JEREMIYA 23 - Kemethajüh (N) (Re-editing) Bible (BSI)

Atuwi Kaghang keben

¹ Apvüwa jühkekaghaten na kekhang sen nu ma nyithu yasa nu jügüzighe ketenthu miwi gho keten tsüna khatila qhethiketen sa ten nu!

² Hawa ha Apvüwa, Israel Nyizawa na kekhang kesenthu na ma nyithu kenoncca-u cüki kekhi: “Nthu na inyithu n-noncca ladha; nthu na mathu jügüzighe pi bvü thsüdha. Hi khili nthu na nkemehai kekuli ghena nthu meten cüle bendha.

³ Hi inyi kepathu, hi mathu jügüzighe pi chikea yyithu wina saghu yaden, nu hi mathu ssi wa mathu yyi wi chiaben . Mathu na atsanga kejon benya nu jikayi yaden.

⁴ Hi kekhang kesenthu pi chi nu mathu noncca yaden. Inyithu na messi nyelela nyu mathu pateqheya nben, hi mathu nmeten nengdha. Hi Apvüwa, hi khidha.”

⁵ Apvüwa na khiben, “Hi David shicü wi ketsatan nyi kesü kessi pi kadimiwa sa keten matsü na ghoden. Kadimiwa tsüna metsa, ketsatan nu kemeshon sen nu ayyi tsüdi wi la kekhang senden.

⁶ Ma kadimi sakeya wi Judah nyi na yazishu nu Israel na kecca wi hang yaden. Ma pi ‘Apvüwa Ithu Hangshawa’ isa ciben.

⁷ “Apvüwa na khiben, ‘Anyithu na hi hang kebenwa Nyiza, Ejipt yyi wina Israel nyithu ssi keshhughowa le khi inyan wina nkishenla kesa matsüwa na ghoden.

⁸ Tsüti kesawa nye, mathu na hi hang kebenwa Nyiza, hi mathu jügüzighe pi ayyi aghawa nu diyyi kepathu wi chikea wina Israel nyithu ssikeghowa le khi inyan wina kishen waben. Tsaseng wi mathu na mathu yyi wi hang waden.’ ”

Atusenjüh-kechüthu ghena Jeremiya Ketsijüh

⁹ Ileben pachadha, nu hi kedheggüben. Apvüwa, nu ma jüh kemethathu ghena, hi anyi kesü na kisengtssü kejon jjü pvü nu adina keben ti sadha.

¹⁰ Ayyiwa na Apvüwa tuwi ajühtsentsa nkesen nyi pi pongdha; mathu na gheshighena sa kahang wi mathu kekhang sen zziben. Apvüwa kishen-keshiwa ghena ayyiwa na anongü nu amou na jü wadha.

¹¹ Apvüwa na khiben, “Atusenjüh-kechüthu nu keqhaikedithu na Anyiza nkechüthu; mathu na Kekinyijjen wi nkemehai kuli keben hi mathu ghanyadha.

¹² Mathu tonketen lenwa tsüna chenche nu jangketsü; hi mathu ya accümeshü nu khuli thsüaden . Hi kededi sengho mathu miwi chiaben; mathu ghena kemeten tsüwa na gho tendha. Hi Apvüwa, hi khidha.

¹³ Hi Samaria atusenjüh-kechüthu kesami mudha; mathu na Baal nyan wina ajühkhi, nu inyithu ssi deja wadha.

¹⁴ Isala hi Jerusalem wi atusenjüh-kechüthu na tsü miwi nkemehai kuli keben mudha: mathu keqheza kuli nu milimesaden; mathu na anyithu kiqa pi sami thsü, tsalina thola nkemehai kekuli nteshi. Ituwi tsü mathu na Sodom nu Gomorrah nyithu nkemehai ti le.

¹⁵ “Tsalina hawa ha hi Apvüwa Kekhang ntsawa na Jerusalem wi atusenjüh-kechüthu cüki khiben: Hi aghang kekha pi mathu dsa thsü nu aji pi jjü thsü, kepaghenanye mathu na Anyiza nkechü kekuli pi ayyi tsüdi wi vvüzighe chidha.”

¹⁶ Apvüwa Kekhang ntsawa na Jerusalem nyithu wi khi, “Atusenjüh-kechüthu jüh tsü nkinala, mathu na milikemesa kahang pi nthu pong cüben. Mathu na mathu meshenshikeya tsü khe hi kekhi jüh pi nthu kiza nben.

¹⁷ Hi kekhi jüh meya mvu ketenthu wi pala tsüdila mathu ghena mehai wa benle kesa pi kiza benden. Nu mathu na leben-dhu kebenthu tsüdi wi wa ketizenkesa na khiela mathu kidhenya nbenle khiden.”

