JEREMIYA 48 - Kemethajüh (N) (Re-editing) Bible (BSI)

Moab Keyasa

¹ Hawa ha Apvüwa Kekhang ntsawa na Moab cüki kekhi: “Nebo nyithu tizendhale— mathu nyunutithu yasadha! Kiriathaim nkayadha, ma khwetikevü na qancadha, nu ma nyithu na kejügheyadha;

² Moab kemehai na nmidha. ghinyithu na Heshbon nkaya, nu Moab mizzatenti yasale acho kidenben. Madmen nyunutiwa na ccen saaben; süpahizithu na lentsen sen nu tsü matangden.

³ Horonaim nyithu na qaiben, Yasayala! Kededi!

⁴ ‘Moab yasadha; Ghanyithu na qai keben tsü kina chilo.

⁵ Mathu na Luhit len wi keshu chuli mathu kekishi hhai tsü, Horonaim wi kecü len ahathanala qai keben tsü kinachi.

⁶ Mathu na khiben, “Wanlo, nthu hangyale kesalina bvü yalo! Ayyikeshü wi aghang gada ti bvü yalo!”

⁷ “Moab, no no kezü nu keben-keyeng nondiben, isala khili no lela nkaya tendha; ncenpvü Khemosh na ma kaditsathu, nu keqhaikedithu gweghe kushinyi sa wa tendha.

⁸ Anyuti kesütanla kedediwa tsü ghüya nben; yyiketijü nu deshentijü manyi qho yasaben. Hi Apvüwa, hi khidha.

⁹ Moab ghena ashüjjen lon kesü piekiya; tsüna wan yasa tendha. Tsü nyutithu na yasa pi teshiaben, nu thola ciwi hang neng nbendha.”

¹⁰ (Anyi ma leben tsüdi pi Apvüwa kekuli nkesawa kishen cülo. Anyi njünnu pi kagha nu nyu nkesüdhithu kishen cülo.)

Moab nyunutithu Yasadha

¹¹ Apvüwa na khi, “Moab na keshüthangla yazishu hang nu khiela ssinu kushiyyi wi nwa. Maob na kisengtssü pa nkethu nu pi akhüti kesü wina pi kepawa wi meyisha nketen tsüti le. Ma hankedemvu na npi bhatagha, nu ma kenyan na keshüthangla makesü.

¹² “Tsalina khili hi anyi kesun pi Moab pi kisengtssü ti keshusha keten matsü na gho tendha. Mathu na ma kisengtssü khüti pi ghacang thsü nu tsü pacha zigheaben.

¹³ Tsaseng wi Moab nyithu la Israel nyithu na nondi kegho Bethel cenpvü ghena jüghekeya ti mathu cenpvü Khemosh ghena kejüghe yaben.

¹⁴ “Moab nyithu, nthu na mangkesa na aghi sanankea nyi, süpahi kempvüzathu le khiten nu?

¹⁵ Moab nu ma nyunutithu na yasadha; ma nyi kepvüza kemehai ntsathu süthidha. Hi Apvüwa Kekhang ntsawa. Hi kadimiwa, hi khidha.

¹⁶ Moab kededi na wan gho tendha, ma kepasa na wan gho tendha.

¹⁷ ‘Mizzatenti katsüwa ghena qailo, nthu tsü katen wi kahangthu, nthu tsü nyankethang chü kebenthu tsüdi. “Khang ntsawa sa keben tsüna pakhhidha; ma nyankethang nu ma kekhang nmidha le! isa khilo.

¹⁸ Nthu Dibon wi hang kebenthu, nthu kekinyikü pen wina dugholo, nu ayyinikhu miwi donkilo; Moab keyasawa na hewi tendha, nu ma khweti yasa pi thengdha.

¹⁹ Nthu Aroer wi kahangthu, alen wi ngan nu hielo; bvü ketenthu wi keüchi, mathu wi mangwa sadha khe chüyalo.

²⁰ Mathu na luneng ben, ‘Moab na qancadha, tsü ghena qailo, tsü kimennidha. Arnon Ghaku niela thangchilo, Moab tsüna yasadha le!’

²¹ “Yikha shoniketijü nyunutithu miwi ajüh kekaghaten na ghodha: Holon, jaza, Mefath,

²² Dibon, Nebo, Beth Diblathaim,

²³ Kiriathaim, Bethgamul, Bethmean,

²⁴ Kerioth, nu Bozra. Ajüh kekaghaten na Moab nyunutithu kelensie nu akete tsüdi miwi ghodha.

²⁵ Moab kezü pachadha; ma kekhang pachadha. Hi Apvüwa, hi khidha.”

