhansha sapi ma cü nu ma kekuli sale kesa khishi chia.

¹⁷ Apvüwa jühkhukechi wina anga keti kesü shhugho Jonah meyiya, nu ma anga tsü pvü non wi ghanan kecheng nu ghaja kecheng ben wa.