JEREMIYA 4 - Kemethajüh (N) (Re-editing) Bible (BSI)

Lebenkhapegheyalo keci

¹ Apvüwa na khiben, “Israel nyithu, nthu na kheneng mvu lethu hi wi kheneng gholo. Nthu na hi nkenanmvu tsikezhüthu tsü khupia, nu hi wi jühtsentsa sen lethu,

² nthu na inyan wina kishenya kemehai na ben. Isathu mizzatenti tsüdila hi ya sawegü pi mathu cülo kesa khieben, nu mathu na hi sengben.”

³ Apvüwa na Judah nu Jerusalem nyithu wi kiza, “Nthu alli npi kechhüthu chhüya; amacü pi aghazü jawi nvvüchila.

⁴ Nthu Pvüwa, hi ssinu cenkethenjüh tsü nieya, nu nthu ketanla nthu pi hi cülo, nthu Judah nu Jerusalem nyithu. Keujüla nthu na tsüti nsa lethu, nthu nkemehai sa kethengwa tsü ghena hi aghekepvü na anni ti qhe aben. Tsüna mecangden, nu thola tsü patenenya nben.”

Kenka pi Judah Pateqhekesa

⁵ Ayyi tsüdi wi tutuwa khou chilo! Misikhhali nu methasi khou chilo! Judah nu Jerusalem nyithu kiza khweti vüketheng nyunutithu wi bvülo.

⁶ Alen tsütson pi Zion wiwa chi! Hangyale kesa ghena bvüyalo! Nminula! Apvüwa na aghawa na kededi nu keyasa keti sen nu ghoden.

⁷ Ssensitemi na ma ku wina pen shhugho keten ti, mizzatentithu keyasawa na lentsen chidha. Ma Judah yasale ghoden. Judah nyunutithu na yasa pi teshiaben, nu thola ciwi nhangdha.

⁸ Tsalina alishithsü mphi nu qailo nu kohon, kepaghenanye Apvüwa lebenketsu nkemehai na Judah wina kheneng nbvü ladha.

⁹ Apvüwa na khi, “Tsü ghanan wi kadimithu nu kedithu na kempvüza nmi laden; keqhaikedithu na qhethi nu atusenjüh-kechüthu na amansa ben.”

¹⁰ Tsaseng wi hi khi, “Kemisintsa Apvüwa, no Jerusalem nyithu mechu ntsa sadha! No kekhi na ciwi kecca ben tenle khi, isala njünnu kesü na mathu sun wi bendha.”

¹¹ Jerusalem nyithu wi ayyikeshü wi ameghü kisa na sho sen nu mathu wiwa gho tenle kesa mathu kekiza tsüna gho tendha. Tsüna ameghü na nkhena sho nu asugwen mo pi bvü ketenwa tsü nye —

¹² Apvüwa jühkekhi wina gho keten ameghü tsüna tsü miwi khangki ben! Apvüwa na ma ketanla ma nyithu miwi agükeccü khishiben.

Ghinyithu na Judah vüyakesa

¹³ Ghangchilo, ghinyithu na akulukeshü ti gho tendha. Ma ghikesa garithu na khutsue kevü ti, nu ma goruthu na amumu miwi mbhiki. Ithu na bhataghadha! Ithu na dedidha!

¹⁴ Jerusalem, nleben wi nkemethawa tsü khupilo, isalethu no hangsha yaben. No matsü khathu kesami kekuli meshen benten nu?

¹⁵ Dan nyunuti nu Efraim yyishiphon wi nyilothu na jühtheü nkemehaiwa tsüpi thangchi.

¹⁶ Mathu na mizzatentithu kitsan nu Jerusalem wi diyyi kelensie wina ghinyithu na gho tenle kesa kizale ghodha. Ghinyi hathu hana jisha pi Judah nyunutithu shun,

¹⁷ nu anyithu na alli hie keben ti Jerusalem vüyaden, kepaghenanye ma nyithu na hhaghe nu Apvüwa shunden. Apvüwa na khidha.

¹⁸ Judah, no kahang yen nu no kekuli sa kethengthu tsü ghena no ketanla ha sengho nmiwi chiyadha. No kesami na agükeccü ha pfüsi chidha; tsüna nleben kecunbhi dudha.

Jeremiya na ma nyithu ghena hathakina

¹⁹ Kenaa le! Hi kinaawa tsü npvüchadha! Ileben le! Ileben na dhendhen mtsüdha! Hi ccen ben meyadha; hi tutuwa kekhou nu aghi kejisha hhai zaben.

²⁰ Kededi na kesennie ben; Diyyiwa tsüdila yasa pi teshidha. Zuli ithu nithsüjjen na yasadha; tsüthu keshonthsü na mezüqhedha.

²¹ Hi matsü khathu aghi kedhuwa tsü mu, nu tutuwa kekhou hhai zaben ten nu?

²² Apvüwa na khiben. “Inyithu na kejüphon; mathu na hi chü meya. Mathu na ghanyi mangla nkechü ti; mathu na mangla chüshikeya nmi. Mathu na nkemehai tsü sachü ntsawa; isala kemehai tsü saya nten.”

Jeremiya na keyasa gho keten kemu

²³ Hi ayyi wi ghangchi nan, tsüna yasa pi methasi sa benla; atssan wi, kewegü nmi.

²⁴ Hi ayikhathu ghangchi nan, tsüthu na kuliben, nu yyishiphon thu na wanan ghonan saben.

²⁵ Hi ciwi anyi thola nmu; awathu lela pighe bvüdha.

²⁶ Ayyi kenyan na ayyikeshü kesü sadha; tsü nyunutithu na yasa Apvüwa lebenketsu kekhangwa ghena.

²⁷ (Apvüwa na ma ayyi mabenla yasaben, isala ma tsü yasatha sa nben khitheng.)

²⁸ Ayyiwa na anongü; atssan na jang waden. Apvüwa na khidha, nu ma kemeshen kemili nben. Ma ma jüh südhedha, nu kheneng nbendha.

²⁹ Gorukessithu nu alamugho kepiethu kemagha wina tsüdila bvüaben. Pahan na ayinong wi bvü; kepathu na alonshithu megheben. Anyuti tsüdila teshi pi kaghacang sa, nu thola tsüthu wi nhang neng laben.

³⁰ Jerusalem, no dedidha! Mangkesa na no athsü kenmie mphi ten nu? Mangkesa na no alon menkedhu pi nghe sa pvü, nu n-nyon nyen pvü ten nu? No ma men nkemi wi ntsisa pi mehaipfü saben! No kenenthu na no yisha, nu no pathi mvu ben.

³¹ Hi nza na kepvügha wi kemagha hhai ti kesa kesü zaya, nza kesü na ma nga atuwa mukeya wi kemagha hhai ti kesa. Tsüna Jerusalem na ahatha nshuchala kesa kemagha hhai, ma kwen changchi nu khi, “Hi dedidha! Mathu na hi pathile gho tendha!”