JAMES 5 - Kemethajüh (N) (Re-editing) Bible (BSI)

Keban Kekitsan

¹ Nthu kebanthu khili ijühkinalo! Ketizen kesa na nthu miwi gho keten ghena qai pi kuhonlo.

² Nthu keben na bighedha, nu amaqhhathu na nthu thsümeni dsadha.

³ Nthu suna nu rükatssü na avüjjü dsakidha, nu avüjjü tsüna nthu ghena chüza saben nu tsüna anni ti nthu sajjü dsaben. Nthu na atsathang sakhen hathu wi keben saghu pi theng yadha.

⁴ Nthu na anyi nthu lli wi kekuli kutimen mangla pi ncü. Mathu kiqai hhai tsü kinachilo! Nthu lli kewwithu kiqai hhai na wala atenti Pvüwa, Anyiza khuna wi dudha.

⁵ Nthu na ayyi he wi nthu nonkwen nu anonkeghe sa hangyadha. Nthu ketanla nthu ghanja pi kunon nu kepathi tsathang ghena kiden yadha.

⁶ Nthu na anyi kesami nkemithu meshensa nu pathidha, nu mathu na nthu nkaghanineng.

Kethankehi Nu Kekhie

⁷ Tsalina icünyuthu, Apvüwa na npi kegho chu kethankehiya. Ghangchilo, allikeca kesü na khatila kethankehi nu ma lli wi asubi kemehai bün keya tsü hie benten khe. Ma kethankehi nu atsankegho atuwa nu asakhenwa tsü hie benden.

⁸ Nthu la kethankehi ben yalo. Kempvüza saben, kepaghenanye Apvüwa gho keten tsathang na tetsakidha.

⁹ Icünyuthu, Anyiza ya nthu nmeshensa thsüle kesalina nthu khokho tu wi nkicennali lalo. Ajühkekaghatenwa tsüna tetsakidha, ghole kidenyadha.

¹⁰ Icünyuthu, atusenjüh-kechüthu na Apvüwa nyan wina kekhithu tsü meshenya. Mathu pi ketizen kesa wi kethan-kehi nu kekheneng keya tsütsonca sa yalo.

¹¹ Mathu kekheneng keya ghena ithu na mathu pi kemihhi ntsale ciden. Nthu na Job kethankehi keya cüki zayadha, nu Apvüwa na asakhen wi ma ghena khati sa chicü khe nthu na chüben.

¹² Icünyuthu, tsüdi miwi la nthu na ajühkhukechi wi nkishen lalo. atssan ayyi nu ciwi keben mangla khi pi nkishenla. Nthu na anthu “anle”, nyethu “nyele” ketan khilo, isathu nthu na Anyiza jühkekaghaten wi gho nben.

¹³ Nthu jawi anyi pahan na agüccü ben kwe? Ma ya kekhie nsa thsüthu yishü. Anyi pahan na anonghe ben kwe? Ma ya keseng khwi sa thsülo.

¹⁴ Anyi pahan na kesakinaa saben kwe? Ma ya kemehu wi keshenpfüthu cichi nu mathu ya ma miwi kekhie sa nu Apvüwa nyan wina adeli pi ma ghayen thsülo.

¹⁵ Kenondi wi kekhie kesa ha kesakinaa sa kebenwa sa pi mehai cüaben; Apvüwa na ma sa pi mehaiya thsü nu ma kesami sa kethengthu teshi pi cüaben.

¹⁶ Tsalina nthu sa pi mehaiya thsüale kesalina khokho tu wi kesami khishi nu khokho ghena kekhie kesalilo. Ketsatan nyi kesü kekhie na kekhang ben ntsa kuliyaden.

¹⁷ Elijah la anyi ithu ti kesa kesü. Ma atsan ngho lalo kesa kekhie sa ntsa kechi wi ayyi wi amapi kecheng nu asha tugho atsan nghola.

¹⁸ Ma kheneng kekhie sa kechi wi atssan wi atsankegho keshusha dugho nu ayyi wi pala bi bünya.

¹⁹ Icünyuthu, keujüla nthu jawi anyi kesü na atsentsawa wina deja bvü nu kepa wi kesü na ma ssineng gho lethu,

²⁰ ha meshenyalo: thowa na kesami nyi kesü sazzi keten len wina ssineng gho khe keshü wina kesamiwa ghamu hangsha yaben nu kesami kejon teshi kecü sengho ben.