ISAYA 9 - Kemethajüh (N) (Re-editing) Bible (BSI)

¹ Mathu na agükeccü tsü ha wina bvükeya len nmila ben. Zebulun nu Naftali mizzathu yyi na kuti tsüwi anyankekinyen sa, isala ha sengwi tsü kenyuwakü sengho ayegu hawa cüaben, Mediterranean nishuwa na wala Jordan khhaka yyi kecu, nu wa asangthu na hang keben Galilee kecu.

Ha sengwi Kadimiwa

² Kejang wi alentsen ketenthu na kewegü keti muyadha. Mathu na ayyi kejang wi hang keten, isala khili tsü kewegüwa na mathu miwi wegü bendha.

³ No anonkeghe keti pi mathu cüdha, Apvüwa; no mathu ya anongheya thsüdha. Mathu na no kulikechi ghena anongheben, anyithu na alli wwithu anonghe keten ti, nyelela keben-keyeng nkakeya pi kegishü wi anonghe keten tsüti le.

⁴ Kepaghenanye no mathu meten-mesha keten sunkeqhanwa tsü pakhhidha, nu mathu kekihhe mighe khhatssüwa tsü la. No mizzatentiwa chayadha n-nyithu meten-mesha nu teng dsa keten; matsü kesie wa kesa wi no Media ghinyithu pasha kesa ti sadha.

⁵ Anyi vüyale wa keten süpahizi ccüguwen, nu mathu thsümeni wi ajjü kaki kebenthu tsüdila anni pi mecang cüden.

⁶ Ghanyi kesü pvügha pi ithu cüdha! atsa kesü pi ithu cüdha! nu ma ithu miwi kekhang kesenwa saaden. Ma pi “Amankesa Kesansichüwa,” “Kekhang ntsawa Anyiza,” “Anuphan Bawa.” “Kecca Kaditsawa.” le ciden.

⁷ Ma kadi kekhang na khang kayi ben den; ma kadiyyi na keshüthangla yazishu ben den. Ma Kadimi David kuti sa kekhang senden, ma kekhang tsüna kemeshon nu jüh tsentsa sen nu saaden, khili na wala asakhen kecu saaden. Kekhang ntsawa Apvüwa na ha sale meshen yadha.

Apvüwa na Kemeten pi Israel cü keten

⁸ Apvüwa na Israel kadiyyi nu Jakob shicübvüghathu tsüdi miwi ketizen kesa pi chile khidha.

⁹ Israel nyi Samaria wi kebenthu tsüdila Apvüwa na ha kulidhale kesa chüyaben. Khili mathu na kapvü nu awisa ben. Mathu na khiben,

¹⁰ “Yimecanglon pi kesa jjenthu na qancadha, isala ithu alon pi kesa jjen pi tsüthu mithon saaden. Amba chan pi ajjen keghü kesathu widhidha, isala ithu na sedar chan kemehai ntsa pi tsüthu mithon saaden.”

¹¹ Apvüwa na mathu ghinyithu kechüchi pi mathu ssikaghashenlo sadha.

¹² Nishuwa Siriya nu niduwa Filistia isala Israel ghandsa le manyi pang kayadha. Isala Apvüwa leben ketsu na nmila nsa; khilila kemeten pi cü le ma kwen chang senben.

¹³ Apvüwa Kekhang ntsawa na kemeten pi mathu cü lela Israel nyithu na leben khapeghe meya, mathu na kheneng sen nu ma wi ngho.

¹⁴ Ghanan kesü jü ketan Apvüwa na kemeten pi Israel ccülikesathu nu mathu nyi cüaden; ma mathu tsüdila yasatha sa cüden, ma li nu ma ghanu la.

¹⁵ Anyi keqhai nu kenyuwa qothu tsüna ma li, nu atusenjüh-kechü na mathu kesansi wi milikemesa jüh khi ketenthu tsüna ma ghanu le!

¹⁶ Anyi hathu ssiketenthu na mathu lentsütsonsa nu pakivvü ntsa sadha.

¹⁷ Tsalina Apvüwa na acalithu kesütanla bvüya thsü nten, nu ma denyi-dema nu magha-maghangthu nantizen chi nten, kepaghenanye anyi tsüdila Anyiza nkinyila gheshighena ketan nu mathu kekuli tsüdila nmehai le. Tsüti sa lela Apvüwa leben ketsu na ma sakhen sa nben, isala kemeten pi cü le ma kwen chang sen nu ben den.

¹⁸ Anyi gheshighena na mecang pi anni na aghazü nu assensü mecang keten tsüti le.

¹⁹ Kekhang ntsawa Apvüwa na ma ghepvü keben ghena ma kemeten khukechiwa tsüna anni ti ayyi tsüdi wila anyi yasa, nu tsüna anyi kesüsü tsüdi ma ketanla ma ghena tsüti saaben.

²⁰ Diyyiwa wi anyi tsüdila kedsawa katsüha lela muya kemehai khupi dsaden, isala mathu kaghama saya nben. Mathu na atsanga lela dsa ben!

²¹ Manasseh nu Efraim nyi na khokho ssikaghashen nu manyi gweghe sen wa Judah ssisa. Tsüti sa lela Apvüwa leben ketsu na nmila sa nben; Tsaseng wi lela kemeten pi cü le ma kwen chang sen nu ben den.