JOEL 2 - Kemethajüh (N) (Re-editing) Bible (BSI)

Ashiqathu tsüna Apvüwa Tsathang ghena Kitsan Kechi

¹ Kemessi le kesa tutuwa khouchi; Anyiza yyishiphon kemethawa Zion miwi kemessi hhai sa chilo. Kedheggülo, Judah nyithu! Apvüwa tsathangwa tsüna gho tendha.

² Tsüna kejang nu keshaman tsathang saaden, jang nu akulukeshü tsathang kesü saaden. Ashiqa zitenti keti na kejang na ayikhathu kejibhon keben ti ghoden. Ciwi khiela tsüti mangla npi sa, nu khiela sa neng nbendha.

³ Mathu na anni ti aghangthu dsa. Mathu tuwi ayyiwa tsüna Eden sanku ti, isala mathu sengwi tsüna ayyikeshü mangla nkemi sa. mangla mathu tubvü meya.

⁴ Mathu na goruthu ti mu; mathu na aghi goruthu ti bvüden.

⁵ Mathu na ayikha shoni wi pen kewa wi gorugarithu kebvü hhai ti sa; anni na aghang keshü mecang keben hhai ti saden. Mathu na tan pi süpahizi keti na aghi wi wale keten keben ti sa.

⁶ Mathu na tetsaki kegho wi tsüdila qhethiketen sa; tsüdila ammi phalagha sa.

⁷ Mathu na aghi kekhang nyi ti nyu ssisa; mathu na süpahithu ti ajjen-keshon wi ghapvüki. Mathu tsüdila meshonqhe alentsen, nu wa keten lenwa tsü kemili nsa,

⁸ nyelela thola tho len wi nwa. Mathu na chhüdi sennu aghi kehiepen wi wa, nu mangla mathu khen meya.

⁹ Mathu na bvü sen wa anyunutiwa tsü shun; mathu na akhwetithu miwi la bvüki; mathu na ajjen miwi megheki nu kaghanfüthu ti jjenkubhi wina du.

¹⁰ Mathu na kewa wi ayyi kuli; atssan na kedheggü. Aghani nu asha na jang wa nu ghotsithu na nwegüla.

¹¹ Apvüwa na jisha pi ma süpahizi wi ahza khuchi. süpahi ma jühkekinathu na ji pi khang ntsa. Apvüwa tsathangwa tsüna khatila qhethiketen saaben nu! Thowa na hangya mehai nu?

Leben khapeghe yalo Keci

¹² Apvüwa na khiben, “Isala khili lela atsentsa wi leben khapegheya nu zi, qai, nu anongü sennu hi wi kheneng gholo.

¹³ Nthu hathanaben le kesa lebengüccü pi ccücalo; nthu thsümeni mezüqhe kesa tsü ketan ncen le.” Apvüwa nthu Nyiza wi ghoneng lo. Ma wi ccatssü nu nanketizen na pongben; ma lebensie nu ma khishi kechithu tsü saaden; ma keshüthangla meten kecüwa nyela kesami teshi pi cüle saden.

¹⁴ Apvüwa nthu Nyiza na ma kemeshen kemili, nu asu kejon sawegü pi nthu cüla mechü. Isathu nthu na asu nu kisengtssü pi ma kinyiya mehai.

¹⁵ Zion Yikha miwi tutuwa khou chilo; anyithu cighu chi nu kezi ghena ahza khuchilo!

¹⁶ Anyithu cipi saghu chi; mathu ghena kemetha keccünengli kesü kidenya; anyi keqhaithu ssigho, ghanyithu nu memethu la saghuya. Nshu wubanyithu lela mathu jjen teshi nu nghothu yishü.

¹⁷ Kekinyijjen kedulen nu kekinyipen jüwi Apvüwa kekuli sa keten keqhaikedithu na hati qai nu kekhie nsathu yishü: “Apvüwa, n-nyithu nantizen chi cülo. Mizzatenti kepathu ya ‘Nthu Nyiza na khiewi ben nu?’ khinu ithu nkhichi nu nankeqhe nsa thsüla.”

Anyiza na Ayyiwa wi Pvükeya sa neng Kecü

¹⁸ Tsaseng wi Anyiza na ma yyiwa cüki kemeshen pi ccücachi; ma ma nyithu nantizen chicü.

¹⁹ Ma mathu luneng cü: “Hi khili asu, kisengtssü, nu oliv deli pi nthu cüle bendha, nu nthu na anonkwen yaden. mizzatenti kepathu na nthu nkhichi sa nbendha.

²⁰ Hi ashiqa zitenti aghawa na kedugho tsü khua, nu mathu pahan jügü pi atssükedone wi chiaben . Mathu jawi kemechan ntsathu jügü pi Keshü Tssükedone non wi chia, nu tsü shiwathu pi Mediterranean non wi chiaben . Mathu keshü kamang na bigheaben. Mathu na nthu miwi sa kechi tsüdi ghena hi mathu yasa cüden.

²¹ Allithu, nmessila, isala Apvüwa na nthu ghena sakechi tsüdi ghena anonghe nu nongyalo.

²² Aghangsathu, nmessila, amouthu na mejjüdhi ben; achantonthu na ma bi bünben, nu ciwi khhaghabvü, nu kemeshentsse na kejon ben.

²³ Zion nyithu, kenong sa yalo, Apvüwa nthu Nyiza na nthu ghena mangwa sa chi cü khe tsüghena anonghe yalo. Ma vvüthimeyi tsankegho sati pi nthu cüdha; ma bathsü tsankegho la meyisha pi nthu cü, nu leghe tsankegho la hatu wi ti sa cüdha.

²⁴ Aniegithu wi asu na kepong saaben; kenyeggüpen katen kebithu wi kisengtssü, nu oliv deli na lle pongcaben.

²⁵ Ashiqa zitenti na kegho mapithu wi nthu lli dsa, nu nthu na mangwa dedi khe hi pi nthu cü neng SHaben. Hi ashiqa zitenti kesun pi nthu keshunwa tsü le.

²⁶ Khili tsü nthu na kedsa ghena kejon ben, nu anonkwen yaben. Nthu na Apvüwa nthu Nyiza sengben, ma nthu ghena amankesathu kulichi. Inyithu na nyu mathu nkhichi nsa neng dha.

²⁷ Israel, tsaseng wi tsü nthu na hi nthu jawi ben le kesa chüyaben, nu hi ketan Apvüwa nthu Nyiza khe kepa wi thola nmi. Inyithu na nyu mathu nkhichi nsa neng dha.”

Apvüwa tsathangwa

²⁸ “Haseng wi hi ighamu meyisha pi anyi tsüdi miwi chi cüden: nthu tsathu nu nthu ngathu na hi ketsijüh pi thang chiben; nthu anyi keqhaithu na amanthu chü, nu nthu pvünyithu na kemanthithu muben.

²⁹ Tsü tsüwi hi ighamu meyisha pi imaghathu nza le npvüza miwi lela chiben.

³⁰ ‘Tsü tsathang wi hi tang wi nu ayyi miwi kekitsanthu khuchiben; ciwi ajjükeji, anni, nu annikekhu kulukeshü benden.

³¹ Apvüwa tsathang keti nu qhethiketen kesawa tsü npi kegho tuwi aghani na jang, nu asha na kemili pi ajjü ti nmieni saaben.

³² Isala Apvüwa wi kekiqa khie ketenthu tsüdila hangsha yaben. Apvüwa na khi ketheng ti, “Jerusalem wi pahan na bvü yaben; hi kessiya kesathu na hang yaben.’ ”