ISAYA 7 - Kemethajüh (N) (Re-editing) Bible (BSI)

Kadimiwa Ahaz ghena ketsijüh

¹ Uzziya tsa Jotham tsawa Kadimiwa Ahaz na Judah miwi kekhang sen keben tsüwi aghi na shhugho. Siriya Kadimiwa Rezin, nu Israel Kadimiwa Remalia tsawa Peka manyi na Jerusalem ssikaghashen, isala tsü yameyala.

² Siriya ghinyi na Israel yyi wi bendha le kesa ajüh na gho Judah Kadimiwa cu keya wi, ma nu ma nyithu tsüdila mathu keqhethi pi ameghü na achanton mo kuli keben ti kedheggü wa.

³ Apvüwa na Isa wi khi, “Ntsawa Shear Jashub ssiya nu wa Kadimiwa Ahaz metu chilo. Ma aghajü mmiwa wina atssü zan sengho keben atssü len kenten wi athsü de ketenthu len wi ma muya ben na.

⁴ Ma ya meghe-metsa, ccen ben, nu nmessila nyelela apvü-nsa lalo kizalo. Kadimiwa Rezin nu ma nyi Siriyathu, nu Kadimiwa Peka manyi ghekepvü na achan cüna keni miwi annikhu keben ti kesa ketan le.

⁵ Siriya nu Israel pi manyi kadimi gweghe nu acho satheng.

⁶ Mathu na Judah nka nu anyithu patemessi pi manyi wwaya nu Tabeel tsawa pi kadipen wi chia le ben le.”

⁷ Isala tsü saya nben kesa hi Apvüwa, hi khiben.

⁸ Mangkesa na nu? Kepaghenanye Siriya na ma ghazen nyunutiwa Damaska miwi nkhangki, nu Damaska na Kadimiwa Rezin miwi nkhangki le. Israel lethu amapi achentugho nu manga jüwi pakhhizighe nu mizzatenti nsa qo laden.

⁹ “Israel na ma ghazen nyunutiwa miwi nkhangki, nu Samaria na Kadimiwa Peka miwi nkhangki le. “Keujüla no kenondi ben meya lethu no la benya nben.”

Immanuel Zensu

¹⁰ Apvüwa na ajüh kepa wi kesun pi Ahaz cü,

¹¹ “Apvüwa n-Nyiza ya azensu pi no cülo khielo. Tsüna keshü yyi kedhu wi, nyethu tang wina ghoben.”

¹² Ahaz na khineng, “Hi azensu khie nten, hi Apvüwa mechu le sa nten.”

¹³ Isa na tsü luneng, “Kinalo, Kadimi David shicübvüghathu. Nyu na nthu nkaghangcha ketanla mehai lethu, Anyiza la nthu n-ghangchala thsüa le kwe?

¹⁴ Isalethu, Apvüwa na ma ketanla azensu kesü pi no cüaden : Ghala kesü na atsa npvüya nu pvügha yaden, nu ma nyan pi Immanuel ciden.

¹⁵ Ma ketanla pala meshenshiya kemehai tsüwa na ghothu, anyithu na tsenitssü jjü nu anikholi dsa den.

¹⁶ Tsü tsüna npi kegho wi lela no pateqhe kesa kadimi keni tsü teshiaben .

¹⁷ Apvüwa na no, n-nyithu, nu kadimi theghi maben miwi agükeccü, Israel kadimiwa na Judah ssinu kepa kesa sengwi ketizenkesa mu keya miwi ketiki sengho den — tsü lethu ma Assiriya kadimiwa ssinu ghoden.

¹⁸ Tsü tsüna kegho wi Apvüwa na sü-u sapi Ejipt nyithu ya lebendi nu Nil kuza kesie ntsa wina gho, nu Assiriyathu ya mathu yyi wina anikho ti gholo azensu sachiaben.

¹⁹ Mathu na yyiketijü, ghagu-ghana, ayyiku nu alonshi wi shicha sen nu ghoben, nu mathu na aghazü ja nu amou tsüdila shicha sen nu ghoaben.

²⁰ “Tsü tsüna kegho wi, Apvüwa na Eufrat Ghaku khhaka wi Assiriya kadimiwa wi alikeca nyi kesü melli sen ghoben! Nu ma nkhenke kenye, nli nu ngwo ssen tsüdi whiaben.”

²¹ “Tsü tsüna kegho wi, keujüla allikeca nyi kesü na amesü ghala kesü nu aneni keni ketan meshaya lela,

²² tsüthu tsenitssü kejon misügüya nu ma nsenthu keyishü tsüdi sayaben. Tsüti saaben, ayyi tsüwa wi hang keyathu na tsenitssü jjü nu anikholi dsaben.

²³ “Tsü tsüna kegho wi, kemeshentsse lli kemehaithu wi maton hazar kesü, nu kesü na ma men rükatssü hazar kesü kebenthu tsü la aghazü nu ataqae na shigü bhon shaben.

²⁴ Anyithu na alamugho sen nu ciwi asajügü ben. Anle, diyyiwa tsüna aghazü nu ataqae na shigü bhon shaben.

²⁵ Allica keten yyishiphon tsüdi wi aghazü ketan sa nu thola ciwi wa nbendha. Tsüna amesüsi nu khaghaneni tsse keyapen saaben.”