JEREMIYA 47 - Kemethajüh (N) (Re-editing) Bible (BSI)

Apvüwa na Filistia ghena Ketsijüh khukechi

¹ Ejipt kadimiwa na Gaza npi ssikaghashen wi Apvüwa na Filistia ghena hi ccüneng.

² Ma khi, “Ghangchilo! aghawa atssü na dugho tendha, nu aghaku kesü ti di pi atssüdan saben. Tsüthu na ayyi nu ma miwi keben tsüdi mejjenphon shaben, anyunutithu nu ciwi kahang anyithu la. Anyithu na kekiqa khie shagha; ayyi wi anyi tsüdila qaishüca saaben.

³ Mathu na goru lenketsen, gorugari kekichenli, gorugari ccü kenyeggü hhai la zaben. Abathu na atsangathu ghena kheneng nben; mathu kwen na mnankezü nu pieki meya laben.

⁴ Filistia yasa keten tsüwa na ghodha, Tur nu Sidon wi kekiqa kebenthu tsüdi khenpia le kesalina. Hi Apvüwa, hi Filistia nyi yasa cüden, Kreta ghüsa wina keghothu tsüdi.

⁵ Ahathakina keti na Gaza nyithu miwi ghodha, nu Ashkelon nyithu na ccen sadha. Filistia na hela khathu anongü ten nu?

⁶ Nthu na hati khi, ‘Apvüwa njünnu le! No matsü khathu kagha ben ten nu? No kethengpen wi du neng lo, ciwi ccen benwalo!’

⁷ Isala tsüna hi kekuli salo pi ma kecü wi khati nganben wa nu? Hi tsü ya Ashkelon nu anyi aghüsa wi kahangthu ssikaghashenlo ahza khuchia.”