JOHAN 4 - Kemethajüh (N) (Re-editing) Bible (BSI)

Jisu nu Samaria Nza Kemehaiwa

¹ Jisu na Johan miwi nyu baptaiz sa kayi nu sansikeyathu ji kayi bendhale kesa Farisithu na zaya.

² (Ntsakhiwa, Jisu na thola pi baptaiz nsa, isala ma sansikeyathu ketan nyu baptaiz sa.)

³ Tsalina Jisu na nyu tsüti khi keben tsü zakeya wi ma Judea teshi nu Galilee wi wa neng.

⁴ Ma Samaria yyi pvüdhi sen nu nwathu yishüben.

⁵ Tsalina ma alentsen sen wala Samaria nyuti kesü Sukhar kesa kheni Jakob na alli pi ma tsawa Josef kecü tsü tetsaki wi ghoya.

⁶ Apen ciwi Jakob tssükhang na ben, nu Jisu na alentsen pi ma güccüya kesalina wa atssükhang tsü kete wi donkiben. Tsüna ghanan lapvü wi sadha.

⁷ Ciwi Samaria nza kesü na atssü dele gho, nu Jisu na ma wi khi, “Atssü pi hi jjüya thsülo.”

⁸ (Tsü tsüwi ma sansikeyathu na kedsakejjü sheiyale anyuti wi wadha.)

⁹ Samaria nzawa na luneng, “No Judah nyi kesü nu hi Samaria nza — isathu, no khati kesa hi wi atssü khieben nu? (Kepaghenanye Judah nyi na Samaria nyi ssinu mangla ahyikhu kesü sa nten.)

¹⁰ Jisu na luneng, “Keujüla no Anyiza ju khukechi nu no wi atssü pi hi jjü thsülo khie kebenwa tsüna thowa khe chü lethu, no ma wi khie nu ma kahangtssü pi no cü kesale.”

¹¹ Nzawa na khi, “Kediwa, no mangla pi atssü ssukeya nmi, nu atssükhang la dhuben. No khiewa kahangtssü muyaben nu?

¹² Ithu baqhai Jakob na atssükhang ha pi ithu cü, ma nu ma tsathu, nu ma mesüsithu tsüdila atssükhang hawi jjü gho. No Jakob miwi dikiben kwe?”

¹³ Jisu na luneng, “Anyi thowa na atssü ha jjüya khe dighe neng shaben,

¹⁴ isala thowa na hi atssü pi ma cü ketenwa tsü jjüya khe dighe neng meyacha. Kepaghenanye hi atssü pi ma cü ketenwa tsüna ma wi bvü keshhugho tssükhang kesü sa nu kahangtssü nu anuphan kahang pi ma cüden.”

¹⁵ Nzawa na khi, “Kediwa, no atssü tsü pi hi cülo! Isanu hi yala khiela ndighe neng thsü la, nyelela gho he wi atssü nde thsü lalo.”

¹⁶ Jisu na ma wi kiza, “No wala nwuba ci sen nu hewi gho nenglo.”

¹⁷ Nzawa na luneng, “Hi iwuba kesüla nmi.” Jisu na luneng, “No hi wi nwuba kesüla nmile kesa tsüna khiti.

¹⁸ No npvüza manga wi n-nuwadha, nu no khili npvüza ssiben ketenwa tsüna ntsakhiwa nwuba nye. No ntsakhiwa hi kizadha.”

¹⁹ Nzawa na khi, “Kediwa, no atusenjüh-kechü kesü le kesa hi chüdha.

²⁰ Ithu Samaria bamyithu na ayikha ha miwi Anyiza kinyi ghoben; isala no Judah nyithu na ithu wala Jerusalem wi Anyiza kekinyi-u le khiden.”

²¹ Jisu na nzawa wi khi, “Nzawa, hi nondilo, anyithu na ayikha ha miwi nyelela Jerusalem wi ketan nyela Abawa kinyi keten matsü na ghoden.

²² No Samaria nyithu na nthu thowa kinyi ten khe tsü nchü; isala hi Judah nyithu na ithu thowa kinyi ten khe chüben, kepaghenanye hangshakeya na Judah nyithu wina gho.

²³ Isala matsü na ghoden nu tsüna khili hadha, atsentsawa wi kinyi ketenthu na Anyiza ghamu kekhang nu atsentsa wi Abawa kinyiden, kepaghenanye Abawa na hathu ti ma kinyilo kesa bhaden.

²⁴ Anyiza na Aghamu tsalina ma kinyi ketenthu Aghamu kekhang wi ketan ma kekinyi-u wi kinyiyaben.”

²⁵ Nzawa na ma wi khi, “Messiya (Khrista le kekhiwa) tsüna ghoben, nu ma gho lethu, pala tsüdi khi pi ithu kizaben kesa hi chüben.”

²⁶ Jisu luneng, “Hi, ma, no ssinu keccünengli kebenwa tsü le!”

