JEREMIYA 37 - Kemethajüh (N) (Re-editing) Bible (BSI)

Zedekiya na Jeremiya wi Keshükenekesa

¹ Babylonia Kadimiwa Nebukhadnezzar na Josiya tsa Zedekiya pi Jehoiakim tsa Jehoiakhin kuti wi Judah kadimiwa sa thsüa.

² Isala Zedekiya nu ma kekhu wi kedithu nyelela anyithu thola Apvüwa na ketsijüh pi hi kecü tsü nkina mvu.

³ Kadimi Zedekiya na Shelemiya tsa Jehukal nu Maaseiya tsa Zefaniya keqhaikediwa manyi kesunchi pi hi ya ithu mizzatentiwa mithon wina Apvüwa ithu Nyiza wi kekhie salo keü thsü.

⁴ Tsüna hi pi atssüzüjjen wi npi chi nu hi anyithu jawi ntaqhe kegoeden.

⁵ Babylonia süpahizi na Jerusalem vüsen ben, isala mathu kusi na Ejipt süpahizi na Ejipt ggü pvüdhi ghodha le kesa zaya khe mathu na aseng kheneng.

⁶ Tsaseng wi Apvüwa, Israel Nyiza na hi kiza

⁷ nu Zedekiya kizalo khi, “Ejipt süpahizi na no kiqale ghoden, isala tsüna ajjen wi whaneng ben.

⁸ Tsaseng wi Babylonia nyithu na ghoneng nu anyunutiwa ssikaghashen nu tsü yaya nu mecang shaben.

⁹ Hi Apvüwa, no kitsan chiben, Babylonia nyithu na gho neng nbenle meshen nu no ketanla no nmechula, kepaghenanye mathu na gho neng metsiden.

¹⁰ Keujüla nthu na Babylonia süpahizi maben chaya nu mesa-mena keyathu ketan teshi pi mathu nithsüjjen wi chi lela anyi tsüthu na shagha nu anyunutiwa ha mechang shaben.”

Jeremiya ghanya nu pi Atssüzükesa

¹¹ Ejipt süpahizi na tetsaki gho keten ghena Babylonia süpahizi na Jerusalem wi waneng.

¹² Tsalina hi Jerusalem teshi nu wa Benjamin yyi wi itheghi keben-keyeng wi ishei khuyale sa.

¹³ Isala hi wala Benjamin khweti-jenka cukeya wi süpahizi ghikehiethu miwi kediwa, Hananiya tsawa Shelemiya tsa ma nyan Irija na hi khen nu khi, “No Babilon wiwa bvü tendha man!”

¹⁴ Hi ma luneng, “Nyele! Hi Babylonia wiwa bvü nten.” Isala Irija na ijüh nkina. Tsüti kesawa nye ma hi ghanya nu ssi wa kedithu kwen wi chia.

¹⁵ Mathu na imiwi lebentsu ntsa nu hi kiccü, nu pi ajüh kekaghaten wi kediwa Jonathan jjen pi atssüzüjjen sa ketheng witsü khenten.

¹⁶ Hi pi ayyi non atssüzüjjen kesü wi chi nu ciwi matsü kesie hi khen.

¹⁷ Tsaseng wi Kadimi Zedekiya na nyu kesun pi hi cichi nu ciwi kadijjen wi kuthila keü, “Apvüwa wi ketsijüh mangla benla nu?” Hi ma luneng nu khi, “Anle, no ghan pi Babylonia kadimiwa kwen wi chiaben.”

¹⁸ Tsaseng wi hi ma keü, “Hi mangwa sazzi pi no, nkekhu wi kedithu nyelela anyithu hathu shun le nthu na hi ghan pi atssüzü sa thsü ben nu?

¹⁹ Nthu tusenjüh-kechüthu na Babylonia nyithu na nthu nyelela diyyiwa ha ssisa nbenle nthu kekizathu tsü khati sadha nu?

²⁰ Tsalina njenkeben Kadimiwa, khili ijüh kina nu hi no wi khie kebenwa ha salo. No nchala hi kesun neng pi Jonathan jjen wi atssüzü nsa lalo. No tsüti sa lethu hi ciwi shü metsiben na.”

²¹ Tsalina Kadimi Zedekiya na hi pi kadijjen ccühha wi khentenlo kesa ahza khuchia. Hi ciwi ben nu anyunutiwa wi amesa tsüdila nmila npi kesa chu amesa kegüpen wi ghanan kaghapeng amesa be kesüsü pi hi cü.