JOHAN 6 - Kemethajüh (N) (Re-editing) Bible (BSI)

Jisu na Anyi Hazar Manga Ghanja kecü

¹ Tsaseng wi Jisu na Galilee Ghajü (nyelela Tiberia Ghajü) tsü pvüdhi wa.

² Anyitenti keti na ma nie wa, kepaghenanye mathu na ma kesakinaathu sa pi mehai kecü azensu tsü muyadha.

³ Jisu na ayikha kesü wi kila ma sansikeyathu gweghe donki wa.

⁴ Tsüna Shhukeya Kho kesa tsü cu wadha.

⁵ Jisu na ghangkevüli chi nan anyitenti keti kesü ma wi gho keten muya nu ma Filip wi keü, “Ikhang na khiewa amesa shei pi anyi hathu ha ghanjaya ben nu?”

⁶ (Ma mangwa saten khe chüben lela ma Filip ghan-nan le kesalina ha khichi.)

⁷ Filip na luneng, “Akutimen meza keni miwi pi amesa shei lela mathu meshu kesüsü wi kezengzeng ketan gishü yaben.”

⁸ Ma sansikeyathu meshu kesü Simon Pitor cünyuwa Andria na ma wi kiza,

⁹ “Hewi pvüzanyi kesü na achentha mesa be manga nu anga aben keni benle! Isala anyi hajuju jawi ha ketan ha pi khati saya nu?”

¹⁰ Jisu na mathu wi kiza, “Anyithu yala donki wa thsülo.” (Apen ciwi aghang kejon na ben.) Tsalina anyi hazar manga-u tsüdila ciwi donkiya.

¹¹ Tsaseng wi Jisu na amesa khuya nu Anyiza keseng kekhie sachi, nu tsü pi anyi ciwi donki kebenthu wi gishü chi. Ma anga la sen nu tsü makesü sachi, nu mathu tsüdila kedsa mvu chu dsaya.

¹² Mathu tsüdila anonkwen keya seng wi ma ma sansikeyathu wi khi, “Kesütanla meyasa thsüle kesalina kedsatuthu tsü saghuyalo.”

¹³ Tsalina mathu na tsüdila saghuya, anyithu na achentha mesa be manga tsü kedsatu na ashijü taghakeni saghuya.

¹⁴ Anyithu na Jisu amankesa kulikechithu tsü muya nu khi, “Ntsakhiwa, hawa ha atusenjüh-kechüwa ayyi wi ghoten le kesawa tsü le!”

¹⁵ Jisu na mathu mataghang ma ghan pila Kadimi sa thsüle keben tsü chüya, tsalina ma kheneng ma ketanla ayikha wi wa.

Jisu na Atssü miwi Alenketsen

¹⁶ Minu kagha wi Jisu sansikeyathu na aghajü wi cü,

¹⁷ nu ahun kesü non wi duya nu aghajü pvüdhi sen nu Kapernaum kejentan wi wa. Atsajang wadha, isala Jisu na mathu wi npi gho.

¹⁸ Tsü tsüwi ameghü sho ntsa kesalina atssü mo kuli shagha.

¹⁹ Sansikeyathu na ahun wina kilometer manga tugho wa kesa wi Jisu na atssü miwi alentsen sen nu mathu hun tetsaki gho keten muya nu mathu qhethiketen sa.

²⁰ Isala Jisu na mathu wi khi, “Hi le, nmessi lalo!”

²¹ Tsaseng wi mathu na Jisu ya mathu hun wi dugho thsü mvu sa, isameyi ahun na wala mathu na wale keben penwa tsü cuya.

Anyithu na Jisu Kebha

²² Dhitsüwa wi anyitenti aghajü na khakawa ben wa kesathu na ciwi ahun kesütan keben muya. Mathu Jisu na ma sansikeyathu gweghe ahun wi ndu, isala ma sansikeyathu ketan wa kesa chüya.

²³ Tiberia wi ahun kepathu na Apvüwa na Anyiza keseng kekhie sachi nu amesa pi anyitenti gishü kedsa pen tsü tetsaki wi gho.

²⁴ Anyitenti na Jisu nu ma sansikeyathu la ciwi nkebenla mukeya wi mathu na ahun tsüthu wi duya nu ma bha wa.

