JEREMIYA 42 - Kemethajüh (N) (Re-editing) Bible (BSI)

Anyithu na Jeremiya na Mathu ghena Khielo kekhie

¹ Tsaseng wi süpahizi ccülikesathu tsüdi pi Kareya tsa Johanan, nu Hoshaiya tsa Azariya saghu pi anyi kepapa kesa tsüdi ssigho

² nu hi wi khi, “No nchala ikhang na no wi mangwa khie khe sa cülo. Apvüwa ithu Nyiza wi ikhang ghena khie cülo. Ikhang hang keyathu tsüdi ghena khie cülo. Kuti tsüwi ikhang na anyi kejon keben, isala khilitsü no mu keben ti ikhang na anyi kezeng-u ketan sadha.

³ Apvüwa ithu Nyiza na ikhang walo kesa len nu nsathu keyishü pi ikhang ccüca thsüle kesalina ikhang ghena khie cülo.”

⁴ Hi luneng, “Isathu mantsadha. Nthu na kekhi ti hi Apvüwa ithu Nyiza wi khie na, nu ma mangwa khi khe hi pi nthu kiza na. Hi mangla pi nthu kuthi nben.”

⁵ Tsaseng wi mathu na hi wi khi, “Apvüwa ithu Nyiza na ikhang ghena ajüh khuchi pi no kecü tsüdi nkinala lethu, Apvüwa yala atsentsa nu jühtsentsa kesa chüza sala ikhang kematangwa salo.

⁶ Ikhang na tsü nenle n-nen lela, ikhang na no ma wi ikhang ghena khielo khi kebenwa Apvüwa ithu Nyiza jüh kinaden.”

Apvüwa na Jeremiya Kekhie luneng kechi

⁷ Ghanan tagha sengwi Apvüwa na hi ccüneng;

⁸ tsalina hi Johanan, ma gweghe keten süpahizi ccülikesathu, nu anyi kepathu tsüdi cighuchi.

⁹ Hi mathu wi khi, “Apvüwa Israel Nyiza, nthu na hi nthu ghena kekhie salo kesun pi ma wi kechiwa na khi,

¹⁰ ‘Keujüla nthu na ayyi hawa wi hang ben mvu lethu, hi nthu pasha kesawa nyela nthu pieki cüden; hi nthu pfüpi kesawa nyela pi sheng cüaden . Hi keyasa sengho nthu miwi kechi ghena ihathana mtsüdha.

¹¹ Babylonia Kadimiwa nmessila yilo. Hi nthu ssiden, nu ma kekhang wina nthu kekasha cüaben.

¹² Kepaghenanye hi nyu nantizen ntsa saden, hi ma sapi nthu nantizen thsü nu nthu ya ajjen wi wha neng thsüaben. Hi Apvüwa, hi khidha.’

^13-15 “Isala nthu Judah wi teshi ketheng anyithu nthu na Apvüwa nthu Nyiza jüh nkinala nu ayyi hi wi nhang mvu sa yishü. Nthu na hati khi yishü, ‘Nyele, ithu na Ejipt wi wa hangden, ciwi ithu na aghikesa nmetudha, nyelela aghikesa hhai za nu nghamadha.’ Keujüla nthu na hati khi lethu, Apvüwa Kekhang ntsawa Israel Nyiza na khiben, ‘Keujüla nthu na wala Ejipt wi hangle meshen lethu,

¹⁶ nthu na messi keten aghikesawa tsüna nthu ghanya, nu kaghama nthu na messi keten tsüna nthu nieben, nu nthu na ciwi Ejipt wi shüaben.

¹⁷ Ejipt wi wala hangle kesa meshen keten anyithu tsüdila aghikesa, kekhhwenthi, nyelela kesakinaa ghei wi shüben. Mathu thola hangya nben, kesüla hi kededi sengho mathu miwi chile keben witsü bvüya nben.’

¹⁸ “Apvüwa Israel Nyizawa na khiben, ‘Ileben ketsu keminu meyisha pi Jerusalem nyithu miwi kechi tsüti nthu na Ejipt wi wa lethu, ileben keminu meyisha pi nthu miwi chiben. Nthu ghang pi qhethiketen kesa kesü saaben; anyithu na nthu nkhichi nu nthu nyan pi kishen- keshi kesü sa senben. Nthu na khiela apen ha mu neng nbendha.’”

¹⁹ Tsaseng wi hi pala khi, “Apvüwa na nthu Judah wi teshi ketheng anyithu na Ejipt wi nwa lalo kizadha. Tsalina hi khili nthu kitsanben,

²⁰ nthu na keshü qo kesazzi kesü saaben. Nthu na hi Apvüwa ithu Nyiza wi nthu ghena khielo, nu nthu na ma ajüh khukechi tsüdila saaben le khishitheng.

²¹ Nu hi khili nthu kizadha, isala nthu na Apvüwa ithu Nyiza na hi kesun pi nthu kekiza jüh tsüdila n-nie mvulaben.

²² Tsalina ha meshenyalo: nthu na wa hang mvu keben yyi witsü nthu na aghikesa, kekhhwenthi, nyelela kesakinaa ghei wi shüaben.”