JEREMIYA 49 - Kemethajüh (N) (Re-editing) Bible (BSI)

Apvüwa Jühkekaghaten na Ammon miwi keben

¹ Hawa ha Apvüwa na Ammon cüki kekhi: “Israel nyithu na khiewi ben nu? Meshu kesütanla ma yyi khwekeya nmi kwe? Mangkesa na mathu na Molek cenpvü kinyi ketenthu ya Gad mizza yegu yaya nu ciwi nhang nu?

² Isala matsü kesü na ghoden, ciwi hi ghazen nyunutiwa Rabbah wi anyithu ya aghikesa hhai zaya thsüden, nu tsü yasa nu ma nyuthu mecang chiaben . Tsaseng wi Israel na ma yyi khuya kesathu wi tsü khu nengyaden.

³ Heshbon nyithu, magha shaghalo! Ai na yasadha! Rabbah wi nzathu, anongü wa yilo! Aleshithsü mphi nu anongülo. Chükivvü nu bvülo. Ncenpvü Molek pi ma keqhaikedithu nu kaditsathu ssinu gweghe kushiyyi wi bvüaden .

⁴ Nthu lebentsentsa nkesathu, Mangkesa na ashhüsa ten nu? Nthu kezü nmila bendha. Mangkesa na nthu ketanla nthu kekhang nondi nu thola nthu ssikaghashenya nbenle saten nu?

⁵ Hi nthu kechhenkevü tsüdi wina kemessi sengho nthu miwi chiaben, nthu na tsüdila bvüaden . Kesüsü tsüdila ma kahang ghena bvüaden, nu meshu kesüla nthu süpahithu ssigho nthu cü neng nben.

⁶ “Isala hi asakhen wi Ammon sapi mehai kayi thsüaben. Hi Apvüwa, hi khidha.”

Apvüwa Jühkekaghaten na Edom miwi keben

⁷ Hawa ha Apvüwa Kekhang ntsawa na Edom cüki kekhi: Edom nyithu na mathu kemetsa bhataghadha kwe? Mathu lenketsütsonthu na mathu nsenthu keyishü pi mathu kiza meyala kwe? Mathu kemetsa tsüdila bvüdha kwe?

⁸ Dedan nyithu, khapeghe nu bvülo! Kuthi yalo! Hi Esau shicübvüghathu yasale saben, kepaghenanye hi mathu meten cü keten matsü na ghodha.

⁹ Nyu na kemeshentsse bithu la lela mathu na maton wi pahan teshiaben, kaghanfüthu na aghaja wi gho nu mathu keya mvu ketan khuyaben.

¹⁰ Isala hi Esau shicübvüghathu kushitha pi nu mathu kekuthi penthu tsü kelishi, isanu mathu ya nkuthi thsülale kesalina. Edom nyithu tsüdila yasadha, mathu kesüla nmidha.

¹¹ Nthu maghamaghangthu teshi pi hi dhenchilo, hi mathu nonccayaden. Nthu denyithu na hi maghaki benya mehai.

¹² “Kemeten nkemu qothu lela kemeten hyiwa tsü jjüden, nthu kemeshen tsü nthu nmetenla benya benshe saten kwe? Nyele! Nthu na ahyiwa tsü njjüthu yishü!

¹³ Bozra nyunutiwa tsü ghang kemessi nu ayyikeshü kesü saaben kesa hi kishendha, nu anyithu na tsü nankeqhe nu tsü nyan pi kishen-keshi kesü saaben. Ketekevü wi anyuthu tsüdila yasa ben. Hi Apvüwa, hi khidha.”

¹⁴ Hi khi, “Edom, hi Apvüwa wi ketsijüh kesü muyadha. Ma nyilo kesü kesun pi mizzatentithu tsüdi mathu süpahi saghuya nu no ssikaghashen le kiden yalo kiza wa thsüdha.

¹⁵ Apvüwa na no sapi nkhang thsüla, nu anyi kesüla no nkinyi thsüla tendha.

¹⁶ Nwikesa na no mechudha. No ketanla no kemeshen ti thola no nmessile. No alonshi miwi ayikha wi hangden, no amumu kesü ti kemisi ntsa wi hangben lela Apvüwa na no zansha cüden. Apvüwa na khidha.”

¹⁷ Apvüwa na khi, “Keyasa Edom miwi gho keten tsüna qhethiketen ntsa sa nu anyi tsü pvüdhi kewa tsüdila amansa nu qhethiaben.

¹⁸ Sodom nu Gomarrah manyi nu manyi ketekevü anyutithu yasa kesa ti Edom miwi la saaben. Thola ciwi hang neng nbendha. Hi Apvüwa, hi khidha.

