JEREMIYA 12 - Kemethajüh (N) (Re-editing) Bible (BSI)

Jeremiya na Apvüwa kekeü

¹ Apvüwa, hi kaghatenjüh sengho no ssinu keccücanli lethu, no hi meshonle kesa chüshiya ben. Isala hi atsentsawa cüki ghena no nkeüthu yishüben. Mangkesa na gheshighena nyi na mehai kayi ben nu? Nu atsentsa nkesa nyi na haicenya ten nu?

² No mathu pi shengchi, nu mathu na aghazan chaya; mathu na shigü shagha abi bün yaden. Mathu na keshüthangla no kemehai khiden, isala atsentsa witsü mathu na no khichi nten.

³ Isala Apvüwa no hi chüben; no hi mangwa saden, nu khati no ghaliten khe no muben. Anyi nkemehai hathu ha ssinu khaghaneni pathiale keten ti bvülo; mathu süthiale kesa tsüwa npi kecu chu mathu hieya.

⁴ Matsü khathu ithu yyiwa na keqha, nu alli tsüdi wi aghang na jü thsü ten nu? Ithu nyi gheshighena ghena aghangsa, nu awathu na shü bendha, anyi tsüthu na hati khiben, “Anyiza na ithu mangwa saben khe nchü.”

⁵ Apvüwa na khi, “Jeremiya, keujüla no anyi ssinu kejütsili kesa wi nchala lethu, no khati goruthu jütsiya ben nu? Keujüla no apen kemetha wi ngan shagha meya lethu, no khati Jordan ghansha wi waya mehai nu?

⁶ Ncünyuthu, ntheghithu lela no matsadha; mathu na nyu gweghe nu no ssikaghashen. Mathu na apvüshang kesa jüh ti khi lela mathu n-nondila.”

Apvüwa na Ma nyithu ghena Ahathakina

⁷ Apvüwa na khiben, “Hi Israel yishadha; hi kessikeya mizzatentiwa teshidha. Hi hi ghali keten nyithu pi mathu ghinyithu kekhang kekhu wi chidha.

⁸ Hi kessikeya nyithu na kheneng hi shunben; ayinong wi ssensitemi kesü ti mathu na ghamo pi hi satekü, tsalina hi mathu nanmeghüben.

⁹ Hi kessikeya nyithu na awa kesü cencüggü na vüya kesa ti saben. aghangsathu cipi kemishu wi saghu yalo!

¹⁰ Asang kekhang kesenthu kejon na hi kemeshentsse lli yasadha; mathu na illi cütekedadha; mathu na iyyi tsikemehai pi ayyikeshü ceng thsüdha.

¹¹ Mathu na tsüpi agheja sa; nu tsüna ituwi kiyisha sadha. Ayyi mabenla ayyikeshü sadha, nu thola tsü ghangchi nben.

¹² Ayyikeshü kemisi tsüdi wi anyithu na yasa ghodha. Hi ayyi tsüdi yasalo aghi kesunchia; thola yazishu hangya nbendha.

¹³ Inyithu na awhengsu pi shengchi, isala kepaghathu saghuya; mathu na apiketsü sa kuli, isala tsüghena mangla mu meya. Ilebentsu ntsa kesa ghena mathu lliwwi meya ladha.”

Apvüwa na Israel Jenphonthu wi Khishikechi

¹⁴ Apvüwa na khiben, “Hi Israel jenphonthu, hi ayyi pi inyi Israel kecü tsü yasa kesathu ghena ajüh pahan nkhithu yishüben. Hi aghang kesü pfüshi kea ti gheshighena nyithu tsü mathu diyyithu wina mathu sen bvüaden, nu mathu wina hi Judah kekasha yaden.

¹⁵ Isala hi mathu ssibvü kea sengwi hi mathu nantizen chiden; hi mizzatenti kesüsü ssineng gho mathu yyi nu diyyiwa wi chiaben .

¹⁶ Keujüla mathu na mathu leben tsüdi pi inyithu keccüna yaya nu mathu na kuti tsüwi inyithu sansi pi Baal nyan wina ‘Apvüwa na hangkeben ghena’ tsüti kishen thsü kesa ti kishen lethu, mathu la inyithu ti sa nu mehai kayi yaden.

¹⁷ Isala keujüla mizzatentiwa na ijüh nkina lethu, hi tsü pfüshitha pi yasaden. Hi Apvüwa, hi khidha.”