JEREMIYA 8 - Kemethajüh (N) (Re-editing) Bible (BSI)

¹ “Tsü tsüwi kadimithu nu Judah kedithu güthu, nu keqhaikedithu nu atusenjüh-kechüthu, nu anyi kepa Jerusalem wi kahangthu gü lela mathu shüjjen wina khushi yaben.

² Saghu pi vhü nsala mathu gü na ayyi miwi kele pi ayyi kemehai ti saaden. Tsüthu pi anyi hathu na ghali nu kekuli sa, mathu ccüneng nu kinyi keghothu aghani, asha, nu ghotsithu tuwi vvüzighe den.

³ Nu nkemehai mizzatenti hawa nyi hang kebenthu na hi mathu jügü pi chi ketheng pen wi hang kebenwa nyela keshüwa sa mvu wa ben. Hi Apvüwa Kekhang ntsawa, hi khidha.”

Kesami nu Kemeten

⁴ Apvüwa na anyi hathu wi khilo hi kiza, “Anyi kesü na khuli lela shagha neng nten kwe? Keujüla meshu kesü na alen cüzzi lela ma kheneng gho nten kwe?

⁵ Isalethu inyithu, mangkesa na nthu na hi wina bvü nu kheneng ngholadha nu? Nthu na atsikezhüthu tsü nteshi nu hi wi kheneng ngho mvu ladha.

⁶ Hi kekaketsü sa kina nan, isala nthu na atsentsa nkhi. Nthu thola ma gheshighena ghena aleben güccü nsa; nthu meshu kesüla hati nkeü, ‘Hi mangwa sazzitheng nu?’ Anyi tsüdila goru na aghi wa keten ti papa lenwa tsü nieden.

⁷ Atssüwathu lela kheneng kegho tsüwa tsü chüden; nkhetsü, aghoni, nu atssüwathu na khathansha wi zü wa nsathu yishü khe chüden. Isala inyithu, nthu tsü hi pi nthu noncca keten yenthu tsü nchüla.

⁸ Nthu na khatinu nthu na metsa nu iyenthu tsü chüben le khiya mehai nu? Ae, atsentsa nkenye ayenkechüthu na ayenthu tsü kemilidha.

⁹ Nthu nyi kemetsathu na kejügheyadha; mathu na chükivvü nu acadudha. Mathu na ijüh meya mvu; mathu na khili kemetsa mangwa muya nu?

¹⁰ Tsalina hi mathu lli khupi nyu ji sa thsüa, nu mathu wubvüthu pi npvüza kepathu cüaden . Anyi kizza le kedi lela tsüdi atsentsa nkenye wina apisa muya le bhaden. Atusenjüh-kechüthu nu keqhaikedithu lela anyithu mechuden.

¹¹ Mathu na inyithu mesa-mena keya tsüna qheshu keya ketan le sa nu kuliden. Anyi thola kemehai sa nkeben wi lela ‘Tsüdila kemehai saben le’ khiden.

¹² Inyithu, nthu na nankiqanan kekuli hathu sakea ghena njüghe kwe? Nyele, nthu na njüghetha; nu nthu na kejüghe yen la nchüle! Tsalina hi nthu meten kecü wi nthu na nyu kekhuli ti nthu la khuliaben, nu tsüna nthu ghena asakhen saaben. Hi Apvüwa Kekhang ntsawa, hi khidha.”

¹³ “Anyi kesü na ma lli wwiya keten ti hi inyithu saghuya mvuthi sa; isala mathu na kemeshentsse ton mabi nkemi, khhaghabvü ton mabi nkemi ti; mawa lela jü wadha. Tsalina anyi kepathu na ayyi tsüwa yayalo sadha.”

¹⁴ Anyiza nyithu na keü, “Ithu mangkesa na ccen donkiben nu? Ghalo, ithu khweti ketheng nyunutithu wi bvüdu nu ciwi shüa na. Apvüwa ithu Nyiza na ithu meshensa pi shülo sadha; ma ithu na jjülo aji pi ithu cüdha, ithu na sami pi ma shun kesalina.

¹⁵ Ithu na ccayazi nu mehaikeya tsü ghang, isala tsüna ajüsa, nu kemessi na ghodha.

¹⁶ Ithu ghinyithu na Dan nyunutiwa wi bendha; ithu na mathu goru kekhou hhai zaben. Mathu goru na khou chithu ayyiwa na mabenla kedheggü den. Ithu ghinyithu na ithu yyi wi keben tsüdi, ithu nyunutiwa nu anyithu tsüdi dediale ghodha.”

¹⁷ Apvüwa na khiben, “Meghe- metsa yalo! Hi amaghang jikepvü mmaya nketen kesun pi nthu jawi chiben, nu tsüthu na nthu mcüben.”

Jeremiya na ma nyithu ghena Leben gükeccü

¹⁸ Ileben gükeccü sateccaya nbendha; ileben na naa wadha.

¹⁹ Kinalo! Ayyi tsüdi wi inyithu na hati qai keben hi zaben, “Apvüwa na Zion wi nmidha kwe? Zion Kadimiwa na ciwi nmidha kwe?” Apvüwa mathu kadimiwa na luneng, “Nthu mangkesa na nthu tsikezhüthu kinyi, nu asang cenpvü ma men nkemi tuwi kukedu, nu hi ya lebenminu thsüten nu?”

²⁰ Anyithu na magha shagha, “Mazu tsüna wadha, mazü tsüna cendha, isala ithu npi hangshaya le.”

²¹ Ileben na pachadha kepaghenanye inyithu na pachadha; Hi anongü ben; hi iccükwenshü chadha.

²² Gilead wi dawa nmi kwe? Ciwi dawakechüthu nmi kwe? Isathu, mangkesa na inyithu na mehai meya nu?