Jisu na Kahang Mesawa

²⁵ Anyithu na aghajü khhakawa Jisu muya nu mathu na ma wi keü, “Kesansiwa, no kusi hewi ghodha nu?”

²⁶ Jisu luneng, “Hi atsentsawa nthu kizaden: nthu na hi azensuthu sa kechi tsü jjügi chükeya ghena nyela amesa dsa pi nthu pvü nmakeya ghena hi bhaden.

²⁷ Dedia keten tsse ha bha pi ketizen nsa lalo, isala anuphan kahang ben keten tssewa ghena kuli yalo. Atsse hawa ha Anyi Tsawa na pi nthu cüden, kepaghenanye Abawa Anyiza na ma kessikeya pi ma miwi jenkidha.”

²⁸ Tsalina mathu na ma wi keü, “Ikhang Anyiza kekuliwa tsü sale kesa ghena mangwa nsathu yishü nu?”

²⁹ Jisu na luneng, “Anyiza na nthu ya sa thsü mvu kebenwa tsüna nthu ya ma kesun kechiwa tsü nondi yalo kesa.”

³⁰ Mathu na luneng, “Ikhang na muya nu no nondiyale kesalina no azensu mangwa sachiten nu? No khati kuliten nu?

³¹ Ithu bamyithu na kheni ayyikeshü wi manna dsale kesa Ntsawajüh wi zhü ketheng na ‘Ma tangwina amesa pi mathu dsa thsü.’ ”

³² Jisu na mathu wi khi, “Hi atsentsawa nthu kizaden: Mosa na amesa pi nthu kecü tsüna tang wi mesa nye; hawa ha iBa na tang wi mesa tsentsawa pi nthu cüle.

³³ Kepaghenanye Anyiza na khukechi amesa tsüna tang wina kedughowa ha kahang pi ayyi nyithu cüden.”

³⁴ Mathu na ma wi khie, “Kediwa, keshüthangla amesa ha pi ikhang cülo.”

³⁵ Jisu na mathu wi kiza, “Hi kahang mesawa tsü, thowa na hi wi gho khe ma khiela ghama meyacha; nu thowa na hi nonditen khe ma khiela dighe meyacha.

³⁶ Hi khili nthu kizadha, nthu na hi muyadha isala hi nondiya nten.

³⁷ IBa pi hi kecüthu tsüdila hi wi ghoden. Nu thowa na hi wi gho khe hi khiela ma teshi meyacha,

³⁸ kepaghenanye hi tang wina dugho hi kenenwa sale kesa nyela hi kesun kechiwa kenen sale kesa ghena gho.

³⁹ Nu hi kesun kechiwa kenen tsüna hi ya ma pi hi kecüthu tsü kesü la pi nbhatagha thsüla wa asakhen ghanan wi tsüthu tsüdila zanki pi kahang wi chicülo kesalina.

⁴⁰ Kepaghenanye hawa ha iBa kenenwa: Atsawa muya nu ma nondi keyathu tsüdila anuphan kahang benyaden, nu hi asakhen tsathang wi mathu zanki pi kahang wi chiyaden.”

⁴¹ Kepaghenanye ma “Hi tang wina kedugho amesawa le” kekhi ghena anyithu na nbvümugho wa.

⁴² Tsalina mathu kekhi na, “Ha Josef tsawa ithu na ma ba nu ma jja lela chü kebenwa tsü nye kwe? Isathu ma khili khati nu ‘Hi tang wina kedugho amesawa tsü le’ khiya mehai nu?”

⁴³ Jisu na luneng, “Nthu jawi nbvümugho nsa lalo.

⁴⁴ Anyi kesütan la hi kesun kechiwa Abawa na ma ssi nkegho tsü hi wi ghoya nben, nu hi asakhen tsathang wi ma zanki pi kahang wi chi cüaben.

⁴⁵ Atusenjüh-kechüthu na zhütheng, ‘Anyiza na mathu tsüdi sansi cüben.’ Abawa jüh kina nu ma wi chükeyathu tsüdila hi wi ghoben.

