JAMES 3 - Kemethajüh (N) (Re-editing) Bible (BSI)

Amili Cüki

¹ Icünyuthu, nthu kejon nyu kesansithu nsa lalo. Kepaghenanye nyu miwi la ithu nyu kesansithu ji ghan-nan ten kesa nthu na chüben.

² Ithu tsüdila matsü kejon wi la sazziden. Isala keujüla anyi kesü ma mangwa khi khe nsazzi lethu, ma cencuben nu ma kahang tsüdi wi kekhenengya mehai.

³ Ithu na amigheli pi goru pang wi chi nu tsü yala ithu jühkina thsüden, nu ithu na mathu pi khiewa wa thsü mvu khe waden.

⁴ Nyelela ahunjjen cüki la meshenchilo: tsüna di ntsawa lela ameghü kekhang na tsü mo pi bvüden, tsü keculawa na kekuhochan kizzakeu pi tsü zung sen nu khiewa wa mvu khe waden.

⁵ Tsalina anyi mili la tsüti kesa: tsüna agwo wi kizzakeu kesü isala pala kedidi khi pi kapvüya mehai. Ayinong tsüna di ntsawa saben lela anni keu pi tsü mecang chiya mehai le!

⁶ Nu amili la anni makesü. Ithu gwo jawi amili ha nketsatan yyi kesü, tsüna ithu gwo tsüdi yasaden. Tsüna annighajü wi anni tsü pi ithu kahang tsüdila mecang den.

⁷ Anyi hana sahangkechithu tsüdi — aghangsa nu awathu, ayyi miwi kizza keten nu atssü wi keben sa tsüdila sansiya mehai nu sansi ghodha.

⁸ Isala anyi thola amili ha npi sansiya. Ha nmehai nu kekheneng nkeya ji kesü, keshü ji na pong ben.

⁹ Ithu amili pi Apvüwa nu Abawa seng den, nu pi Anyiza tsi ti sa kechi anyi lela kishen cüden.

¹⁰ Apang kesü wina nyu seng nu nyu la kishen cüden. Icünyuthu, amili pi tsüti kesa-u nye!

¹¹ Atssükebvü ku kesü wi atssü keminnun nu kekha bvü shhugho nten.

¹² Icünyuthu, khhaghabvü ton wi oliv bi bün nten; nyelela kemeshentsse ton wi khhaghabvü bi bün nten. Nu atssü kisheng kebvüku wi atssü keminnun shhugho nten.

Tang Wi Kemetsa

¹³ Nthu jawi kemetsa nu chüshikeya nyi ben kwe? Ma kahang kemehai wi ma nkekapvü kemetsa kekuli pi nyu ccüca thsülo.

¹⁴ Isala nkemehai anyonghokepvü, apvükemene kemeshen na nthu leben wi ben lethu, nthu kemetsa wi sami pi atsentsawa tsü nshunla.

¹⁵ Kemetsa tsüti kesa tsüna tang wi kedugho nye; tsüna ayyi ji, tsüna aghamulen wi nyela atsaghang kekuli.

¹⁶ Kepaghenanye anyonghokepvü nu apvükemene keben wi tsü pala kekivvü nu nkemehai tsüdila ben.

¹⁷ Isala tang wi kedugho kemetsawa tsüna atuwa kemetha, tsüna kecca, keccaketssü, nu apvüshang kemehai; tsüna nanketizen nu kekuli bi kemehai bün yaden; tsüna nyu nankepapa kesa nu nkenyeghe kesa nmi.

¹⁸ Keccawa sa ketenthu na kecca pi yang kechi wina ketsatanwa tsü wwiyaden.