JEREMIYA 46 - Kemethajüh (N) (Re-editing) Bible (BSI)

Karkhemish wi Ejipt chayakesa

¹ Apvüwa na mizzatentithu cüki pi hi ccüneng,

² Ejipt pi atuwa sa. Hawa ha ma Jehoiakim na Judah kadimi saya nu mejüwa mapi wi Babylonia Kadimi Nebukhadnezzar na Eufrat Ghaku kete wi Ejipt Kadimi Neko süpahizi chayakesa cüki kekhi:

³ “Ejipt nyi kadimithu na jisha, ‘Nthu tsonhithu kidenya nu aghi wi dulo!

⁴ Nthu goruthu huya nu tsüthu miwi kiya! amighe liwen pvü nu kesennieya! Nthu pie yiyha saya! Nthu ghighe pvüyalo!’

⁵ Isala Apvüwa na keü, ‘Isala hi mangwa muya nu? Mathu na messi ntsa nu kheneng ghoben. Mathu süpahithu jügü neng bendha; mathu na bvüya kemehai chu bvü, nu aseng wi n-ghangchi.

⁶ Kembhi ntsathu la bvü meya; süpahithu la bvü meya. aghawa wi Eufrat wi mathu na accümeshü nu khuliben.

⁷ Nil Ghaku ti shagha aghaku kesü na aghüsa mejjen wa keben ti hana thowa nu?

⁸ Tsüna Ejipt, Nil Ghaku ti shagha aghaku kesü na aghüsa mejjen wa kebenwa tsü. Ejipt na khi, “Hi shagha ayyi pong cüden; hi anyunutithu nu anyi ciwi hang kebenthu yasa cüden.

⁹ Goruthu nu gorugarithu ya mbhi ntsa wa thsü! Süpahithu kesunshi chilo; Sudan nu Libia nyi atsonhi kepvüthu, nu Lidia wi alamugho kepiethu!’ ”

¹⁰ Hana Kemisintsa Apvüwa Kekhangwa tsathang: ma nansü ajukhi yaden; ma nansü ma ghinyithu meten cüden. Ma njünnu na mathu dsa pi npi pongkeya chu dsaben, nu mathu jjü jjü pi aleben gha nkeya chu jjüden. Nansü Kekhang ntsawa na ma nkechathu pi aghawa Eufrat wi ahhansha saben.

¹¹ Ejipt nyithu, Gilead wi dawa bhayalo! Nthu dawa tsüna nsenla kemehai chüyadha; mangla nthu sapi mehaiya nben.

¹² Mizzatentithu na nthu kejüghe keya zayadha, nu mathu tsüdila nthu kiqai zayadha. Süpahi kesü na nyu ccümeshüya nu manyi qho ayyi wi khuliduben.

Nebukhadnezzar na kegho

¹³ Babylonia Kadimi Nebukhadnezzar na Ejipt ssikaghashen kegho wi Apvüwa na hi ccüneng. Ma khi,

¹⁴ ‘Ha pi Ejipt nyutithu Migdol, Memfi, nu Tahpanhe wi thangchilo; “Nthu ketanla nthu khweyale kesa ghena kiden yalo! Nthu keben tsüdila aghi wi yasaben!

¹⁵ Mangkesa na nthu cenpvü kekhangwa Apis na qanca nu? Apvüwa na ma kihhesha pidha le!”

¹⁶ Nthu süpahithu na accümeshü nu khulidha; mathu khokho wi khi, “Wanlo! Ithu ajjen wi ithu nyithu wi wha nu ghinyithu njünnu ghüya na!”

¹⁷ “Anyan ketheü kesü pi Ejipt kadimi cülo— ‘Nponmeghe pi ammisa nu matsü cüzzi kesawa.’

¹⁸ Hi Apvüwa, Kekhang ntsawa, hi Kadimiwa. Hi hangkeben Nyizawa. Tabar Yikha na ayikhathu miwi misiki Karmel Yikha na atssükedone miwi la misiki ntsa kesa ti, no ssikaghashen ketenwa kezü la tsüti saaben.

¹⁹ Nthu Ejipt nyithu, atssüzü sa wale kesa ghena kiden yalo! Memfi sapi ayyikeshü kesü ceng shaben, yasa pi thola nkahang pen kesü saaben.

²⁰ Ejipt na ameshü ghala kemehai kesü ti, isala aghawa na mti keten nikho kesü gho ma ssisa.

²¹ Melli senketen süpahithu lela amesü zzathu ti kiqa meya. Mathu na ngan nu nyu kaghashen meya; mathu tsüdila khapeghe bvüdha. Mathu keshü tsathangwa na gho cudha, nu tsüna mathu kededi tsüwa.

²² Ejipt na amaghang kesü hhai ti sa bvü, ghinyi süpahi na tetsaki kegho wi. Mathu na ampvüthu pi ma ssisa, anyi na achantonthu shüchi keben ti,

²³ nu ayinong yasa keben ti. Mathu nyithu na ji mtsü nu sikhi meya; mathu süpahi na ashiqathu miwi jiki.

²⁴ Ejipt nyithu pi kejügheya thsüdha; aghawa anyithu na mathu nkayadha. Hi Apvüwa, hi khidha.”

²⁵ Apvüwa Kekhang ntsawa Israel Nyiza na khi, “Hi Amon cenpvü Thebe pi Ejipt nu ma cenpvüthu nu kadimithu saghula meten cüden. Hi Ejipt kadimi nu kenondi pi ma miwi chi ketenthu tsüdi khuya

²⁶ nu pi mathu pathiale kebenthu Babylonia Kadimi Nebukhadnezzar nu ma süpahizi kwen wi chiale saben. Isala asakhen wi hathu tsüwi ti anyi na Ejipt wi hang neng den. Hi Apvüwa, hi khidha.”

Apvüwa na Ma nyithu Hangsha yaden

²⁷ “Inyithu, nmessi lalo, Israel nyithu, qhethiketen nsala. Hi ayyi kelensie wina nthu kekasha yaden, nthu na atssüzü sa keben yyi wi tsüna. Nthu na ajjen wi gho neng nu cca hang yaben; nthu na yazishu benya, nu thola nthu satemessi nbendha.

²⁸ Hi nthu wi gho nu nthu hangsha yaden. Hi nthu jügüzighe pi chiketheng wi mizzatentithu tsüdi yasaden, isala hi nthu tsü yasa nten. Hi nthu nmetenla bvü thsüaben; isala hi nthu meten cü lethu, kemeshon wi saaben. Hi Apvüwa, hi khidha.”