JOHAN 5 - Kemethajüh (N) (Re-editing) Bible (BSI)

Acüceng kete wi kesakinaa sa pi Mehaikecü

¹ Tsaseng wi Judah nyithu na akho kesü keben ghena Jisu la Jerusalem wi wa.

² Jerusalem wi khaghaneni Khweti-jenka kete wi acüceng kesü kete wi acatu manga keben tsü pi Ibri jüh wina Bethzatha le khiden.

³ Acatu tsüthu wi kesakinaa, anyon nkemu, accü nkemehai, nu kecügüshü nyi kejon na pong ben. Mathu atssü na kulikeshhugho tsü hieden,

⁴ kepaghenanye matsütsü wi Apvüwa nyilo na aghajü witsü dughola atssü pakethu chiden. Kesakinaa nyi atuwa sala atssü pakethu keben wi du keyawa na ma kesakinaa katsüha lela sa pi mehaiyaden.

⁵ Ciwi amapi changha nu tazen kinaa nyi kesü na ben.

⁶ Ma ciwi jen keben Jisu na ma muya nu ma matsü kesiela naa wadhale kesa chüya. Tsalina Jisu na ma wi keü, “No mehaiya mvuben ma?”

⁷ Kesakinaawa na luneng, “Kediwa, hi thola ikete wi ben nu atssü na pakethu shhughothu hi pi aghajü wi cüchi kecü nyi nmi. Hi ketanla dule keben wi nyu na ituwina duten le!”

⁸ Jisu na ma wi khi, “Shagha nwekeshiphi pieya nu alentsen walo.”

⁹ Tsümeyi anyi tsüna mehaiya nu shagha ma wekeshiphi pieya nu alentsen wa. Hati kesa hana Sabbath tsathang wi,

¹⁰ tsalina Judah nyi kekhang kesenthu na anyi mehai keyawa wi kiza, “Hawa ha Sabbath tsathang ghena nwekeshiphi pienu keten ayen nmile.”

¹¹ Ma luneng, “Anyi hi sa pi mehai kecüwa na hi iwekeshiphi pieya nu alentsen walo kizale!”

¹² Mathu na ma wi keü, “Nwekeshiphi pieya nu alentsen walo kekhiwa tsüna thowa nu?”

¹³ Isala mehai keyawa na ma Jisu tsüna thowa khe nchü la, kepaghenanye apen ciwi anyitenti na ben, nu Jisu na nyu jawi chhen bvüdha.

¹⁴ Tsaseng wi Jisu na Kekinyijjen wi ma muya nu ma wi kiza, “Kinalo, no mehai yadha; tsalina nkemehai nmiwi ngho neng thsüle kesalina no nsami neng lalo.”

¹⁵ Tsaseng wi anyi tsüwa na wala Judah nyi kekhang kesenthu wi ma sa pi mehai kecüwa tsüna Jisu le kiza.

¹⁶ Tsalina mathu na Jisu metenmesha le shagha, kepaghenanye ma Sabbath tsathang wi nyu sa pi mehai kecü ha kulichi.

¹⁷ Jisu na mathu wi kiza, “IBa na khili la kuliben, nu hi la kuli nbenthu yishü.”

¹⁸ Ha kekhi ghena Judah nyi kekhang kesenthu na ma pathiale bha, kepaghenanye Jisu na Sabbath tsathang yen kepakhhi ketan nye, isala ma Anyiza pi ma Ba le khinu ma ketanla ma pi Anyiza meceqe satenle khi.

Atsawa kekhang keben

¹⁹ Tsalina Jisu mathu wi khi, “Hi atsentsawa nthu kizaden: Atsawa na ma kemeshen wina mangla kuli nten, isala ma Abawa kekuli kemu wi ketan kuliden. Kepaghenanye ma mangwa kuli khe Atsawa la tsüti kuliden.

²⁰ Kepaghenanye Abawa na Atsawa tizenghali den, nu ma kuli keben tsüdila pi ma ccücaden. Ma hathu miwi la kekuli ketiki pi ma ccücaben, nu nthu tsüdila amansa ben.

²¹ Abawa na keshüthu sa pi shagha thsü nu kahang pi mathu kecü tsü makesü Atsawa la kahang pi ma pi cü mvu kebenthu cüden.

²² Abawa na anyi kesütanla ghan-nan nten, isala ghanya kemehai kemeshon tsüdi pi Atsawa cüdha.