⁴⁶ Anyiza wina keghowa ma ketan khe thola Abawa tsü npi mu, isala ma ketan Abawa tsü muyadha.

⁴⁷ Hi atsentsawa nthu kizaden: kesü le kesü lela nondi ketenwa na anuphan kahang bendha.

⁴⁸ Hi kahang mesawa.

⁴⁹ Kheni nthu bamyithu na ayyikeshü wi manna dsa, isala shüdha.

⁵⁰ Isala amesa hawa ha tang wina kedugho anyi na dsa nu shü nketenwa tsü.

⁵¹ Hi tang wina kedugho mesawa tsü. Anyi thowa na amesa ha dsaya khe ma anuphan hang benden. Ayyi nyi yala kahang benya thsüle kesa ghena hi khuchi ketenwa tsüna isa.”

⁵² Ha ghena Judah nyithu jawi aghepvü nu keccücanli shagha. Mathu khi, “Anyi hawa ha khati nu ma sa pi ithu dsa thsüya mehai nu?”

⁵³ Jisu na mathu wi khi, “Hi atsentsawa nthu kizaden: keujüla nthu na Anyi Tsawa sa dsa nu ma jjü jjü nkesa tsü nthu miwi kahang nmi.

⁵⁴ Anyi thowa na isa dsa nu ijjü jjüten khe anuphan kahang bendha, nu hi asakhen tsathang wi ma zanki pi kahang wi chi cüaben.

⁵⁵ Kepaghenanye isa na kedsa tsse ntsawa nu ijjü na kejjü tssü ntsawa.

⁵⁶ Thowa na isa dsa nu ijjü jjüten khe ma hi wi hangben nu hi ma wi hangben.

⁵⁷ Hangkeben Abawa na hi kesunchi, nu hi la ma ghena hangben. Tsü makesü anyi thowa na isa dsa ten khe ma la ighena hang yaben.

⁵⁸ Tsalina amesa hawa ha tang wina kedugho, kheni nthu bamyithu na dsa nu shü kesawa tsüti nye. Thowa na amesa ha dsaya khe anuphan hang benben.”

⁵⁹ Jisu na Kapernaum wi Sinagog wi nyu sansi keben wi ha khichi.

Anuphan kahang Jühthu

⁶⁰ Ma senkeniethu kejonla ha za nu khi, “Kesansi jüh hawa ha dhu mtsü. Thowa na ha kinaya mehai nu?”

⁶¹ Isala Jisu na ma ketanla ma senkeniethu na ajüh hawa ghena kicennali keben chüya nu ma mathu wi keü, “Ajüh hawa ha nthu leben sameshü kwe?

⁶² Isathu, keujüla nthu na Anyi Tsawa na ma kheni pen wi ki neng keten muya lethu khati saben nu?

⁶³ Kahang khuchi ketenwa tsüna Aghamu; asajjü hana mangla sa keya nmi. Hi nthu wi kekhi jüh tsüna Anyiza kahang khuchi keten Ghamu.

⁶⁴ Isala nthu pahan na n-nondi.” (Jisu na aghatsan wina thowa na ma nondi nben nu ma matsa kebenwa tsü chüben.)

⁶⁵ Nu ma hati khi, “Ha jjügi ghena hi nthu kizadha, meshu kesütanla Abawa na kekhang pi ma nkecü tsü hi wi ghoya nben.”

⁶⁶ Ha ghena ma senkeniethu kejonla kheneng bvü nu ma n-niela.

⁶⁷ Tsalina ma sansikeyathu taghakeni wi keü, “Nthu la hi teshi bvü mvuben kwe?”

⁶⁸ Simon Pitor na ma luneng, “Apvüwa, ikhang no teshi nu thowa wi wa nu? No anuphan kahang jühthu tsü ben.

⁶⁹ No Anyiza wina kegho Kemethawa tsü kesa ikhang na nondi nu chütiben.”

⁷⁰ Jisu na luneng, “Hi nthu Taghakeni ha kessi meya kwe? Isala nthu jawi meshu kesü na atsaghang le!”

⁷¹ Tsüna ma Simon Iskariot tsawa Judah cüki tsü khiben. Kepaghenanye Judah na Taghakeni jawi meshu kesü lela ma Jisu matsa.