ISAYA 64 - Kemethajüh (N) (Re-editing) Bible (BSI)

¹ Mangkesa na no atssan zanqhe nu dugho nsa nu? Ayikhathu na no mu nu messi pi kedheggüa kesa.

² Mathu na kenün pi atssü na anni kesa miwi gilli keben ti sa kesa. Ghola no kekhang pi nghinyithu ccücalo, nu mizzatentithu sapi no ketenpen wi kenün thsülo!

³ Matsü kesü wi no gho ithu na meshen nkeben wi qhethiketen kekulithu sa; ayikhathu na no mu nu messi pi kedheggü.

⁴ Anyi thola mathu kaghang pi ma miwi chi keten ghena kuli kechiwa Anyiza no ti kesa npi mu nyelela npi zaya.

⁵ No kemeshonwa kekuli wi anonkeghe muya ketenthu nu no khatila mathu ya hangya thsü mvuten khe meshen keyathu tsü ssiyaden. No ithu miwi aghepvü lela ithu na sami kayi; kheni tsüwi na no nlebentsu ntsa sa lela ithu na kesazziwa tsü saki sa.

⁶ Ithu tsüdi sami ntsa gho; ithu kekuli kemehai ntsawa lela nmethatha. Ithu kesami ghena ithu na aghangwa na jü wa nu ameghü na mo pi bvü keten tsüti.

⁷ Thola kekhie wina no wi kheneng ngho; thola kekiqa ghena no wi nwa. Ithu kesami ghena no ithu teshi nu kuthi bvüa.

⁸ Isala Apvüwa, no ithu ba. Ithu na apfüyyi ti, nu no apfükezhüwa ti kesa le. No ithu sahangchi,

⁹ tsalina ithu miwi nlebentsu ntsa nyelela anuphan ithu kesami pi ithu meshensa nben lalo. Ithu na n-nyithu; ithu nantizenchi cülo.

¹⁰ N-nyunutithu na ayyikeshü kesü ti; Jerusalem na yasa pi teshidha,

¹¹ nu ithu Kekinyijjen, ithu baqhaithu na no seng keten pen kemetha nu atsikemehai tsüna anni pi yasadha. Ithu na nen keten pen tsüdila keyasa wi bendha.

¹² Apvüwa, no hathu tsüdi wi lela nleben n-naa kwe? No mangla nkulila ithu sapi ithu nkepvücha wi ketizensa thsüten kwe?