²⁷ Tsü tsüwi Jisu sansikeyathu na gho neng nu ma nza kesü ccüneng keben kemu ghena mathu amansa ntsa sa. Isala mathu thola nzawa wi, “No mangwa yamvu ben nu?” tsüti nkhi, nyelela Jisu wi, “No mangkesa na ma ccüneng ben nu?” tsüti nkeü.

²⁸ Tsaseng wi nzawa na ma lakhü teshi theng nu anyutiwa wi wala anyithu wi kiza,

²⁹ “Nthu ghala anyi kesü ghangchilo, ma hi kekuli cüki tsüdi khi pi hi kizadha le! Hawa ha Messiya nye kwe?”

³⁰ Tsalina mathu anyuti tsü teshi nu Jisu wi wa.

³¹ Tsü tsüwi sansikeyathu na Jisu wi khie, “Kesansiwa, pala pahan dsayalo!”

³² Isala ma mathu luneng, “Hi nthu na nkechü kedsakejjü ben le!”

³³ Tsalina sansikeyathu na mathu jawi khokho keü, “Nyu kedsakejjü sengho ma cü kwe?”

³⁴ Jisu na mathu wi khi, “Hi kedsakejjü tsüna hi kesun kechiwa kenen nu ma kekuli sacen chile kesawa tsü.

³⁵ Nthu kekhi na, ‘Asha mejü benla nu alli tsü wwiden.’ Isala hi nthu kizaden, nthu yaki shagha alli tsü ghangchilo; asu na nyün pi wwi qodha le!

³⁶ Alli kewwiwa na akutimen muyaden, nu anuphan kahang ghena asu saghu pi theng yaden; isanu anyi pi vvü kechiwa le kewwiwa lela gweghe anonghe yaden.

³⁷ Kepaghenanye hati kekhi ha ntsakhiwa, ‘kesü na amacü pi vvüchi nu kepawa na wwiyaden.’

³⁸ Hi nthu ya wala nthu kuli nketheng lli wi wwiyalo kesa kesunchi; anyi kepa na ciwi kulitheng, nu nthu ya mathu kekuli wina kiyiyadha.”

³⁹ Nzawa sheikepi jüh: “Ma hi kekuli cüki tsüdila khi pi hi kizadha le,” kekhi tsü ghena anyuti tsüwa wi Samaria nyi kejonla Jisu nondiya.

⁴⁰ Tsalina Samaria nyithu na ma wi gho nu ma mathu gweghe benlalo kesa khie, nu Jisu na ciwi ghanan keni ben wa.

⁴¹ 41 Tsü miwi ma jüh ghena anyi kejonla nondiya,

⁴² nu mathu nzawa kiza, “Khili ikhang na no kekhi jüh ghena nye, isala ikhang ketanla ma jüh zaya, nu ikhang na ma ntsakhiwa ayyi Hangshawa le kesa chükeya ghena nondiben.”

Jisu na Kedi Tsa Kesü sa pi Mehaikecü

⁴³ Ghanan keni ciwi keben seng wi Jisu na Galilee wi wa.

⁴⁴ Kepaghenanye Jisu na ma ketanla hati khitheng, “Atusenjüh-kechüwa na ma yyi wi ma kinyikü nten.”

⁴⁵ Ma Galilee wi kegho wi anyithu na anonkeghe sanu ma ssiya, kepaghenanye mathu na Jerusalem wi Shhukeya Kho kesa wi tsü wa nu ma akho tsüwi kekulithu tsüdila muyadha.

⁴⁶ Jisu na kheneng ma atssü pi kisengtssü ceng kecü pen Galilee wi Kana nyuti witsü wa. Ciwi Kapernaum wi kedi nyi kesü ma tsa na naa ben.

⁴⁷ Ma Jisu na Judea wina Galilee wi ghodha le kesa zaya, nu ma Jisu wi wa nu Kapernaum wi wala ma tsawa shü keten ti naa kebenwa tsü sa pi mehai cülo kesa khie.

⁴⁸ Jisu na ma wi khi, “Nthu thola azensu nu amankesathu npi kemu chu nondi nten.”

⁴⁹ Kediwa tsüna khineng, “Kediwa, itsawa npi keshü tuwi hi gweghe gholo.”

⁵⁰ Jisu na ma wi khi, “No whalo, ntsawa hangya ben na!” Anyi tsüwa na Jisu jüh tsü nondi nu bvüa.

⁵¹ Isanu ma alenca wi wha keten wi amagha kesü na jühtheü sengho ma metu nu khi, “Ntsawa na hangyadha!”

⁵² Tsalina ma mathu wi ma tsawa tsüna khathansha wi mehai nengya nu keü. Mathu na ma wi, “Ghani minulen wi amighe kesü kekihhe wi ma nmuwhe lale,” kiza.

⁵³ Tsaseng wi abawa na tsü thansha wi Jisu na ma wi, “Ntsawa hangya ben na” kekiza tsü meshenya. Tsalina ma nu ma theghi tsüdila nondiya.

⁵⁴ Hawa ha Jisu na Judea wina Galilee wi gho azensu kulikechi keniwa.