JOHAN 13 - Kemethajüh (N) (Re-editing) Bible (BSI)

Jisu na Ma Sansikeyathu ccü Kebhu

¹ Shhukeya Kho tsathang npi tuwi Jisu na ma ayyi ha teshi nu Abawa wi wa keten matsü na gho cudha kesa chüya. Ma ayyi ha wi ma jithu tizenghali ntsa sa, nu ma mathu tizenghali wa asakhen cu.

² Jisu nu ma sansikeyathu gweghe aghaja nün dsa keben wi atsaghang na Jisu matsale kemeshen pi Simon Iskariot tsawa Judah leben wi chia.

³ Jisu na Abawa na pala tsüdila pi ma kwen wi chidha kesa chüben, ma Anyiza wina gho nu Anyiza wi wa neng den kesa la chüben.

⁴ Tsalina Jisu na anün dsa keben wi shagha ma thsü pi theng nu atssükizü thsü pi ma geshi qhanya.

⁵ Tsaseng wi ma atssü pi atssükhu wi chiya nu sen wa sansikeyathu ccü bhu, nu atssükizü thsü ma geshi qhanpvü keten tsü pi mathu ccü nyen.

⁶ Ma ghola Simon Pitor cuya, nu Pitor na ma keü, “Apvüwa, no iccü la bhule ben kwe?”

⁷ Jisu na ma luneng, “No khili hi mangwa saben khe nchü, isala haseng wi ccüna chüyaben.”

⁸ Pitor na khi, “No khiela iccü bhuya nben le!” Jisu na luneng, “Keujüla hi nccü nbhu thsü lethu, no hi wi nshei nmidha.”

⁹ Simon Pitor na luneng, “Apvüwa, isalethu iccü ketan nyela ikwen metsi nu ili la za cülo!”

¹⁰ Jisu khi, “Atssükizü kesawa na ma ccü ketan khe ma gwo kepa wi tsüdila methatha sadha; meshu kesütan khe nthu tsüdila methadha.”

¹¹ (Jisu na thowa na ma matsaten khe chüben, tsalina ma “meshu kesütan khe nthu tsüdila methadha,” isa khi.)

¹² Jisu na mathu ccü kebhu seng wi athsü mphiya nu kheneng ma pen wi benya nu mathu wi keü, “Hi khili nthu miwi mangwa sachi khe nthu na chüben ma?

¹³ Nthu na hi pi Kesansiwa nu Apvüwa le citen nu nthu na tsüti sa jiketsü, kepaghenanye hi tsüti kesa.

¹⁴ Hi nthu Kesansiwa nu Apvüwa na nthu ccü bhu cüdha, tsüti nthu la khokho ccü kebhu-u.

¹⁵ Hi nthu ghena tsütsonca kesü sachidha, tsalina hi nthu miwi sa kechi tsüti nthu la satenlo.

¹⁶ Hi atsentsawa nthu kizaden: amagha kesüla ma pvüwa miwi ndiki, nu nyilowa na ma kesun kechiwa miwi ndiki.

¹⁷ Khili nthu na atsentsawa ha chüyaben, nu nthu na tsü saten lethu nthu na kemihhi ntsa le!

¹⁸ “Hi nthu tsüdi cüki khi nben, hi hi kessiya kesathu chüben. Isala Ntsawajüh na khi keben tsü nsacenthu yishü, ‘Anyi hi gweghe amesa kedsawa na hi shunben.’

¹⁹ Ha npi kesa tuwi na hi khili nthu kizaben, isanu kusi tsü sa shagha khe nthu na ‘Hi tsüna Hi’ kesa tsü nondiyaben.

²⁰ Hi atsentsawa nthu kizaden: thowa na hi kesun kechiwa tsü ssiya ten khe hi la ssiyaden, nu thowa na hi ssiya ten khe hi kesun kechiwa la ssiya den. ”

Jisu na Ma Matsaketen Cüki Kekhi

²¹ Jisu na ha kekhi seng wi ma leben güccü ntsa saya nu nkuthila khi, “Hi atsentsawa nthu kizaden: nthu meshu kesü na hi matsa tendha.”

²² Sansikeyathu na ma thowa cüki khi ben nu kesa amansa nu khokho ghangkevüli wa.

²³ Sansikeyathu meshu kesü Jisu na ma tizenghali ketenwa na Jisu kete wi donkiben.

²⁴ Tsalina Simon Pitor na akwen ghaya pi ma cü nu khi, “Ma thowa cüki khiben khe keü nanlo.”

²⁵ Tsalina sansikeyawa na Jisu tetsaki wha nu ma wi keü, “Apvüwa, tsüna thowa nu?”

²⁶ Jisu na luneng, “Hi amesa pi akhu wi tenchi nu pi ma cüden, ma anyi tsüwa tsü.” Tsalina ma amesa be kesü pi akhu wi tenchi nu tsü pi Simon Iskariot tsawa Judah cüa.

²⁷ Judah na amesa tsü khuya meyi Satan na ma leben wi dua. Jisu na ma kiza, “No mangwa nsathu yishüben khe wan sachilo!”

²⁸ Ciwi dsajjü kebenthu thola Jisu na mangkesa na ha khi pi ma kizaben khe nchü.

²⁹ Judah na apisa hikhu kenonccawa ghena, sansikeyathu pahan kemeshen na Jisu na ma kiza nu wala kemishu ghena mathu nsenthu keyishü shei sen gholo, nyelela pala pahan pi ketha-u cülo kesa ghena le sa.

³⁰ Judah na amesa tsü khuya nu wan akhemi wi shhua; tsüna aghaja sadha.

Ayenkhukechi ketheüwa

³¹ Judah na teshi nu kebvü seng wi Jisu na khi, “Khili Anyi Tsawa nyanthangya tendha; nu ma wina Anyiza nyanthangya tendha.

³² Keujüla ma wina Anyiza nyanthangya lethu, Anyiza ma ketanla Anyi Tsawa nyanthang chiben, nu ma wan tsü sachiaben.

³³ Ghanyithu, hi matsü kesie nthu ssiben ntendha. Nthu na hi bhaben; isala khili hi Judah nyi kekhang kesenthu kekiza ti nthu kizaben, ‘Nthu na hi wa keten pen wi waya nben.’

³⁴ Hi ayenkhukechi ketheü kesü pi nthu cüben, nthu khokho tizenghali liyalo. Hi nthu tizenghali kesa ti nthu la khokho tizenghali li meyathu yishü.

³⁵ Keujüla nthu khokho tizenghali liya lethu, ciwi na anyi tsüdila nthu na hi sansikeyathu le kesa chüyaben.”

Jisu na Pitor Ma Cüki Nkhi la Keten Kekhi

³⁶ Simon Pitor na ma wi keü, “Apvüwa, no khiewa waten nu?” Jisu na luneng, “Hi khiewa waten khe no khili hi nie ghaya nben, isala no haseng wi ccüna hi nie ghaya ben le!”

³⁷ Pitor na ma keü, “Apvüwa, mangkesa na khili hi no nie ghaya nben nu? Hi nghena hi kahang la khuchiaben.”

³⁸ Jisu na luneng, “Ntsakhiwa no ighena no kahang khuchiya ben ne? Hi atsentsawa no kizaden: awegü npi kekhu wi no kecheng tughu hi nchüle khiaben.