Biblia Todo Logo
Bìoball air-loidhne

- Sanasan -

JEREMIYA 6 - Kemethajüh (N) (Re-editing) Bible (BSI)


Ghinyithu na Jerusalem vüyakesa

1 Benjamin nyithu, hangya le kesa ghena bvü yalo! Jerusalem wina bvü yalo! Tekoa wi tutuwa khou nu Beth Hakherem wi azensu nni kesü sa chilo. Aghawa na kededi nu keyasa na gho tendha.

2 Zion nyunuti na atsimehai ntsa isala tsü yasaden;

3 kadimithu na ciwi mathu süpahizithu ssinu mnanden. Mathu na nithsüjjen sapi anyunutiwa tsü vüya, nu meshu kesüsü ma khiewa mnan mvu khe mnanden.

4 Mathu na khiben, “Jerusalem ssikaghashen le kesa kidenya! Kidenyalo! Ithu na ghanan lapvü wi wa ssikaghashen den!” Isala tsaseng wi mathu na khiben, “Minu mtsüdha, minuwa tendha, nu minu wi kekhwen na kesiesie sa wadha.

5 Ithu na aghaja wi wa ssikaghashen den; ithu na anyunutiwa khwetivüthu tsü yasaden.”

6 Apvüwa Kekhangwa na kadimi hathu ya Jerusalem vüya thsüale kesa ghena achantonthu shüchi nu aghikehiepen sayalo kesa ahza khuchia. Ma khidha, “Hi kemeten pi anyunuti hawa cüden, kepaghenanye tsüna nyu kepasha kekuli pi pongdha.

7 Atssükhang na atssü ya dan methaya thsü keten ti Jerusalem na nkemehai sa pfü pfü ben den. Hi anyunutiwa wi yasayala nu keyasa ya; kesakinaa nu mesa- mena tsüdi mu.

8 Jerusalem nyithu, agükeccü hathu pi nthu kitsan yalo, nyelethu hi nthu yishaden; hi nthu nyunutiwa pi ayyikeshü sa nu thola nkahang pen kesü sa thsüaden .”


Israel Nyu jühkahhaghewa

9 Apvüwa Kekhangwa na hi wi khi, “Israel kihhe metha pi kemeshentsse ton wi mabi layakhi kesa ti saaden. Tsalina matsü keben jüwi na no saya kemehai chu anyi tsüdi kekasha yalo.”

10 Hi luneng, “Hi mathu ccüneng nu kitsanchi lela thowa na ijühkina nu? Mathu na leben-dhu nu no ketsijüh nkina mvu; mathu na no hi ya khilo kekiza jüh tsü nankeqheden.

11 No mathu ghena aghekepvü tsüna hi la mecangben, Apvüwa, nu hi tsü kekheneng meya ladha le.” Tsaseng wi Apvüwa na hi wi khi, “Nleben keminu keshusha pi atonti wi ghanyithu nu acalithu saghu keben miwi chilo. Awuba nu awubvüthu ssinu bvüaben, nu keqhai ntsathu lela heisha nten.

12 Mathu jjenthu, mathu llithu nu mathu wubvüthu pi anyi kepathu cüaden . Hi ayyi hawa wi anyithu meten cüden.

13 Anyi kizzawa le ketiwa lela tsüdi atsentsa nkenye wina apisa muya le saaden; atusenjüh-kechüthu nu keqhaikedithu lela anyithu mechuben.

14 Mathu na inyithu mesa-mena keya tsüpi qheshu keya ketan ti sa nu kuliden. Anyi thola kemehai sa nkeben wi lela, mathu na ‘Tsüdila kemehai sa ben le’ khiden.

15 Mathu na nankiqanan kekuli hathu kesa wi jüghe ten kwe? Nyele, mathu na njüghetha; mathu na kejüghe yen la nchü. Tsalina hi mathu meten kecü wi mathu la nyu kekhuli ti khuliaben; nu tsüna mathu ghena asakhen saaben. Hi Apvüwa, hi khidha.”


Israel na Anyiza len meya mvukesa

16 Anyiza na ma nyithu wi khi, “Alen nonpeghe wi ngan nu ghanglo. Kheni lenthu nu alen kemehai ntsathu na khiewi ben khe keülo. Ciwi lentsenlo, isathu nthu na kecca wi hang yaben.” Isala nthu na khi, “Nmale, ithu tsüti sa ntenle!”

17 Isanan Apvüwa na kekitsan tutuwa kekhou hhai kinalo kesa aghikehiethu pi ben thsüa. Isala mathu na khi, “Ikhang tsü kina nten.”

18 Tsalina Apvüwa na khi, “Kinalo, nthu mizzatentithu, nu inyithu miwi mangwa saaten khe chüyalo.

19 Kinalo, ayyi! Hi mathu cho kekiden tsüdi ghena kemeten pi cülo kesa kededi sen nu anyi hathu miwi ghoden, kepaghenanye mathu na hi pi kesansijüh meya mvu nu ijüh nkina ladha.

20 Mathu na Sheba wi hankedemvu nyelela lenkesie wina cüdemvuthu sengho lela hi tsü khichi ben kwe? Mathu na pala khukechi tsü hi ya nten nyelela mathu na ahhansha kesa tsüpi hi kenen saya nben.

21 Tsalina hi anyi hathu pi accümeshü nu khuli thsüaden . Abathu nu atsathu, nu tsüti apvüshangthu nu ajenphonthu la shüaben.”


Aghawa na Nkakegho

22 Apvüwa na khiben, “Aghawa diyyi kesü wina anyithu na ghoden; aghawa kelensie wi diyyi kesü na aghi ghena kidenben.

23 Mathu na mathu lamugho nu njünnu pieki yadha; mathu na daggü nu nanketizen nmi. Mathu na mathu goru miwi keki na atssükedone kaghamo hhai ti. Mathu na Jerusalem ssinu aghisa le kidenyadha.”

24 “Jerusalem nyithu na khiben, ‘Ithu na jühtheü zayadha, nu ithu kwen na kechusügü sa, nza na kepvügha wi kinaa ti agükeccü nu kinaa na ithu ghanten yadha.

25 Ithu na diyyiwa bendi nyelela alentonti wi wa messidha, kepaghenanye ithu ghinyithu na aghighe kiden senben, nu kemessi na ithu vüyadha.’ ”

26 Apvüwa na ma nyithu wi kizaben, “Aleshithsü mphi nu ayyinikhu wi kuwenglo. Atsa kesütanwa ghena anongü pi qai keben ti salo, kepaghenanye nthu yasa ketenwa tsüna wan gho nthu ssikaghashen den.

27 Jeremiya, no amighe mecang nan keten ti inyithu ghan-nan, nu mathu na khati kesa khe chüyalo.

28 Mathu na leben-dhu nu hhaghe pi lezza nu amighe kekhang ti. Mathu tsüdila maghangmeghe nu bvü kegoela nyu ghü saden.

29 Annibhon tsüna sa ntsa saben, isala amighekeku tsü tssüghe sen nu llebvü nten. Inyithu sametha lela kekiyi nmi, kepaghenanye anyi nkemehaithu tsü sen bvü nkesalina.

30 Mathu pi amighetssü ma men nkemi le ciaden, kepaghenanye hi Apvüwa, hi mathu meya mvu ladha.”

Rengma (N) (Re-editing) Bible - Kemethajüh (N) 

Copyright © 2016 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan