JOHAN 1 - Kemethajüh (N) (Re-editing) Bible (BSI)

Kahang jühwa

¹ Adechhü wina ajühwa tsüna benden, ajühwa tsüna Anyiza gwegheden, nu ajühwa tsüna Anyiza.

² Adechhü wina ajühwa tsüna Anyiza gwegheden.

³ Pala tsüdila ma wina sachi, nu sachi kethengthu tsü ma wina nkenye kesü la nmi.

⁴ Ajühwa tsüna kahang bvüwa, nu kahang tsüna anyi tsüdi kewegüwa.

⁵ Kewegüwa tsüna kejang wi wegüden, nu kejangwa tsüna ma miwi khang meyacha.

⁶ Anyi kesü Anyiza wina kesun kechi ma nyan Johan kesa na ben.

⁷ Ma kewegüwa tsü cüki pi anyithu kizale gho nu tsüdila ma wina nondiya thsüle kesalina.

⁸ Ma kewegüwa tsü nye, isala ma kewegüwa tsü cüki pi nyu kizale gho.

⁹ Hawa ha atsentsa kewegüwa — kewegüwa tsüna ayyi wi gho nu anyi tsüdi wegüben.

¹⁰ Ma ayyi wi hang nu ma wina ayyiwa tsü sachi, isala ayyi nyi na ma nchü la.

¹¹ Ma ma nyithu wi gho, isala ma nyithu na ma ssi meya mvu la.

¹² Isala ma ssiya nu ma nyan nondi keyathu tsüdila Anyiza tsangathu saya kemehai kekhang pi tsüthu cüdha.

¹³ Mathu na asajjü kenen nyelela anyi kenen wina nyela Anyiza kenen wina pvügha yadha.

¹⁴ Ajühwa tsüna asajjü ceng shagha nu nanketizen nu atsentsawa pi pong pvünu ithu jawi hang. Ithu na ma nyankethang muyadha, nyankethangwa tsüna Atsawa ketan Abawa wina mukeya.

¹⁵ Johan na jisha nu ma cüki khi, “Hawa ha hi kheni ma cüki khila, ‘Ma iseng wi ghoden, isala ma imiwi diki, kepaghenanye ma itu wina bendha,’ kesawa tsüle.”

¹⁶ Ma nanketizen pong kimenni kesa wina ithu tsüdila nanketizen mu la mu nengya saben.

¹⁷ Kepaghenanye Mosa wina ayenwa tsü khuchi, isala nanketizen nu atsentsawa tsüna Jisu Khrista wina gho.

¹⁸ Anyi kesütanla Anyiza npi muya, Atsawa, Abawa kete wi kebenwa tsü ketan na ma sa pi chüya thsüdha.

Johan Baptizwa Ketsijüh

¹⁹ Hana Johan sheikepi kekhi: Jerusalem wi Judah nyithu na keqhaikedithu nu Levi nyithu pahan kesun pi Johan wi “No thowa nu?” isa keü thsü.

²⁰ Ma nkuthila luneng. “Hi Khrista tsü nyele!”

²¹ Mathu na ma wi keü, “Isathu no thowa nu? No Elijah kwe?” Johan na luneng, “Hi ma la nyele!” Mathu na kheneng ma wi keü, “No atusenjüh-kechüwa kwe?” Ma “nyele” khineng.

²² Tsaseng wi mathu na ma wi khi, “No thowa khe pi ikhang kizalo. Isathu ikhang na pi ikhang kesun kechithu kiza na. No ketanla no pi thowale khiten nu?”

²³ Johan kekhi na, “Hi ‘meshu kesü agheja wi jishanu, Apvüwa ghena alen satemeshon yalo,’ kesa Isa atusenjüh-kechüwa na kekhi tsüle! ”

²⁴ Ciwi Farisithu na kesun kechi nyilothu na ben.

²⁵ Mathu na Johan wi keü, “Keujüla no Khrista tsü nye, Elijah nu atusenjüh-kechü la nye lethu, no mangkesa na nyu baptaiz saten nu?”

²⁶ Johan na mathu kiza, “Hi atssü pi nyu baptaiz saben, isala meshu kesü na nthu jawi ngan keben tsü nthu na nchü.

²⁷ Anyi iseng wi gho ketenwa tsü hi ma ccüguwenli la nlisha qo le!”

²⁸ Hathu ha tsüdila Jordan Ghaku nishuwa Johan na nyu baptaiz sa keben wi sa.