¹⁸ Hi khi, “Atusenjüh-kechü hathu kesüla Apvüwa kemeshen kekulithu tsü chü nghole. Mathu na thola ma jüh za nyelela ma ketsijüh chüshiya nyelela ma kekhi jüh kina nyelela nmeshen chi.

¹⁹ Ma lebenketsu tsüna caghamo, ameghü nkemehai, anyi gheshighenathu li miwi mo kevüli den,

²⁰ nu tsüwa na ma kulile kebenthu tsüdila npi kecen chu ngan nben. Atsathang ghaketen wi ma nyithu na ha jjügi chüshitha yaben.

²¹ Apvüwa na khi, “Hi atusen- jühkechü hathu nkesun chi, isala mathu na wa. Hi ketsijüh mangla pi mathu ncü, isala mathu na inyan wina ajühkhi.

²² Keujüla mathu na hi kekuthi kemeshenthu chü lethu mathu na hi ketsijüh pi inyithu kiza nu mathu ya nkemehai wi hang keten nu gheshighena kekuli sa ketenthu teshia kesale.”

²³ Hi Anyiza, hi apen kesütan wi nyela apen tsüdi wi ben tenle.

²⁴ Anyi thola hi ma muya nkeben pen wi kuthiya nben. Nthu na hi tangwi nu ayyi wi lela apen tsüdi wi keben tsü nchü kwe?

²⁵ Hi atusenjüh-kechüthu milimesa nu inyan wina khi nu mathu man wi hi ketsijüh pi mathu cüle khi ketenthu tsü chüben.

²⁶ Atusenjüh-kechüthu tsüna matsü khathu mathu meshenshikeya milikemesa tsü sen nu inyithu lentsütson zzi ben ten nu?

²⁷ Mathu kemeshen tsü mathu na aman khi pi inyithu kiza keten tsüna inyithu sapi mathu bamyithu na hi mali nu Baal wi kheneng bvükea tsüti hi mali nashe saden.

²⁸ Atusenjüh-kechü thowa na aman man khe tsüna aman wile nkhithu yishü, isala thowa na hi ketsijüh zaya khe atsentsa tsüpi nkhithu yishü. Amatsi pi awhengsu kaghapeli chithu ma kemehai mangwa ben nu?

²⁹ Hi ketsijüh na anni ti, kejenji kesü pi alon whengchazighe keten tsüti kesale.

³⁰ Hi atusenjüh-kechüthu na mathu khokho jüh khuya nu pi hi ketsijüh ti khi ketenthu tsü matangben.

³¹ Hi atusenjüh-kechüthu na mathu ketanla mathu jüh khi nu tsüpi ijüh le khi ketenthu la matangben.

³² Hi Apvüwa, hi khi keben jüh ha kina chilo! Hi atusenjüh-kechüthu, aman milikemesa ketan khi ketenthu tsü matangben. Mathu na aman hathu ha khi nu mathu milikemesa nu ammikesa pi inyithu lentsütson dejaden. Hi mathu kesun nchi nyelela walo nkhi, nu mathu na inyithu kiqakeya mangla nmi. Hi Apvüwa, hi khidha.’

Apvüwa Khhiwa

³³ Apvüwa na hi wi khi, “Jeremiya, kusi inyi kesü nyelela atusenjüh-kechü kesü nyelela keqhaikedi kesü na no wi ‘Apvüwa ketsijüh tsüna khati kesa nu?’ keü khe, no hati ma kizalo, ‘No Apvüwa khhiwa tsüle nu ma no teshiale ben.’

³⁴ Keujüla inyi kesü nyelela keqhaikedi kesü nyelela atusenjüh-kechü kesü na ‘Apvüwa khhiwa’ tsü sen ten lethu, hi ma nu ma theghi meten cüaben.

³⁵ Tsü mithon wi anyi kesüsü ma pvüshangthu nu ma shilithu wi hati nkeüthu yishü. ‘Apvü na khati le lunengchi nu? Apvüwa na mangwa le khi nu?’

³⁶ Tsalina mathu ‘Apvüwa khhiwa’ isa kekhi jüh tsü nsenla yilo. Anyi kesü le kesü lela tsüti khi lethu, hi ntsakhiwa ketsijüh pi ma khhi sa cüaben. Anyithu na mathu Nyiza, kahang Nyiza, Apvüwa Kekhang ntsawa jühthu tsü tonpheghedha.

³⁷ Anyithu na Jeremiya wi keü, ‘Apvüwa na mangwa pi no lunengchi nu? Apvüwa na mangwa le khi nu?

³⁸ Nu keujüla anyithu na ijühkhukechi nkinala, Apvüwa khhiwa, isa khi lethu mathu wi kizala,

³⁹ hi mathu ghakaya ‘nu hi pi mathu nu mathu bamyithu kecü nyunutiwa tsü la pi kelensie wi khala metsiben le kizalo.

⁴⁰ Hi mali nkeyacha anuphanla kejüghekeya nu kekimenni sengho mathu miwi chiaden.’ ”