Maob Satemeni cüaden

²⁶ Apvüwa na khi, “Moab sapi adina thsülo, kepaghenanye ma hhaghe nu hi matangden. Moab na ma ketanla ma keduwe wi kuweng den, nu anyithu na ma nankeqheden.

²⁷ Moab, no khati Israel nkhichila nankeqhe khe meshen neng nanlo. No kaghanfü khang kesü na mathu ghanyakea ti mathu miwi kulitheng.

²⁸ “Nthu Moab wi kahangthu, nthu nyunuti teshilo! Wala alonshi miwi hanglo! Nkhetsü na alonshiku wi ma ghacen sa ketenwa tsüti salo.

²⁹ Maob na kapvü mtsü! Anyithu na khatila kapvü, awisa nu dithang nu mathu ketanla mathu ghena meshen benten khe hi zayadha.

³⁰ Hi Apvüwa, mathu awikesa tsü hi chüben. Mathu kedithang na mangla saya nben, nu mathu na kuli keten tsüna kesie benya nben.

³¹ Tsalina hi Moab wi anyi tsüdi nu Kir Here nyithu ghena qaiden.

³² Hi Jazer nyithu ghena qai kesa miwi lela Sibma nyithu ghena qaiden. Sibma nyunutiwa, no kemeshentsse ton na ma cüna chang sen Keshü Tssükedone thenkeghe sen wa Jazer cu keben ti kesa. Isala khilitsü no kemazu kedsau nu kemeshentsse bithu na yasadha.

³³ Moab yyi kenyanwa wina anonkeghe nu kenen sen bvüdha. Hi kisengtssü kemisügüpen wi kisengtssü lle keshhugho khendha; thola kisengtssü sa nu anonkeghe ghena jisha keten nmidha.

³⁴ “Heshbon nu Eleale wi anyithu na magha shagha, nu mathu kemagha na Jahaz kecu wila zaya mehai; tsüna Zoar wi anyithu la zaya mehai, nu tsüna Horonaim nu Eglath Shelishiya kecu wila zaya. Nimrim Kuza lela keqha,

³⁵ Hi Moab nyithu ya mathu kekinyipenthu wi mecang pi kekinyi nu ahhansha sapi mathu cenpvüthu kecü khen shaden. Hi Apvüwa, hi khidha.

³⁶ “Tsalina ileben wi Moab nu Kir Here nyithu ghena anonkegü na anyi pahan na mathu keben tsüdi nmila kesa ghena lalali khou pi keshü khwi sa keben ti saaben.

³⁷ Mathu tsüdila ali nu apangkenye whidha. Mathu tsüdila mathu kwen wi ayisü sa, nu tsüdila aleshithsü mphiben.

³⁸ Moab jjenmili tsüdi nu anyi kesaghupen tsüdi wi anonkegü ketan sadha, kepaghenanye hi Moab pi akhüti kesü ti pakhhi nu thola nkeya mvu sadha.

³⁹ Moab pachazighedha! Maghala qailo! Moab na kejügheyadha! Tsü yasadha, nu tsü kevü wi mizzatenti tsüdila ma nankeqheben. Hi Apvüwa, hi khidha.”

Moab na Bvükeya mangla nmi

⁴⁰ Apvüwa na khishidha, mizzatenti kesü na amumu ma gisha zanshigü sen nu kedugho ti Moab miwi dughoden,

⁴¹ nu anyuti nu akhwetithu nkayaden. Tsü ghanan wi Moab süpahithu pateqhe pi nza kesü atsa kepvügha wi ketizensa keten ti saaben.

⁴² Moab yasa nu mizzatenti kesü nsa nengdha, kepaghenanye ma hhaghe nu hi matang kesalina.

⁴³ Kemessi, acakechhü, nu aca na Moab nyithu hieben. Apvüwa na khidha.

⁴⁴ Thowa na kemessi tubvüle kiden khe ayyiku wi khuli duaben, nu thowa na ayyiku wina shuale kiden khe aca wi yayaben, kepaghenanye Apvüwa na Moab ghena kededi tsüwa ssan pi thengdha.

⁴⁵ Kushinyi kekiqa nkemithu na kuti tsüwi Kadimi Sihon na kekhang kesen nyunutiwa Heshbon witsü khweyale sa isala tsüna khili anni na qheben. Anni na aggü wi nu ayikha kemisi wi Moab nyi aghikenenthu mecangdha.

⁴⁶ Moab nyithu tizen dha man! Khemosh kinyi ketenthu yasadha, nu mathu tsangathu na atssüzü sa bvüdha.

⁴⁷ Isala atsathang ghaketen wi Apvüwa na Moab sapi mehai nengya thsüben. Apvüwa na khi ketheng hathu tsüdi Moab miwi saaben.