JEREMIYA 11 - Kemethajüh (N) (Re-editing) Bible (BSI)

Jeremiya nu Cenkethenjühwa

¹ Apvüwa na hi wi khi,

² “Cenkethenjüh jjügi kina chilo. Pi Judah nu Jerusalem nyithu wi kizala,

³ Hi Apvüwa, Israel Nyiza na kishen-keshi kesü pi cenkethenjüh hawa jjügi nkeniethu miwi chitheng.

⁴ Hawa ha hi mathu bamyithu ghena ayyi anni keqhe ti kesa, Ejipt wina mathu ssi keshhugho wi mathu ssinu cenkethenjüh sa keyawa tsü. Hi mathu na ijüh kina nu hi khi kechi tsüdi salo kiza. Hi mathu wi mathu na ijühkina lethu mathu na inyi sa nu hi mathu Nyiza saa tenle kiza.

⁵ Isathu, khili mathu na sen keben ayyi kecca kemehai hi pi mathu bamyithu cüle khishi ketheng tsü nieden.” Hi luneng, “Anlo, Apvüwa.”

⁶ Tsaseng wi Apvüwa na hi wi khi, “Judah nyunutithu nu Jerusalem lentontithu wi walo. Hi ketsijüh tsüpi ciwi thangchi, nu anyithu ya hi cenkethenjüh jjügi kina nu tsüthu nieya thsülo.

⁷ Hi Ejipt wina mathu ssinu keshhugho wi mathu na ijühkina metsilo kesa mathu kitsanchi, nu hi nansü kecu ha mathu kitsan ghoben.

⁸ Isala mathu na tsü nkina nu n-nie. Tsüti kesawa nyela tsüdila hatu wi ti leben-dhu nu nmehai la ghoben. Hi mathu ya cenkethenjüh tsü nielo ijühkhuchi, isala mathu na hhaghe. Tsalina hi ciwi zhüpi ketheng kemeten tsüdi sengho mathu miwi chi.”

⁹ Tsaseng wi Apvüwa na hi wi khi, “Judah nu Jerusalem nyithu na acho sapi hi shunben.

¹⁰ Mathu na mathu bamyithu na hi kekhi nsala keathu kesami wi kheneng wadha; mathu na acenpvü kepathu. Judah nu Israel manyi qho hi mathu bamyithu ssinu cenkethenjüh kesawa tsü pakhhia.

¹¹ Tsalina hi Apvüwa, hi khili kededi sengho mathu miwi chitenle kesa pi mathu kitsan ben, nu mathu na tsü ghüya nben.

¹² Tsaseng wi Judah nu Jerusalem nyithu na mathu kinyi keten cenpvüthu wi wa nu tsüthu na mathu ghena kekiqa khieben. Isala acenpvü tsüthu na kededi hawa ha kegho wi mathu hangshaya nben.

¹³ Judah nyithu na mathu nyunutithu ju atsikezhü la ben, nu Jerusalem wi kahangthu na anyunutiwa wi alentontithu tsüdi wi nankiqanan Baal cenpvü kinyile kesa ghena kekinyipenthu satheng.

¹⁴ Jeremiya, no anyi hathu mithon wina hi wi khie nyelela keshükene nsa layi. Mathu na agükeccü wi keben wi hi wi kekiqa khie lela hi mathu hhai kina nten.”

¹⁵ Apvüwa na khiben, “Hi mathu ghali ketenthu na nkemehai kuli bendha. Mathu na hi Kekinyijjen wi benya kemehai kemeshon mangwa ben nu? Mathu tsü ajühkhishikechi nu asahangthu pi kekinyi sa kechi wi kededi gho keten tsü khenya benle meshen tenla? Tsüna mathu sapi anongheya mehai kwe?

¹⁶ Hi kuti wi mathu pi oliv ton mawa keshawa, mabi kemehai kejon kebünwa le ci; isala khilitsü atsanphagha hhai ti sa gho nu anni pi mawa mecang nu ma cünathu pashüaden.

¹⁷ “Hi Apvüwa Kekhang ntsawa, hi no Israel nu Judah pi sheng theng, isala hi khili kededi sengho mathu pateqhe ben. Mathu na sazzi kesa ghena mathu ketanla ha sengho mathu miwi chiyaben; mathu na ahhanshathu sapi Baal cü nu hi sapi lebentsu thsüa.”

Acho sapi Jeremiya kahang Yasalekesa

¹⁸ Apvüwa na ighinyithu na acho sapi hi shun keben hi kiza.

¹⁹ Hi pi khaghaneni zza jühkeya ti ssi wa pathiale saben, nu mathu na acho nkemehai sapi hi shun ben lela hi tsü nchü. Mathu na hati khiben, “Ithu na achantonwa tsü ma cüki mehai keben wina shüchia na, ithu na ma pathi nu thola ma nmeshen thsüla na.”

²⁰ Tsaseng wi hi kekhie sa, “Kekhang ntsawa Apvüwa, no pendhenyi kemeshonwa, no anyithu leben nu kemeshen ghan-nan den. Hi icüki hapi nkwen wi chidha, tsalina hi ya no anyi hathu miwi ajukhikeya muya thsülo.”

²¹ Anathoth nyithu na hi pathi mvu sa, nu mathu na hi kizala keujüla hi Apvüwa ketsijüh hapi thangchi lethu mathu na hi pathi cüben.

²² Tsalina Apvüwa Kekhang ntsawa na khi, “Hi mathu meten cüden! Aghi wi mathu nyi acalithu pathi; ghanyithu na khwenthi shüaben.

²³ Hi wan kededi sengho Anathoth nyithu miwi chile kesa ghena matsü ssan pi thengdha, nu tsü tsüwa na ghothu mathu kesüla hangya nben.”