JOHAN 9 - Kemethajüh (N) (Re-editing) Bible (BSI)

Jisu na Anyon nkemu pvüghakeyawa sa pi Mehaikecü

¹ Jisu na kegoe wala anyon nkemu nyi pvüghakeya nyi kesü metuya.

² Ciwi ma sansikeyathu na ma wi keü, “Kesansiwa, anyi hawa ha thowa kesami ghena ma nyon nkemu pvüghaya nu? Ma kesami la ma bajja kesami ghena nu?”

³ Jisu na luneng, “Ma nyon nkemu ha ma nu ma bajja kesami ghena la nye, isala ma wina Anyiza kekhang na kuli keben pi muya thsüle kesalina.

⁴ Aghanan sa keben jüwi ithu na hi kesun kechiwa kekuli tsü nsathu yishü; thola mangla kuli nkeya tsü aghaja tsüna ghoa tendha.

⁵ Hi ayyi ha wi keben chu, ‘Hi ayyi kewegüwa.’ ”

⁶ Jisu na ajüh ha kekhi seng wi ayyi wi meshhusha chi nu amieceng pi anisha pahan saghuya; nu ma tsü pi anyi tsüwa nyon nyenchi,

⁷ nu ma wi khi, “No wala Siloam (ma jjügi Kesunkechi) cüceng wi n-mmi miyalo.” Tsalina anyi tsüwa na wa ma mmi miya meyi pala muya nu kheneng gho.

⁸ Isanan ma jenphonthu nu kheni anyi ma kuwhe keten kemuthu na keü, “Anyi hawa ha kheni donki nu kuwhe ketenwa tsü nye kwe?”

⁹ Pahan na “Hawa ha tsüle,” isala kepathu na “Nyele, hawa ha ma ti kesa le,” tsüti khi. Tsalina anyi tsüwa na ma ketanla “Hi anyi tsüwa tsüle,” khi.

¹⁰ Mathu na ma wi keü, “Isathu, no khati nu pala mu nengya nu?”

¹¹ Ma luneng, “Anyi kesü Jisu kesawa tsüna anisha saya nu pi inyon nyenchi cü nu hi wala Siloam wi immi miyalo kizale. Tsalina hi wa immi miya meyi pala muya le!”

¹² Mathu na ma wi “Ma khiewa ben nu?” keü. Ma luneng, “Hi nchüle.”

Farisithu na Mehaikeya Jjügi kepili

¹³ Tsaseng wi mathu na kheni anyi ma nyon nmula ketenwa tsü ssinu Farisithu wi gho.

¹⁴ Jisu na anisha saya nu pi ma nyon nkemu sa pi mehai kecü tsüna Sabbath tsathang wi sa.

¹⁵ Farisithu na kheneng ma khati nu pala muya khe keü. Ma mathu wi kiza, “Ma anisha pahan pi inyon nyenchi cü; hi wala immi miya nan khili pala muyadha.”

¹⁶ Farisithu pahan na khi, “Anyi ha sa pi mehai kecüwa hana Anyiza wina kegho sa nben, kepaghenanye ma Sabbath tsathang yenwa tsü nie nten.” Isala kepathu na khi, “Khati nu kesami nyi kesü amankesa hathu ha saya mehai nu?” Tsalina mathu jawi ajüh kepapa sa.

¹⁷ Tsalina Farisithu na kheneng kuti anyi tsüwa wi keü, “No ma n-nyon nkemu sa pi mehai cüle khiben — isalethu, no ma pi thowa le khiten nu?” Anyi tsüna luneng, “Ma atusenjüh-kechü kesü le!”

¹⁸ Isala Judah nyi kekhang kesenthu na anyi tsüwa bajja npi cisen kegho chu ma ma nyon nmula keten muyale kesa tsü n-nondi mvu,

¹⁹ nu manyi wi keü, “Ha nshinyi tsa ma nyon nmula pvüghakeyawa tsü kwe? Isathu, ma khili khati nu pala muya nu?”

²⁰ Anyi tsüwa bajja na luneng, “Ma ishinyi tsa ma nyon nkemu pvüghaya kesa tsü ishinyi na chüben.

