ISAYA 57 - Kemethajüh (N) (Re-editing) Bible (BSI)

Israel tsikezhü kekinyiwa tsü Kemeshensa

¹ Anyi kemehai na shü lela nyu na mathu chüshiya nu meshenya nten. Isala mathu na shüthu keyasawa tsüna mathu patenaya nben.

² Mehaitsü hang ketenthu na keshü wi kecca nu anonkeghe muyaben.

³ Kesamithu, nthu jüh kaghaten le kesa ghena hewi gholo! Nthu na demathu, keqhezathu, nu keqheza menkedsathu miwi mehaiki nsa.

⁴ Nthu na thowa pi keponsa saten nu? Nthu milikemesathu na thowa nankeqhe ten nu?

⁵ Nthu na nthu chanton kemetha cakhu wi keqheza kekuli sapi keben cenpvüthu tsü kinyiden. Nthu na akuza ghüsa kete wi nthu tsanga khupi alonshi ku wi ahhanshathu sala kinyiden.

⁶ Nthu na ciwi alon chengche kesa khuya nu tsüthu pi acenpvü ti sala kinyiden. Nthu na kisengtssü meyisha pi tsüthu kinyi nu asu pi kekinyi sa sengho tsüthu cüden. Nthu kemeshen tsü hi tsüthu tsü nen benle ben kwe?

⁷ Nthu na ayikha kemisi wi ki nu ahhanshathu sa nu keqheza kekuli saden.

⁸ Nthu jjen ccühha wi nthu ji tsikezhüthu kimessü tsüpi chitheng. Nthu na hi teshia; nu nthu thsümeni bhu pi nu nthu na ssinu jenle ma men sa ketheng kenenthu tsü ssinu awe keti wi duden. Nu ciwi nthu sajjü nonkekwen saden.

⁹ Nthu na hankedemvu nu kenyenji pi chiya nu sen wa Molek cenpvü tsü kinyiden. Nthu na acenpvüthu bha nu kinyile kesalina nyilothu kesun pi kelensie wi nu keshü yyi wi lela wa thsüden.

¹⁰ Nthu na acenpvü kepathu bha pi nthu likesaghang sa ben den, isala nthu khiela tsü teshi nden. Nthu na nthu ji tsikezhüthu kimessü tsüna kezü pi nthu cü nu nthu na khiela nchala sa ntenle meshenden.

¹¹ Apvüwa na khiben, “Acenpvü hathu ha thowalenu nthu satemessi nu nthu ya milimesa pi hi kiza nu hi malitha sa thsüten nu? Hi matsü kesie ccen ben wa kesalina nthu na hi nkinyi ladha la?

¹² Nthu na nthu sa ketenwa tsüna meshonle meshen ben, isala hi nthu kekuli pi nthu ccücaden, nu nthu tsikezhüthu tsüna nthu kiqaya nben.

¹³ Nthu na kekiqa kekhie wi tsikezhü tsüthu ya nthu hangshaya thsülo! Ameghü na kutitan sho kegho wi tsüthu mo pi bvüaben! Isala hi nondi ketenthu na ayyi hawa wi hangya nu hi Kekinyijjen wi kinyi yaben.”

Anyiza na sapi mehaikecü nu kekiqa khishikechi

¹⁴ Apvüwa na khiben, “Inyithu ya hi wi kheneng gho thsülo. Mathu len wi alenkekhen tsüdila khu pilo! Alen sa nu tsü kiden yalo!

¹⁵ “Hi kemisi nu kemetha Nyiza anuphanla hangben ketenwa tsüle. Hi kemisi nu kemetha pen wi hangden, isala hi mathu kenondi nu kaghang pi cü nengle kesalina anyi mathu kahang satemeni nu leben khapeghe keyathu la ssinu hangden.

¹⁶ Hi kahang pi inyithu cü, nu hi anuphanla mathu kimenni nyelela mathu ssinu lebentsu ben ntendha.

¹⁷ Hi mathu kesami nu apvükemene ghena mathu miwi lebentsu nu mathu meten cü nu mathu teshia. Isala mathu na leben-dhu nu mathu kekuliwa tsü nteshi.

¹⁸ “Hi mathu na khati kuli khe mudha, isala hi mathu sapi mehai cüaden . Hi mathu lentsütson nu mathu kiqaden, nu hi leben ketizensa ketenthu satecca cüden.

¹⁹ Hi kecca pi akete nu kelensie wi kebenthu tsüdila cüden! Hi inyithu sapi mehai cüden.

²⁰ Isala anyi nkemehaithu na ngan nketen tssükedone tssükullu nhandhila kuli nu kenenkagha nu anisha lle sengho keten tsüti le.

²¹ Ciwi kesamithu ghena kecca nmi,” Apvüwa na khiben.