Anyiza khaghanenizza

²⁹ Dhitsüwa wi Johan na Jisu ma tetsaki gho keten muya nu khi, “Ae, Anyiza khaghanenizza ayyi kesami sen nu bvüa ketenwa tsüna ka kale!

³⁰ Hawa ha hi kheni ma ghena kekhi, ‘Anyi kesü iseng wi ghoden, isala ma imiwi diki, kepaghenanye ma itu wina bendha,’ kesawa tsü.

³¹ Hi ma nchü, isala Israel nyi yala ma chüya thsüle kesalina hi atssü pi nyu baptaiz sagho le!”

³² Nu Johan kekhi na, “Hi tang wi aghamu na nkhetsü ti kesa dugho ma miwi ben wa kea muya.

³³ Hi ma nchü, isala atssü pi nyu baptaiz salo kesun kechiwa Anyiza na hi kiza, ‘Aghamu na dugho ma miwi ben wa kesa no kemuwa hana ma Kemetha Ghamu pi nyu baptaiz sa ketenwa tsü le.’

³⁴ Johan khi, ‘Hi tsü muyadha, nu ma Anyiza Tsawa tsüle kesa hi nthu kizaben.’ ”

Jisu Sansikeyathu Atuwa

³⁵ Dhitsüwa wi kheneng Johan na ma sansikeyathu meshu keni ssinu nganben.

³⁶ Ma alentsen nu Jisu ghang nu khi, “Ae, Anyiza khaghanenizzawa ka kale!”

³⁷ Sansikeyathu meshu keni na ma tsüti kekhi zaya nu Jisu nie wa.

³⁸ Jisu na kheneng manyi na ma nie keten muya nu hati keü, “Nshinyi na mangwa ghang ten nu?” Manyi na ma wi, “Rabbi, (ma jjügi Kesansiwa,) no khiewa hang ten nu?” tsüti keü.

³⁹ Ma manyi luneng, “Ghala ghangchilo.” (Tsüna minulen wi amighe mejü kekihhe wi sadha.) Tsalina manyi na ma gweghe wa ma kahang ben muya, nu tsü ghanan ma gweghe ben wa.

⁴⁰ Meshu keni Johan jüh kekhi zaya nu ma nie wa kesa tsü kesü na Simon Pitor cünyuwa Andria.

⁴¹ Ma atuwa wala ma cünyuwa Simon muya nu ma kizala, “Ishinyi na Messiya (ma jjügi Khrista) tsü muyadha le!”

⁴² Isanu ma Simon ssinu Jisu wi gho. Jisu na ma ghang nu kiza, “No Johan tsa Simon, no pi Kefa (ma jjügi Pitor) isa ciden.”

Jisu na Filip nu Nathanael Manyi Cikeya

⁴³ Dhitsüwa wi Jisu na Galilee wi wale keben wi Filip muya nu ma kiza, “Hi nie ghalo!”

⁴⁴ (Filip la Andria nu Pitor manyi nyu Bethsaida wi kahang nyi kesü.)

⁴⁵ Filip na Nathanael muya nu ma wi kiza, “Ikhang na Mosa yenwa wi nu atusenjüh-kechüthu la ma cüki zhü ketheng Josef tsawa Nazareth nyi Jisu tsü muyadha le!”

⁴⁶ Nathanael na ma keüla, “Nazareth nyu wi la pala kemehai shhughoya mehai kwe? ” Filip na ma wi kiza, “Ghala ghangchilo.”

⁴⁷ Jisu na Nathanael ma wi gho keten muya nu ma ketanla ma cüki khi pi ma kiza, “Ae, Israel nyi ntsawa kesami nkemiwa na he wi ben le!”

⁴⁸ Nathanael na ma wi keü, “No khati nu hi chüya nu?” Jisu na luneng, “Filip na no npi cikechi wi no khhaghabvü ton ccü wi keben hi no mu le!”

⁴⁹ Nathanael na luneng, “Kesansiwa, no Anyiza Tsawa nu Israel Kadimiwa le!”

⁵⁰ Jisu na ma wi khi, “No khhaghabvü ton ccü wi keben hi no mule kekhi ghena no nondiben ma? No ha miwi pala kedi kejon muyaben.”

⁵¹ Nu ma manyi wi kiza, “Hi atsentsawa nshinyi kizaden: nshinyi na atssan na sha nu Anyiza nyilothu na Anyi Tsawa miwi ki nu dugho keben muya ben.”