²¹ Isala ma khili khati nu pala muya khe ishinyi na nchü nyelela thowa na ma nyon nkemu sa pi mehai cü khe ishinyi na nchü. Ma keü nanlo, ma anyi keqhai sadha ma ketanla ma cüki khiya mehai le!”

²² Anyi tsüwa bajja na Judah nyi kekhang kesenthu kemessi ghena ajüh hati khi, kepaghenanye Judah nyithu na anyi thowa na Jisu pi Khrista le khiten khe Sinagog wina jügüshiaben kesa centheng.

²³ Tsalina ma bajja na “Ma anyi keqhai sadha, ma keü nanlo,” tsüti khia.

²⁴ Keni tughuwa la mathu na anyi ma nyon nkemu pvüghakeyawa tsü cichi nu ma wi khi, “Anyiza tuwi no atsentsawa khiben kesa kishenlo! Anyi no sa pi mehai kecüwa tsüna kesami nyi kesü kesa ikhang na chüben”

²⁵ Anyi tsüwa na luneng, “Ma kesami nyi kesü la nye khe hi nchü. Isala hi pala kesü chüben, hi inyon nmula keten nan hi khili pala muyadha.”

²⁶ Mathu na ma wi keü, “Ma nghena mangwa sachi cü nu? Ma khati nu n-nyon nkemu tsü sa pi mehai cü nu?”

²⁷ Ma luneng, “Hi nthu kizadha, isala nthu na nkina. Nthu mangkesa na tsü kina neng mvuben nu? Nthu la ma sansikeyathu saya mvu benla? ”

²⁸ Mathu na ma kimenni nu khi, “No anyi tsüwa sansikeya nyi, isala ikhang tsü Mosa sansikeyathu.

²⁹ Anyiza na Mosa ccünengle kesa ikhang na chüben; isala anyi hawa tsü khie wina gho khe ikhang na nchüle!”

³⁰ Anyi tsüwa na luneng, “Ha amankesadha man! Nthu na ma khie wina gho khe nchü, isala ma inyon nkemu sa pi mehai cüdha le!

³¹ Anyiza na kesami nyi hhai kina nten; isala thothu na Anyiza kinyikü nu ma kenenwa tsü saten khe Anyiza na anyi tsüthu hhai kinaten kesa ithu na chüben;

³² Hang tegü wina anyi kesü la anyon nkemu kepvügha nyi sa pi pala muya thsüle kesa khie wi la npi zaya.

³³ Keujüla anyi hawa ha Anyiza wina kegho nye lethu ma hati saya nkesa le!”

³⁴ Mathu na luneng, “No kesami wina pvüghaya nu shagha benthu, no ikhang sansile ben kwe?” Isanu mathu na Sinagog wi ma jügüshia.

Aghamulen wi Anyon Nkemu

³⁵ Jisu na mathu anyi tsüwa jügüshidha le kesa zaya; ma wa anyi tsüwa muya nu keü, “No Anyi Tsawa tsü nondiben ma?”

³⁶ Anyi tsüwa na luneng, “Kediwa, ma thowa khe pi hi kiza nu hi la ma nondiya thsülo!”

³⁷ Jisu na ma wi khi, “No ma muyadha, tsüna no khili ma ssinu keccünengli kebenwa tsü le!

³⁸ Anyi tsüwa na khi, “Apvüwa, hi nondiben,” isanu ma Jisu tuwi kukedua.

³⁹ Jisu na khi, “Hi anyi kemehai keteshü ghan-nan le ayyi ha wi gho, isanu anyon nkemuthu yala muya thsü, nu mu kebenthu ya nmu thsü lale kesalina.”

⁴⁰ Farisithu ciwi kebenthu pahan na ma ha kekhi zaya nu ma wi keü, “No ikhang la pi anyon nkemu nyi sa nben she?”

⁴¹ Jisu na mathu luneng, “Keujüla nthu na anyon nmu lethu, nthu na sami nkesa; isala nthu na pala mu benle kekhi ghena nthu na khili la samiben.”