JAMES 2 - Kemethajüh (N) (Re-editing) Bible (BSI)

Nankemeghü Ghena Kekitsan

¹ Icünyuthu, nthu na ithu Pvüwa Jisu Khrista, Apvüwa nyankethangwa tsü kenondithu sa nu khiela anyi tsi ghang nu nankepapa sa yishü.

² Keujüla anyi kesü na suna kwenzza qhan pvü nu athsümeni kemehai mphi, nu ketha-u kesü la athsümeni keqei mphi nu nthu ajühkeccünengli keben wi gho.

³ Keujüla nthu na athsümeni kemehai pvü ketenwa wi “Apen kemehaiwa wi ha donkilo,” isala ketha-uwa wi “Ciwi ngan benla, nyelela gho he ayyi wi donkilo,” khi lethu,

⁴ nthu ketanla nthu jawi anyi nankepapa sa nu nkemehai kemeshen wina nyu ghan-nan ben.

⁵ Hi ketizenthu, ha kinachilo! Anyiza na ayyi ha wi kahhatu nyi kessi pi kenondi wi keban saya thsü nu pi ma tizen ketenthu cüle khishichi ketheng kadiyyiwa tsü ghongya thsü.

⁶ Isala nthu na ketha-u nyi n-nyuwa ten le! Kebanthu na nthu meten-mesha nu nthu ssi nu pendhethu tu wi wa nten kwe?

⁷ Mathu na anyan kemehai pi nthu cü kethengwa tsü khisaden.

⁸ Nthu na ntsawajüh wi Kadiyyi yenwa tsü kenie wina “Nthu ketanla nthu tizen keten tsüti nthu jenphonthu tizen yalo.” kesa tsü niecen ben lethu, nthu na kemeshonwa sayaben.

⁹ Isala keujüla nthu na anyi tsi kenie wina nankepapa saten lethu, nthu na sami ben, nu nthu ayenwa keyasa nyi ghena Ayenwa na nthu meshensa ben.

¹⁰ Anyi thowa na ayenkhukechi kesü yasa khe ma tsüthu tsüdi keyasa nyi sadha.

¹¹ Kepaghenanye “Keqheza nsala,” kekhiwa tsüna “Nyu npathi lalo,” kesa la khi. Keujüla nthu na keqheza nsa, isala nyu pathi lethu, nthu na ayenwa tsü kepakhhi nyi sadha.

¹² Ithu lisha chicü keten yenwa tsü pi ghan-nan keten nyithu tsüti ajühkhi nu kulilo.

¹³ Kepaghenanye ajühkekaghaten wi Anyiza na nyu nantizen nketen nyithu nantizen nben; isala nanketizenwa tsüna ajühkekaghaten miwi khang yaden.

Kenondi Nu Kekuli

¹⁴ Icünyuthu, anyi kesü ma kenondi benle khi lela ma kekuli nmi lethu, mangwa kekiyi ben nu? Kenondi tsüna ma hangshaya mehai kwe?

¹⁵ Keujüla ciwi acünyuthu nyelela atssüggüthu na athsümeni nsenthu yishü nu kedsakejjü mangla nmila ben.

¹⁶ Nthu na mathu wi “Anyiza sawegü pi nthu cülo! Yengkewhe nu dsajjü nonkwen benlo!” isakhi nu mathu nsenthu keyishü mangla pi mathu ncüla lethu, ciwi mangwa kemehai ben nu?

¹⁷ Tsalina kenondi ha kekuli pi nkesaghu tsü keshü.

¹⁸ Isala pahan na “Anyi kesü na kenondi ben nu kepawa na kekuli ben,” isa khiya mehai. Hi khi kebenwa na “Nthu khati nu kekuli nmila kenondi benya mehai khe pi hi ccücalo. Hi kekuli wina kenondi pi nthu ccüca na.”

¹⁹ Nthu na ciwi Anyiza kesütan benle kesa nondi ben ma? Mehai ben le! Atsaghangthu la tsü nondi nu messi pi kedheggü benden.

²⁰ Nthu kejüphonthu! Nthu kekuli nkemi kenondi tsüna keshü kesa pi ccüca thsü mvuben kwe?

²¹ Ithu baqhai Abraham na khati nu Anyiza tu wi meshonya nu? Tsüna ma kekuli wi ma ma tsawa Isak pi kekinyipen wi khukechi wina ma Anyiza tu wi meshonya.

²² Nthu na ma kenondi pi kekuli saghu keben tsü nmu kwe? Ma kekuli ghena ma kenondiwa tsü sa cencu cü.

²³ Nu ntsawajüh na kekhi tsü sa cenya, “Abraham na Anyiza nondi, nu ma kenondi ghena Anyiza na ma pi ketsatan nyi saya.” Tsalina Abraham pi Anyiza pvüshangwa cia.

²⁴ Tsalina nthu anyi kesü ma kenondi ketan nyela ma kekuli wina Anyiza tu wi meshon yaben kesa chüyaben.

²⁵ Keqhezamen kedsawa Rahab la tsü makesü sa. Ma kekuli wina Anyiza tu wi meshonya; ma Israel nyi wahhaithu ssiya nu mathu kiqa pi alen kepawa wina bvü thsüa.

²⁶ Tsalina aghamu nkemi agwo na keshü tsüti kenondi la kekuli nkemi tsü keshü.