JEREMIYA 3 - Kemethajüh (N) (Re-editing) Bible (BSI)

Israel Jühtsentsa nkesenwa

¹ Apvüwa na khiben, “Keujüla npvüza kesü na ma wubvü yisha, nu tsüwa na ma wuba teshi theng nu npvüza kepa wi wubvü sa wa lethu, ma nzawa tsü ssineng keya jüh nmi. Hati kesa wina ayyiwa tsü nakhi waben . Isala Israel, no no kenen nyi kejon saghodha, nu khili hi wi ghoneng le saben man!

² Yyishiphon shonithu wi ghangchilo. Ciwi no keqheza menkedsa kekuli nkesa pen khiewi ben nu? No Arab nyi kesü na ayyikeshü wi nyu pale hie keben ti alen katen wi no kenenthu hie ben den. No keqheza menkedsa kekuli sapi ayyiwa nakhidha.

³ Tsalina atsankegho kheneng pi nu pathsü tsan la ngho ladha. No ghang pi keqheza menkedsa nyi ti sadha; isala no jüghe nben.

⁴ “Nu no khili hi wi hati khiben, ‘No iba, nu no hi ghanyi keben wina hi ghaliden.

⁵ No keshüthangla aghepvü nben; no imiwi nlebentsu ben nben.’ Israel, no tsüti khi, isala no saya kemehai chu nkemehai tsüdi sa.”

Israel nu Judah na Leben khapeghe meyathu yishü

⁶ Josiya na kadimi sa keben wi Apvüwa na hi wi khi, “No nza ajüh tsentsa nkesawa Israel katsü na mangwa sadha khe mudha ma? Ma hi wina bvü wa yyishiphon kemisi tsüdi wi nu achanton kemejjü cakhu tsüdi wi keqheza menkedsa kekuli sadha.

⁷ Hi kemeshen tsü ma hathu tsüdi kekuli sengwi hi wi kheneng gho metsi benle sa. Isala ma kheneng ngho, nu jühtsentsa nkesenwa ma pvünonwa Judah na tsüthu tsüdila mu.

⁸ Judah na Israel na hi wina kheneng wa keqheza menkedsa sa wa kesalina hi ma yisha nu kesun pi bvü thsü kesa la mu. Isala Judah, Israel jühtsentsa nkesa pvünonwa na nmessi. Ma la keqheza menkedsa kesü sa wa,

⁹ nu njüghetha sa. Ma ayyiwa nakhia, nu ma alon nu achantonthu kekinyi wina keqheza kekuli sa.

¹⁰ Ha tsüdi sengwi Israel jühtsentsa nkesen pvünonwa Judah na hiwi kheneng kegho ghe sa; ma atsentsa wina nsa. Hi Apvüwa, hi khidha.”

¹¹ Tsaseng wi Apvüwa na hi kizala, Israel na ma wina kheneng bvü lela, ma Judah jühtsentsa nkesenwa miwi mehaikile kesa chüyadha.

¹² Ma hi wala Israel wi khilo kiza, “Jühtsentsa nkesenwa Israel, hi wi kheneng gholo. Hi nyu nantizen nu alebentsu nten; hi anuphanla nmiwi lebentsu nben.

¹³ No sazzi nu hhaghe pi Apvüwa n-Nyiza shundhale kesa ketan chüyalo. Achanton kemejjü tsüdi cakhu wi no kenen pi asang cenpvüthu cüdha nu no iyenkhukechithu nkinala le kesa khishilo. Hi Apvüwa, hi khidha.

¹⁴ “Jühtsentsa nkesen nyithu, ghonenglo; nthu na ijile. Hi anyuti kesüsü wi nthu meshu kesü nu agei kesüsü wi meshu keni khuya, nu hi nthu ssinu Zion Yikha wi ghoneng den.

¹⁵ Hi ijühkina keten nyi pi nthu miwi kekhang sen thsüaden, nu mathu na kemetsa nu chüshikeya sen nu nthu miwi kekhang sen ben.

¹⁶ Nthu na ayyi tsüwa wi anyi kejon saya lethu, anyithu na hi Cenkethenjüh Khitsonwa cüki nkhi laben. Mathu na tsü cüki nmeshen neng nyelela meshen meyala; mathu na tsü nsenla mehai nyelela mathu na kepa wila sa nben.

¹⁷ Tsü tsüwa na kegho wi Jerusalem pi ‘Apvüwa Kadipen’ isa ciben, nu mizzatentithu tsüdila gho ciwi saghu nu hi kinyipen. Mathu na mathu leben kedhu nu nkemehai na mathu kekiza tsü nsa laben.

¹⁸ Israel na Judah saghuya, nu mathu gweghe kushiyyi aghawa wina hi ayyi pi nthu baqhaithu ya pi anuphanla mathu ji salo khukechi diyyiwa wi tsü ghoneng shaben.”

Anyiza nyithu na Atsikezhü kekinyi kekulikesa

¹⁹ Apvüwa na khiben, “Israel, hi no pi itsa ti sa nu ssiya, nu ccanonkwen yyi kesü, ayyi tsüdi miwi kemehai ntsa pi no cü mvu sale. No ya hi pi iba isa ci nu hi wina khiela bvü neng nsa thsü mvu sa.

²⁰ Isala no awubvü jühtsentsa nkesen kesü ti hi wi jühtsentsa nsenla ghodha.

²¹ Yyishiphon miwi kemagha hhai kesü zaben; tsüna Israel nyithu na qai nu nanketizen khie, kepaghenanye mathu na kesami wi hang gho, nu Apvüwa mathu Nyizawa malia.

²² Apvüwa wina bvü kesathu tsüdila kheneng gholo; ma nthu sapi mehai cü nu nthu sapi jühtsentsa sa cüden. Nthu na khiben, “Anle, ithu na Apvüwa wi ghoaden, kepaghenanye ma ithu Nyizawa le.

²³ Ithu na yyishiphon shoni wi acenpvü kepa wi kekinyi ghena ithu kekiqa mangla mu meya. Israel ghena kekiqawa tsüna Apvüwa ithu Nyiza wi ketan ghoden.

²⁴ Isala kejüghekeya cenpvü Baal kekinyi wi ithu na asahang nu amesüsithu, atsangathu, nu ithu bamyithu na kheni wina kuli kegho tsüdila nmiladha.

²⁵ Ithu na jüghela nkhwendu nu nyankekinyen yala ithu shangbhonya thsü kesau. Ithu nu ithu bamyithu na keshüthangla sami nu Apvüwa ithu Nyiza shun; ithu na khiela ma jühkhukechithu tsü nkina.”