¹⁹ Ssensitemi kesü ayinong wina shhugho Jordan Ghaku khaghe sen amou kemejjü pen wi kedugho ti hi gho Edom nyithu pi mathu diyyiwa wina zuli bvü thsüaden . Thowa pi hi ghapeya mehai nu? Thowa na leben-jjan nu hi nniya mehai nu? Thowa kekhang kesen na hi matangya mehai nu?

²⁰ Tsalina hi Edom nyithu matangla kiden kethengwa, nu hi Teman nyunuti wi anyithu miwi kulile saben khe kinachilo. Mathu tsangathu lela zanshi piaden, nu anyi tsüdila keqhethiaben.

²¹ Edom keqanca hhai na ayyi mabenla pakuli, nu kemessi wi kiqai hhai na kelensie wi Aqaba Yyitssüvü wi lela zayaben.

²² Ghinyi na amumu na ma gisha zanshigü sen nu judugho keten ti Bozra ssikaghashen den. Tsü ghanan wi süpahithu na nza kesü kepvügha kinaa wi qhethiketen kesa ti saaben.”

Apvüwa Jühkekaghaten na Damaska miwi keben

²³ Hawa ha Apvüwa na Damaska cüki kekhi: “Hamath nu Arpad nyunuti keni wi anyithu na jühtheü nkemehai zakeya ghena leben güccü nu ketizesaben. Leben ketizensa pi luhiluza kesa na atssükedone kesü ti mathu miwi ben nu mathu na ccen benya nben.

²⁴ Damaska nyithu na nkhangla nu kemessi wina bvüdha. Mathu na naa nu atu-nkemi sapi nza kesü na atsa kepvügha wi kinaa ti sadha.

²⁵ Anyankethang nyunuti anonkeghe sa ketenwa tsü teshitha sadha.

²⁶ Tsü tsathang wi anyunutiwa lentontithu wi ma nyi kepvünyithu, nu süpahithu tsüdila pathiaben.

²⁷ Hi anni pi Damaska khweti miwi chi nu Kadimi Benhadad kadijjenthu mecang thsüaben. Hi Apvüwa Kekhang ntsawa, hi khidha.”

Kedar Mizza nu Hazor nyunutiwa miwi Ajühkekaghaten

²⁸ Hawa ha Apvüwa na Kedar mizza nu Hazor kekhu wi elakha Babylonia Kadimi Nebukhadnezzar na nkaya kesa tsü cüki kekhi: “Kedar nyithu ssisa nu nishuwa nyi mizza tsü yasalo.!

²⁹ Mathu nithsüjjen nu asahangthu, mathu nithsüjjen keshonthu nu ciwi keben tsüdila khuyalo. Mathu sunsiesathu khuya nu anyithu wi, ‘Kemessi na nthu tsüdi vüyadha le’ kizalo.

³⁰ “Hazor nyithu, hi Apvüwa, nthu na kelensie wi bvü wa kuthiwalo nthu kitsanben. Babylonia Kadimi Nebukhadnezzar na nthu matangle acho kidenyadha, nu ma hati khiben,

³¹ ‘Ghalo! Ithu anyi yazishu nu apvü-nsala kebenthu ssikaghashen na! Mathu nyunuti na khweti-jenka nyelela khen ntheng nu kekhwe mangla nmi le!’

³² “Mathu sunsiesathu nu asahangthu tsüdi zan yalo! Hi anyi alica pi milute sapvü ketenthu tsü jügüzighe pi alen tsüdi wi wa thsü, nu hi apen tsüdi wi kededi sengho mathu miwi chiaben .

³³ Hazor pi anuphan ayyikeshü kesü nu whewhethu kahang pen kesü sa thsüaden . Thola ciwi hang neng nbendha. Hi Apvüwa, hi khidha.”

Elam miwi Apvüwa Jühkekaghaten na keben

³⁴ Zedekiya na Judah kadimi saya meyi Apvüwa Kekhang ntsawa na Elam diyyiwa cüki pi hi kiza.

³⁵ Ma khi, “Hi alamugho kepiethu na Elam sapi khang ntsa kesa thsüthu tsüdi pathiaben .

³⁶ Hi ameghü shopi alen tsüdi wi Elam mo thsü, nu hi ma nyithu na kushinyi sa sen nu diyyi tsüdi wila npi wa keya chu ma nyithu jügüzigheaden.

³⁷ Hi Elam nyithu sapi mathu ghinyithu mathu pathi mvu kebenthu tsü messi thsüden. Hi ileben ketsu wina Elam nyithu yasa nu hi mathu npi keyasakhi chu ghinyi süpahizithu kesun pi mathu shunden.

³⁸ Hi kadimithu nu accülikesathu yasa nu hi kadipen pi ciwi piekiden.

³⁹ Isala hi asakhen wi Elam nyithu sapi mehai nengya thsüaden . Hi Apvüwa, hi khidha.”