ISAYA 8 - Kemethajüh (N) (Re-editing) Bible (BSI)

Isa tsawa pi Anyithu wi Azensu kesa

¹ Apvüwa na hi wi khi, “Pala kezhüji mapha keti kesü khuya nu tsü miwi lesüyen ketiti zhüyalo, ‘Wan shuya, Shishi yasa,’

² Kenondi qo nyi keni — keqhaikediwa Uria nu Jeberekhia tsawa Zekhariya manyi kessi pi chüza sa thsülo.”

³ Matsü pahan sengwi iwubvü na atsa npvüya. Ishinyi tsa pvügha keya wi Apvüwa na hi wi khi, “Ma nyan pi ‘Wan shuya, Shishi yasa,’ isa cilo.

⁴ Atsa tsüwa na ‘Iba, Ijja,’ isa npi keci qo wi Damaska keben-keyeng nu Samaria wi shukeya tsanqai tsüdila Assiriya Kadimiwa na pvü bvüaben.”

Assiriya Kadimiwa na ghoketen

⁵ Apvüwa na hi kiza neng.

⁶ Ma khi, “Anyi hathu na Shiloa Kuza tssü kemehai tsü meya mvula nu Kadimiwa Rezim nu Kadimiwa Peka manyi tuwi kedheggü wa kesalina,

⁷ hi Apvüwa, hi Assiriya Kadimiwa nu ma süpahi tsüdi ssigho Judah vüden. Mathu na Eufrat Ghaku tssü na ma ghüsa tsüdi pong sen nu lle wa keben ti shhughoaden.

⁸ Mathu na atssüketi ti asun nten wina pala tsüdi danbhon sen nu Judah yyi wina ghoaben .” “Anyiza na ithu ssiden! Ma na ma gisha zanshigü pi ayyiwa tsü wheng senben”

⁹ Nthu na messi nu saghu yalo, mizzatentithu! Ayyi kelensie wi kebenthu, kinalo. Ssikesali le kidenya, isala messi yalo.

¹⁰ Nthu acho kidenya! Isala mathu na mehaicenya nben. Nthu na nthu kekhi mvu khiya! Isala tsüdila kaghacang, kepaghenanye Anyiza na ithu ssiden.

Apvüwa na atusenjüh-kechüwa kitsankechi

¹¹ Apvüwa na ma kekhang di ntsa sen nu hi ya anyithu na ton keten len nton lalo kitsanchi. Ma khi,

¹² “Anyithu na acho kiden keben witsü nsaghula, nu mathu na messi keten tsü nmessi lalo.

¹³ Hi Apvüwa Kekhang ntsawa, hi metha le kesa meshen yalo; nthu na nmessithu keyishüwa tsüna hi le.

¹⁴ Hi ajenkeben kemethawa ghena hi anyithu na accümeshü keten lon tsüti le! Hi aca ti Judah nu Israel kadiyyi nyithu, nu Jerusalem nyithu yaya ketenwa tsü le.

¹⁵ Kejon na accümeshüden! Mathu na khuli nu kecencha shaben. Mathu na aca wi yayaben.”

Keshüthu Keccüneng ghena Kekitsan

¹⁶ Nthu isenkeniethu, Anyiza na ajüh pi hi kecüthu tsü noncca nu kesen-u le.

¹⁷ Apvüwa na ma nyithu wina kuthi bvüdha, isala hi ma nondi nu kaghang pi ma miwi chiden.

¹⁸ Hi hewi Anyiza na pi hi kecü tsangathu ssinu ben. Apvüwa Kekhang ntsawa, Zion Yikha wi ma kadipen sa kebenwa tsüna Israel nyithu ghena ikhang pi kahang jüh ti kesun chitheng.

¹⁹ Isala anyithu, nthu yala tusenkekhi nu aghamu keccünengthu, ndama nu nbvümugho ketenthu wi ketsijüh kina yalo nthu kizaben. Mathu na khiben, “Anyithu na kahangthu ghena aghamuthu nu keshüthu wi ketsijüh nkinathu yishü le.”

²⁰ Nthu na hati mathu wi khineng den: “Apvüwa na nthu sansi keben jüh kinachilo! Keshü keccünengthu jüh nkina lalo, mathu na nthu kiza ketenwa tsüna nthu ghena kemehai kuliya nben le.”

Sakeyishü Tsü Kesü

²¹ Anyithu na accükwenshü nu ghamala ayyi wi kegoeben. Mathu kaghama nu mathu lebenketsu wina mathu kadimiwa nu mathu Nyiza la kishencü ben. Mathu na yaki atssan wi ghang

²² nyelela yasha ayyi wi ghang, isalela mathu jügü pi chiketheng kejang nu agükeccü qhethiketen kesawa tsü ketan khe mangla muya nben.