JAMES 1 - Kemethajüh (N) (Re-editing) Bible (BSI)

¹ Anyiza nu Apvüwa Jisu Khrista maghawa James wina pi ayyi maben wi bvüzighe keben Anyiza nyithu tsüdi shalom saben.

Kenondi Nu Kemetsa

² Icünyuthu, nthu na pala katsüha wi ketizen sa lela anonghethi salo.

³ Kepaghenanye nthu kenondi tsü ghankenan wi kethankehi keya tsü benyaden kesa nthu na chüben.

⁴ Nthu mehai cencu nu mang wi la nkecen nsale kesalina nthu kethansi-kethansa ntsa benyalo.

⁵ Keujüla nthu anyi pahan na kemetsa wi hhatu ben lethu, ma ya Anyiza wi tsü khieya thsülo, kepaghenanye Anyiza na mohho ntsa nu anon-nkhula pi tsüdila cüden.

⁶ Isala nthu kekhie wi tsü nondi nu nkesütula nsathu yishü. kepaghenanye anyi kesütu ketenwa tsüna ameghü na atssükedone tssü mo kuli keben ti kesa.

^7-8 Anyi tsüti kesawa tsüna ma kemeshen nsachü nu mangla südheya nten, ma Apvüwa wi pala mangla muya benle nmeshenla mehai.

Kahhatu Nu Keben

⁹ Anyiza na mangla nkenye Khristanyi kesü pieki cüthu, ma tsü ghena anonghe kesa-u,

¹⁰ nu Anyiza na keban Khristanyi kesü zansha cü lela, ma tsü ghena anonghe kesa-u. Kepaghenanye keben tsüna aghang thighi kepvü ti nmila ben.

¹¹ Aghani na sa ntsa keshagha wi aghang tsü thsü teshiden; ma thighi tsü jüwa nu ma tsikemehai nmiladen. Tsü makesü kebanwa la ma piketsü sa bha keben tsü yasa ben.

Ghankenan Nu Mechukesa

¹² Ghankenan wi khangkeya nyi na kemihhi ntsa, kepaghenanye ma hati ghankenan wi zükeqhe nganya lethu, Anyiza na kahang liwen pi ma tizen ketenthu cüle khichi ketheng tsü pi ma kutimen kesa muyaben.

¹³ Keujüla ghankenan wi anyi kesü mechuben lethu, ma hati nkhila, “Kemechu hawa ha Anyiza wina ghole.” Kepaghenanye nkemehai pi Anyiza mechuya nben, nu ma anyi thola mechu nten.

¹⁴ Isala anyi kesü ma ketanla ma nkemehai kenmvuwa tsü sa lethu, tsüna ma ssisen wa kemechu wi chiden.

¹⁵ Isanu ma nkemehai kenmvuwa npvüya nu kesami tsü pvügha yaden; nu kesami tsü zügüya lethu, keshü sengho cüden.

¹⁶ Hi ketizen icünyuthu, nyu yala nthu nmechu thsü lalo.

¹⁷ Aju kemehai nu cencu khukechi tsüdila tang wi kewegüthu Sakechiwa, tang wi kemili nketenwa nyelela kheneng bvü nu akekhwen sa nketenwa Anyiza wina kedugho.

¹⁸ Ithu yala ma sakechithu jawi abi atuwa saya thsüle kesalina ma ketanla ma kemeshen pi atsentsawa jüh wina ithu pvüghaya thsü.

Kina Nu Kekuli

¹⁹ Hi ketizen icünyuthu, ha meshen yalo! Anyi tsüdila wan nu kinaya, isala ashina nu khi, nu wan aleben nminula.

²⁰ Kepaghenanye anyi leben keminu tsüna Anyiza ketsatan tsü gweghe kuliya nten.

²¹ Tsalina ayencüki nkemetha nu gheshighenathu tsüdi teshilo. Anyiza tu wi whanu ma ajüh pi nthu leben wi yangchi ketheng, nthu hangshaya kemehaiwa tsü yayalo.

²² Ajüh kekina nyi ketan sa nu nthu ketanla nthu nmechula, isala ajüh tsüwa ghena kekuli nyi salo.

²³ Anyi thowa na ajüh tsü ghena kekuli nyi nsala kekina nyi ketan saten khe ma anyi kesü ayena wi ma ketanla ma mu keben ti kesa

²⁴ Ma mehaitsü ma ketanla ma ghang chitheng nu bvü meyi ma khati kesa khe ma maliden.

²⁵ Isala thowa na anyi lisha chicü keten yen kecencuwa tsü ghang nu ma za keyathu tsü nmalila keshüthangla saten khe ma katsüha sa kewa tsüdi wi Anyiza na kemihhi pi ma cüben.

²⁶ Anyi kesü na ma keccüna sen kemehai nyile meshen nu ma mili kekheneng meya lethu, ma ketanla ma mechuben, nu ma keccüna tsüna mang men la nmi.

²⁷ Abawa Anyiza tu wi atsentsa nu kemetha keccüna tsüna ha: Magha-maghangthu nu denyi-demathu na ketizen sa keben wi mathu nantizenchi, nu ayyi nkemehaiwa wi methasi benkeya.