JOHAN 3 - Kemethajüh (N) (Re-editing) Bible (BSI)

Jisu nu Nikodema Manyi

¹ Ciwi Farisi kesü Judah nyi yen pi nyu sansi keten ma nyan Nikodema kesa na ben.

² Ma aghaja wi Jisu wi gho nu ma kiza, “Kesansiwa, no Anyiza wina kegho kesansi le kesa ikhang na chüben. Kepaghenanye anyi thola Anyiza na ma ssi nketen tsü no kuliketen azensuthu ha saya nben.”

³ Jisu na ma wi kiza, “Hi atsentsawa no kizaden: anyi kesütanla pvügha neng nkesa tsü ma Anyiza Kadiyyi mu meyacha.”

⁴ Nikodema na ma wi keü neng, Anyi kesü keqhai seng wi khati sanu pvügha nengya mehai nu? Ma ma jja pvünon wi du nu keni tughuwa pvüghaya mehai kwe?”

⁵ Jisu na luneng, “Hi atsentsawa no kizaden; anyi kesütanla atssü nu Aghamu wina pvügha nkeya tsü Anyiza Kadiyyi wi du meyacha.

⁶ Asajjü wi kepvüghawa tsüna asajjü wi nu Aghamu wina kepvüghawa tsüna aghamu wile!

⁷ Hi no kiza kebenwa ha meshen ndeja lalo, ‘No pvügha neng nsathu yishü.’

⁸ Ameghü tsüna ma ketanla sho tenle; nu no tsü hhai zayaden, isala no tsüna khiewa na gho nu khiewa wa ten khe chüya nten. Tsüti aghamu wi pvüghakeya la makesü le.”

⁹ Nikodema na ma wi keü neng, “Khati nu tsüti saya mehai nu?”

¹⁰ Jisu na ma luneng, “No Israel nyi kesansi kemechan kesü, isalethu no khilila ha nchü kwe?

¹¹ Hi atsentsawa no kizaden: ikhang na ikhang kechüwa tsü khiden, nu ikhang kemuwa tsü sheipiden; isala nthu na ikhang jüh nkinale!

¹² Hi ayyi hawi jüh pi nthu kiza lela nthu na tsü n-nondi, isalethu keujüla hi tang wi jüh pi nthu kiza lethu khati nu tsü nondiya ben nu?

¹³ Anyi thola tang wi npi ki, isala tang wina kedugho Anyi Tsawa tsü ketan le!”

¹⁴ Mosa na kheni agheja wi amaghang zanki kechi tsüti Anyi Tsawa lela zanki nsathu yishü,

¹⁵ isanu anyi thowa na ma nondi ten khe anuphan kahang muyaben.

¹⁶ Kepaghenanye Anyiza na ayyi nyi tizenghali ntsa kesalina ma Tsa ntsawa kesütan tsü lela khuchi, nu anyi thowa na ma nondiya khe dedi kesawa nyela anuphan kahang bendha.

¹⁷ Kepaghenanye Anyiza na ma Tsawa kesun pi ayyi jühkekaghatenwa sa thsüle kesawa nye, isala ayyi Hangshawa sa thsü.

¹⁸ Anyi thowa na ma nondi ten khe kemeshensa nmidha, isala thowa na ma n-nondi khe tsüthu meshensadha. Kepaghenanye ma Anyiza Tsa ntsawa tsü nkenondi ghena.

¹⁹ Hawa hati nu ajühkekaghaten tsü saben: kewegüwa tsüna ayyi wi ghodha, isala anyithu na kewegüwa miwi kejangwa tizenki wa, kepaghenanye mathu kekuli na nmehai.

²⁰ Anyi thowa na ma kekuli nmehai khe kewegüwa tsü nanmeghüden, nu ma kekuli chüyathu kemessi ghena kewegüwa wi gho nten.

²¹ Isala thowa na atsentsawa kuli ten khe kewegüwa wi ghoden, ma kekuli tsüna Anyiza jühkeya wina kulile kesa pi ccücale kesalina.

Jisu nu Johan Manyi

²² Ha seng wi Jisu nu ma sansikeyathu na Judea yyi wi wa, ciwi ma mathu gweghe matsü pahan ben nu baptaiz sa.

²³ Johan la Salim tetsaki Aenon wi nyu baptaiz saben, kepaghenanye apen ciwi atssü kejonla ben. Anyithu na ma wi wa nu ma mathu pi baptaiz sa.

²⁴ (Hawa ha nyu Johan ghan pi atssüzüjjen wi npi kechi tuwi sa.)

²⁵ Johan sansikeyathu pahan nu Judah nyi kesü mathu na agwo satekemetha cüki khi pi keccücanli ben.

²⁶ Tsalina mathu Johan wi ghola ma kiza, “Kesansiwa, kheni Jordan Ghaku nishuwa no gweghe keten no ma cüki kekhiwa anyi tsü meshenben ma? Ma khili tsü nyu baptaiz sabendha, nu anyi tsüdila ma wi wa bendha le!”

²⁷ Johan na luneng, “Anyiza wina pi anyi nkecü tsü ma mangla mukeya nmi.

²⁸ Hi hatu wi, “Hi Khrista tsü nyele, isala ma tuwina hi kesun chile,” isa kekhi tsü nthu na hi chüzathu saben.

²⁹ Shanyili tsüna shanyiwa ji; isala shanyiwa pvüshang na ngan nu kinaden, nu ma khathansha wi shanyiwa hhai zaya khe ma nongheden. Tsü makesü inonkeghe na sacen yadha.

³⁰ Ma di kayi nwathu yishü, isala hi zza kayi waden.

Ma Tang wi na Keghowa

³¹ Tang wina kedughowa tsüna tsüdi miwi diki. Ayyi wina keghowa tsüna ayyi ji nu ayyi cüki khiden, isala tang wina keghowa ma tsüdi miwi diki.

³² Ma ma kemu nu kiza tsü sheipiden, isala thola ma sheikepi tsü ya nten.

³³ Isala thowa na ma jüh tsü nondiya khe Anyiza tsüna atsentsawa le kesa chüyaden.

³⁴ Anyiza na kesun kechiwa na Anyiza jüh khiden, kepaghenanye Anyiza na nkedela Aghamu pi ma cüden.

³⁵ Abawa na Atsawa tizenghali nu pala tsüdi pi ma kwen wi chicüdha.

³⁶ Anyi thowa na Atsawa nondi ten khe anuphan kahang bendha; Thowa na Atsawa jüh nkina khe kahang nmi, isala Anyiza leben kekha kekhu wi benden.