²³ Tsalina tsüdila Abawa kinyikü keten tsüti Atsawa la kinyiküden. Thowa na Atsawa kinyiküten khe ma kesun kechiwa Abawa la kinyiküden.

²⁴ “Hi atsentsawa nthu kizaden: thowa na ijüh kina nu hi kesun kechiwa nondiya khe anuphan kahang bendha. Ma ghan-nan nbendha, isala keshü wina kahang wi shhugho yadha.

²⁵ Hi atsentsawa nthu kizaden: matsü na ghoden, nu khili ha ghodha— keshüthu na Anyiza Tsawa hhai zayaben, nu tsü zakeyathu na kahang wi ghoyaben.

²⁶ Kepaghenanye Abawa na ma ketanla ma kahang bvüwa tsü makesü ma ma Tsawa la sa pi kahang bvüwa tsü sa thsüdha.

²⁷ Nu ma ghanya kemehai kemeshon pi Atsawa cüdha, kepaghenanye ma Anyi Tsawa ghena.

²⁸ Ha ghena nthu amansa nben lalo; matsü na ghoden keshüthu tsüdila ma hhai zaya,

²⁹ nu mathu shüjjen wina shagha den: kekuli kemehai sa kethengthu na hangneng-shagha hangyaben, nu kekuli nkemehai sa kethengthu na hangneng-shagha dediaben.

Jisu Chüzathu

³⁰ “Hi ketanla hi kekhang wina mangla sa nten, Anyiza na hi kekiza wi ketan hi nyu ghan-nan den. Tsalina hi ghankenan tsüna meshon, kepaghenanye hi hi kenenwa tsü sa nten, isala hi kesun kechiwa kenen tsü saden.”

³¹ “Keujüla hi ketanla isheipi lethu isheikepi tsüna atsentsawa nye.

³² Isala nyu na imithon wina isheipiden, nu ma isheikepi jüh kekhi tsüna atsentsawa kesa hi chüben.

³³ Nthu na nyilothu kesun pi Johan wi chi nu ma atsentsawa wina isheipi chidha.

³⁴ Hi anyi sheikepi jüh nsenthu yishü kesa nmi, isala nthu ya hangshaya thsüle kesalina hi ha khile.

³⁵ Johan na ahula wegü keben kesü ti kesa, nu nthu na kutijü ma kewegü witsü ben mvu sale.

³⁶ Isala hi asheikepi kesü ben, tsüna Johan sheikepi miwi diki; kepaghenanye Abawa na kekuli salo pi hi kecüthu hi tsü kekuli wina Abawa na hi kesun chile kesa isheipiben.

³⁷ Nu Abawa hi kesun kechiwa la isheipiben. Nthu na khiela ma hhai za meya nu ma tsi la mu meya,

³⁸ nu nthu na ma jüh pi nthu leben wi chi meya, kepaghenanye nthu na ma hi kesunchi le kesa nondi nten.

³⁹ Nthu na Ntsawajüh tsü siden, kepaghenanye nthu tsüthu wi anuphan kahang tsü muya benle meshenden. Ntsawajüh tsüdila isheipiben.

⁴⁰ Isala nthu na hi wi anuphan kahang tsü benya mvu nten.”

⁴¹ “Hi anyithu wi anyankethang pvü mvu nben.

⁴² Isala hi nthu na anyi khati kesa khe chüben, nu nthu leben wi Anyiza ketizen tsü nmi kesa la chüben.

⁴³ Hi iBa nyan wina gho lela nthu na hi ssi meya, keujüla anyi kepa wina ma ketanla ma nyan wina gho lethu nthu na ma ssi yaben.

⁴⁴ Nthu na khokho wi nyankethang tsü ya mvu, isala nthu na Anyiza wina kegho nyankethangwa tsü bha mvu nten, isathu nthu na khati nu hi nondiya mehai nu?

⁴⁵ Hi Abawa wi nthu kekimenni jüh khibenle kesa nmeshen lalo. Mosa, nthu na ma nondi keghowa tsüna nthu kimenniben.

⁴⁶ Keujüla nthu na ntsakhiwa Mosa nondi lethu nthu na hi nondi kesa, kepaghenanye ma icüki zhü chitheng.

⁴⁷ Isala keujüla nthu na ma zhü kechithu tsü n-nondi lethu, nthu na khati nu ijühthu tsü nondiya mehai nu?”