JEREMIYA 13 - Kemethajüh (N) (Re-editing) Bible (BSI)

Linen Patano kenkhangthu

¹ Apvüwa na hi wala linen patano kenkhangwa shei pi pvüya, isala tsüpi atssü wi nchi lalo hi kiza.

² Tsalina hi tsü shei pi pvüya.

³ Tsaseng wi Apvüwa na hi wi khineng,

⁴ “Eufrat Ghaku wi wa nu linen patano kenkhangthu tsüpi alonku wi kuthilo.”

⁵ Tsalina hi ciwi wa tsü pi Eufrat Ghaku kete wi kuthia.

⁶ Matsü pahan sengwi Apvüwa na hi kheneng wa Eufrat Ghaku wi patano kenkhangwa tsü khuyalo kiza.

⁷ Tsalina hi waneng nu tsü pi kuthi ketheng pen tsü cukeya wi tsü tsüna qae nu nmehaila kesa muya.

⁸ Tsaseng wi Apvüwa na hi kiza neng. Ma khi,

⁹ “Hawa hati hi Judah nu Jerusalem na awisa ntsa kesa tsü yasaden.

¹⁰ Anyi nkemehai hathu hana ijüh nkina mvu ladha. Mathu na kheni ti leben-dhu nu gheshighena benden, nu acenpvü kepathu kinyi nu tsüthu kekuli sa wadha. Tsalina mathu na patano kenkhangwa ha ti kemehai mangla nmilaben.

¹¹ Patano kenkhang hana ageshi phang kesa tsüti hi Israel nu Judah nyithu tsüdila hi ghanten khouya thsüle sa. Hi tsüti sa nu mathu na inyithu sa, nu inyan keseng kenyuwakü sengho thsüle sa; isala mathu na ijüh nkina mvula.”

¹² Apvüwa Anyiza na hi wi khi, “Jeremiya, Israel nyi tsüdi wi kisengtssü khüti tsüdila kisengtssü pi npongthu yishüle kizalo. Mathu na kisengtssü khüti tsüdila kisengtssü pi npongthu keyishü tsü chüben le kesa luneng ben.

¹³ Tsaseng wi mathu wi hi Apvüwa na kisengtssü pi ayyi hawi anyithu adi npi kina thsü chu pi pong cütenle kizalo: tsüna David shicübvügha kadimithu, keqhaikedithu, atusenjüh-kechüthu, nu Jerusalem nyithu tsüdila.

¹⁴ Tsaseng wi hi keqhai nu acalithu tsüdila kihhe pi akhütithu ti keshigüchali thsüaden . Ketizen, nankeyishü nyelela nanketizen mangla hi mathu kepathi tsü khenya nben.”

Jeremiya na Awikesa kitsankechi

¹⁵ Israel nyithu, Apvüwa na khidha! Satemeni nu ma jüh kinalo.

¹⁶ Apvüwa nthu Nyiza kinyiküya, ma kejang sengho nu nthu na ayikhathu wi accümeshü; nu nthu na ghang keten kewegüwa tsüpi kejang kedhu wi npi kechi tuwi na.

¹⁷ Keujüla nthu na nkina lethu, hi kekuthi wina nthu awikesa ghena qaiden; hi qai ntsa nu inyontssü lle shhughoben, kepaghenanye Apvüwa nyithu tsü ssinu atssüzü sa bvüdha.

¹⁸ Apvüwa na hi wi khi, “Kadimiwa nu ma jja manyi ya kadipen wina dugholo kizalo, kepaghenanye manyi kadiliwen tsikemehaiwa tsüna manyi li wina qancadha.

¹⁹ Acülawa Judah nyunutithu tsüna nyu na mathu vüyadha; meshu kesüla tsüthu jawi duya nben. Judah nyi tsüdila ssinu kushinyi sa wadha.”

²⁰ Jerusalem, ghangchilo! Nthu ghinyithu na aghawa na dugho tendha! No ya noncca yalo pi no nondi kechi nyithu, kapvü keten n-nyithu tsüna khiewa ben nu?

²¹ No npvüshangthu le meshen ketenthu tsü na ghola no yaya nu nmiwi kekhang senya lethu no mangwale khiya ben nu? No nza kesü na atsa kepvügha wi kinaa ti saaben.

²² Keujüla no mangkesa na hathu ha tsüdila nmiwi sa — Mangkesa na nthsümeni mezüqhe nu no mesa-meshü nu keü lethu, tsüna no sami mtsü kesa ghena le.

²³ Kenimugho nyi kesü na ma hyu tsi kemiliya mehai kwe, nyelela shenkitemi kesü na ma keshenqhe tsü khuya mehai kwe? Keujüla mathu na tsüti saya lethu, nthu mangla nye isala nkemehai ketan sa ketenthu kemeshonwa kesa yen chü kesa le.

²⁴ Apvüwa na nthu pi ayyikeshü meghü na amatsi mo pi bvü keten ti vvüzighe cüden.

²⁵ Ma kekhi na hawa ha nthu ya metuketenwa tsü. Hawa ha ma nthu ssinu kuli le südheyadha, kepaghenanye nthu na ma mali nu milikemesa cenpvüthu nondiwa kesalina.

²⁶ Apvüwa na ma ketanla nthsümeni khupi nu no kejüghekeya pi nyu ccücaden.

²⁷ Ma no ma nanmeghü keten kekulithu sa keten mudha. Ma no yyishiphon thu nu allithu wi Anyiza nkechü cenpvüthu nie, anyi kesü na ma jenphonwa wubvü bha nyelela goru süpon kesü na aghalawa jigü keten ti sa keten tsü mudha. Jerusalem nyithu, nthu na dedi tendha! Nthu na khathansha wi methaya ten nu?