JEREMIYA 33 - Kemethajüh (N) (Re-editing) Bible (BSI)

Kaghang kepa wila Khishikechi

¹ Hi accühha wi atssüzü sa keben wi Apvüwa ketsijüh na hi wi gho neng.

² Apvüwa, ayyi sakechiwa, tsü zhüshichi nu pi ma pen wi kechiwa na hi ccüneng. Ma nyan Apvüwa tsüna khi,

³ “Hi cichilo, isathu hi no nusha chiben na; nu no nchütha kesa pala amankesa nu qhecüshaghe kesa pi no kiza na.

⁴ Hi Apvüwa, Israel Nyizawa na khiben, Jerusalem wi ajjenthu nu Judah kadimi jjenwa tsüna nyu na tsüthu vüya nu kaghashen kesa ghena pheghe zigheaden.

⁵ Pahan na Babilon nyithu ssikaghashen, nu mathu na hi ilebenketsu nu keminu wina kihhesha cü keten kamangthu tsüpi ajjenthu pongti saaben. Hi anyunuti hawa nyithu na nkemehai sakeathu tsü ghena hi tsü teshidha.

⁶ Isala hi anyunuti hawa nu ma nyithu sapi mehai cü nu mathu pi agwo süqonya thsüden. Hi kecca nu keyazi ji ntsa pi mathu ccücaden.

⁷ Hi Judah nu Israel manyi ya ben kayi ntsa saya thsüaden, nu mathu pieki pi hatu wi sakegho ti sa cüaden .

⁸ Hi mathu na kesami sapi hi matang ketheng tsü sametha, nu hi mathu kesamithu nu kamatang tsü teshi cüaden .

⁹ Jerusalem na ighena anonkeghe, kenyuwakü, nu ashhükesa bvüwa saaben; nu ayyi wi mizzatenti tsüdila hi Jerusalem nyithu ghena pala kemehai kuli kechi nu ben kayi keya sengho anyunutiwa kecü cüki za keya wi messi nu kinün waben.”

¹⁰ Apvüwa na khi, “Anyithu kekhi na apen hawa ha ayyikeshü kesü ti anyithu nyelela aghangsathu lela ciwi nmi. Nu mathu na tsüti khi qo le; Judah nyutithu nu Jerusalem lentontithu na ghacangdha; anyi nu aghangsathu mangla ciwi nhang. Isala nthu na apen hathu wi za nengden,

¹¹ tsüna anonkeghe nu kenong nu keshanyi kemishu hhaithu. Nthu na anyithu na nkesengcha kekinyithu sengho hi Kekinyijjen wi chila akhwisa keben zayaben; mathu na hati khiben, ‘Nkesengcha sapi Apvüwa Kekhang ntsawa cülo, kepaghenanye ma mehai nu ma kaghali na anuphanla benden.’ Hi ayyi hawa pi hatu wi ti mehai kayi sa cüden. Hi Apvüwa, hi khidha.”

¹² Apvüwa Kekhang ntsawa na khi, “Ayyi hawa ayyikeshü ti kesa anyi nu aghangsathu lela hang nketen pen wi ha kheneng kuti amou sa nu anenikehiethu na mathu khaghanenithu ssinu ciwi waya mehai.

¹³ Yyishiphon diyyiwa nyutithu wi, yyishiphon thu ccü wi, nu Judah cülawa wi, Benjamin yyi wi, Jerusalem kevü nyuthu wi nu Judah nyutithu wi anenikehiethu na kheneng kuti mathu khaghanenithu si ben. Hi Apvüwa, hi khidha.”

¹⁴ Apvüwa na khi, “Matsü kesü na ghoden, ciwi hi Israel nu Judah nyithu wi khishi ketheng tsü sacen den.

¹⁵ Tsü tsüwi hi David shicübvügha wi ketsatan nyi kesü kessi pi kadimiwa saaden. Kadimi tsüwa na ayyi ciwi ketsatan nu kemeshonwa kuliben.

¹⁶ Judah nu Jerusalem nyithu kekashaya nu yazishu hang yaben. Anyunutiwa tsüpi ‘Apvüwa Ithu Hangshawa’ isa ciaben.

¹⁷ Hi Apvüwa, hi David shicübvügha kesü na keshüthangla Israel kadimi saaben le khishiben

¹⁸ nu Levi mizza wina keshüthangla keqhaikedithu sa hi kekuli sa nu mecang pi kinyi, asu pi kinyi, nu ahhanshathu sa thsüben.”

¹⁹ Apvüwa na hi wi khi,

²⁰ “Hi aghanan nu aghaja ssinu cenkethenjüh kesü satheng, isanu tsü keni yala keshüthangla matsü wina gho thsü, nu cenkethenjühwa tsü khiela pakhhi meyacha.

²¹ Tsüti hi imaghawa David ssinu cenkethenjüh kesü satheng, tsüna keshüthangla ma shicübvügha kesü na kadimi kesa na ben den, nu hi Levi mizza wi keqhaikedithu ssinu cenkethenjüh kesü satheng, tsüna mathu na keshüthangla hi kekuli sa thsüle kesalina; nu cenkethenjüh tsüthu tsü pakhhi meyacha.

²² Hi imaghawa David shicübvüghathu nu Levi mizza wi keqhaikedithu sapi jikayi cüden, nu tsüthu na atssan wi ghotsithu nyelela aghüsa wi ahachan sikhiya nketen ti saaden.”

²³ Apvüwa na hi wi khi,

²⁴ “No anyithu na hi khati hi kessiya kesa atheghi keni Israel nu Judah teshidha le khi keben khe mudha ma? Tsalina mathu na inyithu nkhichila ghang, nu mathu pi mizzatenti kesü le nmeshen ladha.

²⁵ Isala hi Apvüwa, hi aghanan nu aghaja ssinu cenkethenjüh kesü satheng, hi atssan nu ayyi ghan senle kesa ayenthu satheng.

²⁶ Nu ntsakhiwa, hi ha saketheng ti hi Jakob shicübvüghathu nu imaghawa David ssinu cenkethenjüh tsü nieden. Hi David shicübvüghathu kesü kessi pi Abraham, Isak, nu Jakob shicübvüghathu miwi kekhang sen thsüden. Hi inyithu nantizen ntsa sacü nu mathu sapi mehai nengya thsüaden .”