JEREMIYA 40 - Kemethajüh (N) (Re-editing) Bible (BSI)

Jeremiya na Gedaliya gweghe keben

¹ Benchüwa Nebuzaradan na Rama wi hi teshichi kesa sengwi Apvüwa na hi wi kiza. Amighe ssüli pi hi hu sen nu Jerusalem nu Judah wi ssisen atssüzü sa wa keten anyithu tsüdi gweghe Babylonia wi wa.

² Benchüwa na hi cidhi sen wa nu khi, “Apvüwa n-Nyiza na keyasa pi ayyi hawa khiteqhe,

³ nu ma khili ma mangwa sale khi khe sacendha. Hathu ha tsüdila saaben, kepaghenanye nthu nyithu na sami pi Apvüwa shun nu ma jüh nkinala.

⁴ Khili hi amighe ssüli pi nkwen hu ketheng ha khu nu no lisha chiaben . Keujüla no hi gweghe Babylonia wi wa mvu lethu waya mehai, nu hi no noncca yaben. Isala no nwa mvu lela mangla nsa. No diyyiwa maben wila no kenen pen kessiya mehai, nu no khiewa wa mvu khe waya mehai.”

⁵ Hi luneng nchila nan Nebuzaradan na khi, “Shafan tsawa Ahikam tsa Gedaliya, Babylonia kadimiwa na ma pi Judah nyutithu miwi ahng sa thsü kethengwa wi wa nenglo. No ma gweghe ben nu anyithu jawi hangya mehai, nyelela no kahe wi lela no nwathu keyishü pen wi waya mehai le.” Tsaseng wi ma aju kesü pi hi cü, nu kedsakejjü pahan khuya thsü nu hi yala bvü thsüa.

⁶ Hi Mizpah wi Gedaliya gweghe ben le wa nu ayyi tsüwa wi teshi pi ketheng anyithu jawi hang wa.

Judah Anhgwa Gedaliya

⁷ Judah süpahithu nu kedithu pahan na nyu kwen wi ndu. Mathu na Babylonia kadimiwa na Gedaliya pi ayyi hawa wi anyi kahhatu ntsathu ssinu Babilon wi nwala kesathu tsüdi miwi ahng sa thsüdha kesa zaya.

⁸ Tsalina Nathaniya tsa Ishmael, Kareya tsa Johanan, Tanhumeth tsa Seraiya, Netofa wi Efai tsathu nu Maaka wina keghowa Jezaniya na mathu nyithu ssinu Mizpah wi Gedaliya wi wa.

⁹ Gedaliya na mathu wi khi, “Hi ijüh pi nthu cüben, nthu na Babilon nyithu kwen wi duale kesa nmessi lalo. Ayyi ha wi ben nu Babylonia kadimiwa kekuli sa, isathu nthu ghena tsüdila mehai yaben.

¹⁰ Hi Mizpah wi benden, nu Babilon nyithu na hewi kegho wi hi nthu mithon saaben. Isala nthu na kisengtssü, kedsau, nu oliv deli hathu saghu pi thengya nu nthu nyuthu wi hang yalo.”

¹¹ Tsüti sakeben wi Israel nyithu na Moab, Ammon, Edom, nu diyyi kepathu wi kebenthu tsüdi Babylonia kadimiwa na Israel nyithu pahan pi Judah wi hang walo sadha nu Gedaliya pi mathu ahng sa thsüdha le kesa zaya.

¹² Tsalina mathu na mathu jügüzighe pi chikea penthu tsü teshi nu Judah wi gho neng. Mathu na Mizpah wi Gedaliya wi gho nu ciwi mathu na kisengtssü nu kedsau kejonla saghuya.

Gedaliya Pathikea

¹³ Haseng wi Johanan nu süpahithu ccülikesathu nyu kwen wi nkeduthu na Mizpah wi Gedaliya wi gho

¹⁴ nu ma wi khi, “Ammon Kadimiwa Baali na no pathiale Ismael kesun kechi tsü no nchü kwe? Isala Gedaliya na tsü n-nondi.

¹⁵ Tsaseng wi Johanan na kuthila ma kiza, ‘Hi ya wala Ishmael pathi thsülo, isathu thola thowa na tsüti sa khe chü nben. Mangkesa na ma ya no pathi thsüa nu? Tsüti sa lethu Judah nyi saghu nu no vü kebenthu na bvüzighe, nu kededi sengho Judah wi teshikea anyi tsü miwi chiaben.’ ”

¹⁶ Isala Gedaliya na luneng, “Tsüti nsala! No Ishmael cüki khi keben tsüna atsentsawa nyele!”