ISAYA 66 - Kemethajüh (N) (Re-editing) Bible (BSI)

Apvüwa na Mizzatentithu jühkekaghaten

¹ Apvüwa na khiben, “Tang tsüna hi kadipen, nu ayyi na iccü kennipen. Isathu nthu na ighena ajjen khati kesa saya mehai nu apen khati kesa pi hi hang thsüya ben nu?

² Hi hi ketanla atssan ayyi maben sachi le! Hi anyi thowa na ma satemeni nu leben khapeghe, hi messi nu ijühkina ten khe tsü miwi hi kenen ben den.

³ “Anyithu na mathu kesamvuwa tsü saden. Mathu ghena tsü mathu na amesü süpon pathi pi ahhansha sa le, anyi pi ahhansha sa lela; mathu na khaghaneni zza pi ahhansha sa le, affü sun handhi lela; mathu na asu pi kekinyi sa le, avü jjü pi chi lela; mathu na hankedemvu pi kekinyi sa le, atsikezhü wi kekhie sa lela; tsüdila makesü. Mathu na nankiqanan kekinyi kesa wi mathu nenden.

⁴ Tsalina hi kededi mathu na messi ketenwa tsü sengho mathu miwi chiaben, kepaghenanye thola hi keci tsü nluneng nyelela ijühkekhi tsü nkina. Mathu na ijüh nkina nu nkemehaiwa sale kessiya.”

⁵ Apvüwa na mangwa le khiben khe kinalo, nthu ma messi nu ma jühkina ketenthu: “Nthu na hi wi lebentsentsa sa keten ghena nthu nyi pahan na nthu nanmeghü nu nthu ssinu mangla sa nben. Mathu na nthu nankeqhe nu khiben, ‘Ithu na nthu nonkeghe tsü muya thsüle kesalina Apvüwa yala ma kekhang ketiwa tsüpi ccüca nu nthu hangshaya thsülo.’ Isala mathu ketanla mathu kimenni yaben le!

⁶ Kinachilo! Anyunutiwa wi kemagha hhai misikhhali Kekinyijjen wina ahhai sa kebenwa tsüna Apvüwa na kemeten pi ma ghinyithu cü keben hhai le!

⁷ ““Inyunuti kemethawa tsüna kinyibvü kesü na n-naala zuli atsa kesü pvüghaya kesa ti le.

⁸ Anyi kesüla pala tsüti kesa muya nyelela zayadha kwe? Ghanan kesü jüwi mizzatenti kesüla pvüghakeya na ben kwe? Zion na mizzatentiwa npi pvüghakeya tuwi kesie naa nbendha.

⁹ Hi inyithu ssigho kepvügha tsü cu nu mathu ya npvügha thsüla benle nmeshenla.” Apvüwa na khichidha.

¹⁰ Jerusalem ssinu anonghe; ma ghena kenong salo, nthu anyunuti hawa nen ketenthu tsüdila! Khili ma ssinu anonghelo, nthu ma ghena anongü ketenthu tsüdila!

¹¹ Ghanyi kesü na ma jja tseni wi ma nonkwenya keten tsüti nthu na ma mehai kayi keya wi anongheyaben.

¹² Apvüwa na khiben, “Hi kesie mehai kayi keya sengho nthu cüben; mizzatentithu keben-keyeng na khiela qha nketen aghakutssü ti lle sen nu nthu wi ghoaben . Nthu na ghanyi kesü ma jja na ma kwen wi pie nu ghalithi noncca keshagha tsanga ti saaben.

¹³ Ajja kesü na ma tsanga lebenkagha sa cü keten ti hi Jerusalem wi nthu lebenkagha sacüaben.

¹⁴ Nthu na ha sakeben kemu wi nthu kenong saaben, tsüna nthu sapi zü nu agwo mehai cüaben. Tsaseng wi nthu na hi Apvüwa, hi ijühkina ketenthu kiqa nu ileben ketsu pi ighinyithu ccüca tenle kesa chüyaben.”

¹⁵ Apvüwa na anni ssighoden. Ma caghamo gisha miwi ben nu kemeten pi ma mathu miwi alebentsu kebenthu cüle saben.

¹⁶ Ma anni nu njünnu wina kemeten pi ayyi nyi wi kesazzi mu keyathu tsüdi cüaden, nu kejon pi shü thsüaben.

¹⁷ Apvüwa na khiben, “Anyiza nkechü kekinyi ghena mathu kahang sametha ketenthu, kesennie sen nu asanku kemetha wi wa, nu avüsa nu amijü nu kepa wi nankiqanan tssethu dsa ketenthu ghena matsü asakhenwa na tetsakidha.

¹⁸ Hi mathu kemeshen nu mathu kekulithu chüben. Mizzatenti tsüdi wi anyithu saghu le ghoden. Mathu na gho saghuya lethu hi kekhang na mangwa saya mehai khe mu yaben,

¹⁹ nu hi kemeten pi mathu cüle kesa chü yaben. “Isala hi mathu pahan heishaya nu kesun pi mizzatentithu nu kelensie wi keben yyithu inyankethang npi kiza nyelela hi kedi nu kekhang npi kemuthu Spain, Libia, nu Lidia, mathu lakusü kepiechüthu ssisen, nu Tubal nu Gris wi chiaben . Mizzatenti hathu jawi mathu na hi kedi cüki pi thangchi ben.

²⁰ Mathu na mizzatentithu wi nthu diyyi nyithu tsüdi ssineng ghola aju ti sapi hi cüben. Mathu na goru, gada kizzathu, sunsiesa, gorugari, nu atsanqai kepvü garithu miwi na mathu ssinu hi kemetha yyishiphon Jerusalem wi ghoben, nu tsüna Israel nyithu na asu pi kekinyi kiccüna wi sen keten keshathi pfü kemetha wi chi sen nu Kekinyijjen wi kegho ti saaben.

²¹ Hi mathu pahan pi keqhaikedithu nu Levi nyithu sa thsüaben.

²² “Ayyi ketheü nu atssan ketheüthu na hi kekhang wina benya keten tsüti nshicübvüghathu nu n-nyan la ben yaben.

²³ Asha Ketheü Kho nu Sabbath tsathang tsüdi wila mizzatenti tsüdi wi anyithu na he Jerusalem wi ghola hi kinyiben.” Apvüwa na khiben.

²⁴ “Mathu na shhu keten wi hi matangla keshunthu keshü kamang muben. Mathu dsa keten gheithu na khiela shü nben, nu mathu mecang keten nni la nün nben. Mathu na anyi tsüdi ghena nankiqanan saaben.”