ISAYA 58 - Kemethajüh (N) (Re-editing) Bible (BSI)

Atsentsa Kezi

¹ Apvüwa na khiben, “Saya kemehai chu misikhhali jishachilo! Inyi Israel kesami cüki pi mathu kizalo!

² Mathu na keshüthangla hi kinyi, mathu na ilenthu nu iyenthu chü nu nie mvu benle khiden. Mathu na hi ayenthu pi mathu cü thsü mvu nu mathu na hi kekinyi wi mathu nen tenle khiden.”

³ Anyithu na keü, “Apvüwa na khiela chü nten lethu ithu na mangsale zi ben nu? Ma meshenchi nten lethu ithu na mangsale kedsakejjü nsenla ben nu?” Apvüwa na mathu wi khiben, “Atsentsawa lethu nthu na kezi kesa tsüwi nthu ketanla nthu kenen sa nu nthu kekuli kesanyi pashaden.

⁴ Nthu kezi na nthu sapi yasayala, nu nthu na kitagha nu kesaliden. Nthu kemeshen tsü kezi tsüti kesa wi hi nthu kekhie kina cü benle saben kwe?

⁵ Nthu na kezi wi nthu ketanla nthu sapi ketizensa den; nthu na aghangwa ti nthu li kejen cadu nu ma miwi jenle kesa ghena aleshithsü zanshigü pi shi nu ayyiwen miwi kuweng den. Nthu na tsüpi kezi le khiden kwe? Nthu kemeshen tsü hi tsüti kesa tsü nen benle saben kwe?

⁶ “Hi yamvu kebenwa kezi tsüna hale: Kepasha mighe ssüli nu jühtsentsa nkesen sun keqhanthu tsü khu pi nu nyu ma pasha ketenthu ya kekhen nmila bvü thsüa.

⁷ Nthu kedsakejjü pi kaghamathu gishü dsa nu nthu jjen sha pi ajjen nkemi ketha-uthu cülo. Athsümeni pi kimessü ketenthu mphi thsü, nu nthu shilithu nkiqala nsala.

⁸ “Isalethu hi kenen tsüna nthu miwi aghani ti wegüden, nu nthu yisüthu na wan mayaben. Hi keshüthangla nthu hangshaya le nthu ssi ben den; nu hi kekhang na nthu kechhenkevü tsüdi wi nthu khwe yaben.

⁹ Nthu na khie lethu hi nthu luneng chiben. Nthu na hi ci kechi wi hi nthu nusha chiben. “Keujüla nthu na nyu kepasha kekuli, nyu nkhichila tsütson kesa, nu ajüh nkemehai tsüdila teshi;

¹⁰ nthu na kedsakejjü pi ghama ketenthu cü nu hhaketuthu kenen sa cü lethu, kejang nthu vü kebenwa tsü kemili pi ghanan lapvü kewegü ti saaben.

¹¹ Nu hi keshüthangla nthu ssi nu pala kemehai pi nthu nonkwen cüden. Hi nthu pi zükeqhe nu mehaitsü benya thsüaben. Nthu na atssü kejon keben, atssükebvüpen khiela qha nketen sanku kesü ti saaben.

¹² N-nyithu na matsü kesiela wakea wi yasa kesathu tsü sapfü nu ma gi kaghawen miwi tsü saneng den. Nthu na akhwetithu kesapfü nu ajjen keyasathu tsü saneng keya nyithu le kesa chüyaben.”

Sabbath yen kenie ghena kutimen

¹³ Apvüwa na khiben, “Keujüla nthu na Sabbath pi kemetha sa nu tsü ghanan wi nthu kenenthu nsa; keujüla nthu na itsathang kemethawa tsüpi ma men keben sa, nu tsü kenyuwakü ghena tsü ghanan wi kijünyi wa, kuli, ajüh nkejikagha khi nsala lethu,

¹⁴ nthu na hi kekuli kesa ghena anonkeghewa tsü mu yaden. Hi nthu sapi ayyi tsüdi kenyuwakü pvüya thsüden, nu nthu na hi ayyi pi nthu baqhaiwa Jakob kecü tsü sen nu anonghe yaben. Hi Apvüwa, hi khidha.”