ISAYA 59 - Kemethajüh (N) (Re-editing) Bible (BSI)

Atusenjüh-kechüwa na Anyithu kesami Thenkesa

¹ Apvüwa na nthu hangshaya le kesa kekhang nmi nyelela ma khuna decu pi nthu na ma wi kekhie hhai tsü za nbenle nmeshenla!

² Tsüna nthu kesami ghena ma nthu kekhie kina nten. Nthu na ma kinyile kewa wi Anyiza wina nthu pi makepa sacü ketenwa tsüna nthu kesami nale.

³ Nthu na milikemesa, yasayala, nu anyi kepathi ghena sazziben.

⁴ Nthu na ajüh kaghatenpen wi waden, isala nthu wiwa atsentsawa muya nten. Nthu na milikemesa kaghatenjühwa tsüpi khangya le saden. Nthu na nyu yasale kesa ghena nthu cho saden.

^5-6 Nthu na acho nkemehai kekiden tsüna shü thsü keten amaghang jikepvü ghatsü ti kesa. Ma ghatsü kesü pakhhi nanlo, amaghang kesü na shhugho ben! Isala nthu chowa tsüna nthu ghena kemehai mangla saya nben, tsüthu tsüna ma men nmi pi saghabvü zi pi athsü kesa tile!

⁷ Nthu na keshüthangla nkemehai pahan kiden ben den, nu nthu na tsü sale mehiechala ben den. Nthu na kesami nkemithu pathi maghan nten. Nthu na kahe wi wa lela pala pasapala nu yasa theng bvü den,

⁸ nu nthu keben wi thola yazishu benya nten. Nthu kekuli tsüdila nmeshon. Nthu na alen kekhhakhu ton, nu tsü len ton keten thola yazishu saya nben.

Anyithu na mathu Kesami Kekhishi

⁹ Anyithu na khiben, “Ithu na khili tsü Anyiza na mangkesa na kepashathu wina ithu hangsha meya khe chüben. Ithu na kewegü wi lenketsen ghang, isala ciwi kejang ketan,

¹⁰ nu ithu na anyon nkemu ti ketsü. Ithu na ghanan lapvü wi lela aghaja wi ti, keshü yyi kejang wi keten ti accümeshü.

¹¹ Ithu na qhethiketen nu agüccü. Ithu na nyu kepasha nu kemeten-kemesha wi Anyiza na ithu hangshakeya nmvu, isala mangla sa nchi.

¹² “Apvüwa, ithu na sazzi pi no matang kesa tsüna ji mtsüdha. Ithu kesami na ithu kimenni. Ithu na tsüthu tsüdila chüya bendha.

¹³ Ithu na no matangla shun, no meya mvu, nu no n-nie mvula hhaghedha. Ithu na nyu pasha nu no wina khapeghe bvüle. Ithu kemeshen na hatheneng; ithu jüh na milikemesa.

¹⁴ Atsentsawa jügü pi bvü thsüa, nu kemeshonwa na tetsaki gho meyala. Atsentsawa na anyithu jawi accümeshü, nu ciwi jühtsentsa na ma pen nmidha.

¹⁵ Ciwi jühtsentsa kesa na zeng mtsü nu thowa na nkemehai nsala khe ma kesazzi kesa ti saaden.” Apvüwa na ha muyadha, nu ciwi jühtsentsa kesa nmila kesalina ma n-nen laben.

Apvüwa na Ma nyithu kikashayale kekiden

¹⁶ Ma nyu na pasha kebenthu tsü kekiqa nyi kesüla nkemu ghena amansa. Tsalina ma ketanla ma kekhang sen nu tsüthu kikashaya nu khangkeya sayaden.

¹⁷ Ma ajüh tsentsawa pi aghighe gwomejuwa ti nu hangshakeya kekhang pi aliwen kesü ti pvü yaden. Ma satemeshon chile kesa ghena apiketsü kesa thsümeniwa tsü pvüya nu anyithu na ayen nkenye wina agüccü keben jukhiya cü nu kemeten pi cüden.

¹⁸ Ma ma ghinyithu, ayyi lenkesie wi hang kebenthu lela mathu kekuli qei wina mathu meten cüden.

¹⁹ Nishuwa na wala niduwa kecu wi anyi tsüdila ma kekhang nu ma kediwa tsü messiden. Ma aghaku tssüketi ti nu ameghü kekhang ti ghoben.

²⁰ Apvüwa na ma nyithu wi khiben, “Hi nthu sheipiya nu nthu kesami wina khapegheya kesathu tsüdi hangshayale kesalina hi Jerusalem wi ghoden.

²¹ Nu hi nthu ssinu cenkethenjüh kesü saaden: Hi kekhang nu hi pi nyu kesansijühthu pi anuphanla nthu ji salo kesa pi nthu cüdha, nu nthu na khili nten na ijühkina nu ghaketen wi matsü tsüdi ghena nthu tsangathu nu nthu shicübvüghathu sansi pi ijühkina thsüden.”