JEREMIYA 27 - Kemethajüh (N) (Re-editing) Bible (BSI)

Jeremiya na Amesü Sunkeqhan kesü kepvü

¹ Josiya tsawa Zedekiya na Judah kadimiwa saya meyi Apvüwa na hi kizala,

² Asayhu nu achanbe pi asunkeqhan kesü saya nu pi isun wi chiyalo kiza.

³ Tsaseng wi Apvüwa na hi ya mathu mithonthu wina ketsijüh kesun pi Edom, Moab, Tur, Ammon, nu Sidon hathu kadimithu wi chi nu mathu ya ghola Jerusalem wi Judah kadimiwa Zedekiya ghang thsülo kiza.

⁴ Apvüwa Kekhang ntsawa, Israel Nyiza na hi ahza pi mathu cü nu Apvüwa na hati khiben le pi mathu kadimithu wi kizalo khi thsü:

⁵ “Hi kekhang nu kezü keti sen nu ayyi, anyi, nu ayyi miwi hang keben aghangsa tsüdi sahangchi; nu hi tsüpi hi kessi keya nyi kesü le kesü lela cüden.

⁶ Mizzatentithu ha tsüdi pi imaghawa Babilon Kadimiwa Nebukhadnezzar kekhu wi chicü kesawa tsüna hi le, nu hi aghangsathu lela pi ma kekuli sa thsüdha.

⁷ Mizzatentithu tsüdila ma kekuli saden, nu mathu na ma mizzatentiwa na keqanca tsü npi kecu chu ma tsa nu ma tsatsawa kekuli saaben. Tsaseng wi ma mizzatentiwa na kekhang ntsa mizzatentithu nu kadimithu kekuli saaben.

⁸ “Isala mizzatenti nyelela kadinyu kesüla ma kekhang kekhu wi nben lethu, hi aghikesa, kekhhwenthi, nu kesakinaa ghei pi mizzatenti tsüwa meten cü nu Nebukhadnezzar yala tsü deditha sa thsüaden .

⁹ Nthu na nthu jawi atusenjüh-kechü, aman nyelela keshü ghamu ci kechi wi nyelela chuchü kesa wi tucüki khiya mehai le khi ketenthu jüh nkina lalo. Tsüthu tsüdila nthu na Babylonia kadimi kekhu wi ndulalo kizaden.

¹⁰ Mathu na nthu mechuben, nu nthu diyyiwa wina nthu ssinu lenkesie wi bvü thsüaben. Hi nthu jügüshi pi nu nthu na dedi thsüaden .

¹¹ Isala mizzatenti kesü le kesü lela Babylonia kadimi kekhu wi ben nu ma kekuli sa lethu, hi tsüwa ya ma yyi wi benya thsü, ciwi allica nu hangya thsüben.”

¹² Hi tsü makesü pi Judah kadimiwa Zedekiya wi la khi, “Babylonia kadimiwa kekhu wi dulo. Ma nu ma nyithu kekuli salo, isathu nthu na hang yaben.

¹³ Mangsale no n-nyithu na aghikesa, kekhhwenthi, nyelela kesakinaa wi shü thsüa nu? Tsüwa na mizzatenti kesü le kesü lela Babylonia kekhu wi nkeduwa miwi saaben le kesa Apvüwa na khipi theng.

¹⁴ Atusenjüh-kechüthu na nthu wi ma kekhu wi ndulalo kiza ketenthu jüh tsü nkina lalo. Tsüthu na nthu mechuben.

¹⁵ Apvüwa na ma ketanla kekhi na ma tsüthu nkesunchi lela mathu na nthu wi milimesa benle khiben. Tsalina ma nthu jügüshi piaden, nu nthu pathiaben, nthu nu atusenjüh-kechü milikemesa hathu jüh pi nthu kiza ketenthu la.”

¹⁶ Tsaseng wi keqhaikedithu nu anyithu wi Apvüwa na hati khiben le kiza, “Atusenjüh-kechüthu na Kekinyijjen tsanqaithu tsüna wan Babylonia wina pvü neng ghoaben le khi ketenthu jüh tsü nkinala. Mathu na nthu mechuben.

¹⁷ Mathu jüh nkina lalo. Babylonia kekhu wi dulo, isathu nthu na hangya ben na! Mangsale anyunuti hawa ha yasa pi kenbonki kesü saa nu?

¹⁸ Keujüla mathu na ntsakhiwa atusenjüh-kechüthu nu hi ketsijüh ben lethu, mathu ya hi Apvüwa Kekhang ntsawa wi khie nu Kekinyijjen nu kadijjen wi atsanqaithu tsü sen nu Babylonia wi nbvü thsü lalo.”

^19-20 (Kadimi Nebukhadnezzar na Judah kadimi Jehoiakim tsawa Jehoiakhin, nu Judah nu Jerusalem ccülikesathu ssinu Babylonia wi kewa wi ma adonbvüthu, lezza pi kesa atssütaghagu, amesügarithu, nu Kekinyijjen wi atsanqai pahan teshia.)’

²¹ “Hi Apvüwa Kekhang ntsawa, Israel Nyizawa na Kekinyijjen nu Jerusalem wi kadijjen wi atsanqai teshi kethengthu cüki kekhi ha kina chilo:

²² Tsüthu tsü sen nu Babylonia wi wa ben, nu hi tsüthu cüki npi meshen neng kechi chu tsüna ciwi benlaben. Tsaseng wi hi tsüthu tsü sengho nu pi apen hawa wi chi neng cüaben. Hi Apvüwa, hi khidha.”