JEREMIYA 14 - Kemethajüh (N) (Re-editing) Bible (BSI)

Kemegi Qhethiketenkesa

¹ Apvüwa na kemegi cüki pi hi kiza,

² “Judah na anonkegü wi ben, ma nyunutithu na shü bendha, ma nyithu ahathakina yyi wi ben, nu Jerusalem na kekiqa khieben.

³ Kebanthu na mathu maghathu kesun pi atssü bha; mathu na atssükhang wi wa, isala atssü mu meya; mathu lakhü kaghacang pvü nu gho neng . Accükwenshü chükivvü, nu mathu mmi pi kuthiben.

⁴ Ciwi atsan nghola kesalina ayyi na keqha, allikecathu na leben güccü, nu mathu mmi pi kuthiben.

⁵ Agheja wi ameshübvü na ma zza teshia, kepaghenanye ciwi aghang nmila.

⁶ Agheja gadathu na ayikha wi ngan, nu whewhe ti ahatha nshhu chalaben; mathu nyon na nmula kepaghenanye mathu atsse nmi.

⁷ Inyithu na hi wi hati khiben, ‘Ithu kesami na ithu metsi-meni lela. Apvüwa, no khishiketheng ti ithu kiqa cülo. Ithu na matsü kejon tughu la ntuwi kheneng bvüle; ithu na sami pi no shundha.

⁸ Israel kahangwa tsüna no ketan le; no kededi wi ithu hangsha cü ketenwa tsü. No mangkesa na ithu yyi wi kijünyi kesü ti, kijünyi wa ketenwa na ghaja kesütan kejen ti saben nu?

⁹ Mangkesa na no anyi kesü na qhethiketen sa, nu nyu kiqa nkeya süpahi kesü ti sa nu? Apvüwa, no ntsakhiwa ithu ssiden! Ithu na n-nyithu le; ithu nteshi lalo.’ ”

¹⁰ Apvüwa na anyi hathu cüki khi, “Mathu na hi wina bvü kesa tsü nenden, nu mathu na mathu kekheneng nben. Tsalina hi mathu miwi hi n-nen. Hi mathu na sazzi kethengthu tsü meshen benden nu mathu kesami ghena mathu meten cüden.”

¹¹ Apvüwa na hi wi khi, “Hi anyi hathu kiqa cülo nkhiela.

¹² Mathu na ziben lela hi mathu kekhie kina cü nten; nu keujüla mathu na mecang pi kekinyi nu asu pi kekinyi sapi hi cü lela hi mathu miwi hi nenya nben. Tsüti kesawa nyela hi aghikesa, kekhhwen, nu kesakinaa pi mathu pathiaben .”

¹³ Tsaseng wi hi khi, “Kemisintsa Apvüwa, atusenjüh-kechüthu na anyithu kizala ciwi aghikesa nyelela kekhhwen nmi, kepaghenanye no ithu yyi wi kecca ketan saaben le khishitheng le kesa mathu na khi keben tsü no chüben.”

¹⁴ Isala Apvüwa na luneng, “Atusenjüh-kechüthu na inyan wina milikemesa khiben; hi mathu kesun nchi, nyelela mathu ajüh kesüla khilo pi mathu ncü. Mathu na kemanthi cüki khi keben tsüna hi wina ngho; mathu na tucüki khi keben tsüna mathu ketanla meshenkeya ma men nkemithu le.

¹⁵ Hi Apvüwa, hi no kizaben, hi atusenjüh-kechüthu hi mathu kesun nkechi lela inyan wina aghikesa nu kekhhwen na ayyi ha yasa nben le khi ketenthu tsü hi aghikesa nu kekhhwen wi mathu pathiaben .”

¹⁶ Mathu na ajüh hapi thothu kiza khe tsüthu la tsü makesü pathiaben. Mathu kamangthu pi Jerusalem lentonti wi khala, nu thola mathu pi nvhü laben. Ha mathu tsüdi miwi kuliben — mathu wubvü, nu mathu tsangathu saghu. Hi mathu ya mathu gheshighena kutimen dhi thsüden.’

¹⁷ Apvüwa na hi anyithu wi ihathakina cüki pi kizalo nu khi; “Inyontssü ya ghaja ghanan kellewa salo; hi nkiqaithiwa salo. inyithu na ayisüsa ntsa, nu mesa-mena ntsa sa kesalina.

¹⁸ Hi khathansha alli wi wa khe, aghi wi pathikea kamangthu kejon mu; hi khathansha anyutithu wi wa khe, anyithu na khhwenthishü keben mu. Atusenjüh-kechüthu nu keqhaikedithu na kekuli saben, isala mathu na mangwa saben khe nchü.”

Anyithu na Apvüwa wi kekhie

¹⁹ Apvüwa, no Judah teshitha sadha kwe? Mangkesa na ithu mesa-mena ntsa sacü, nu ithu ya mehai meyala thsüdha nu? Ithu na kecca ghang, isala mang kemehai la nsachi; ithu na sapi mehai keya ghang, isala tsü mithon wi kemessi na ghoa.

²⁰ Ithu na sami pi no shun le, Apvüwa; ithu na ithu kesami nu ithu bamyithu kesami khishiben.

²¹ No khishikethengthu meshenchi, nu ithu n-nanchi nsala; kejüghekeya sengho Jerusalem miwi nchila, n-nyankethang kadipenwa wi tsü. No ithu ssinu cenkethenjüh kesawa tsü npakhhi lalo.

²² Mizzatenti tsikezhüthu kesüla atsankegho kesunchiya nben, akulu na ma ketanla atsangho dugho thsüya nben; Ithu na ithu kahang pi nmiwi chiben, O Apvüwa, ithu Nyiza, kepaghenanye no pala hathu ha sachi ketenwa tsü le.